သျှမ်းပြည်တောင်ပိုင်း မိုးဗြဲမြို့တွင် စစ်ကောင်စီနှင့် ပြည်သူ့ကာကွယ်ရေးတပ်ဖွဲ့ PDF တို့ ဖြစ်ပွားသည့် တိုက်ပွဲကြား မိုးဗြဲမြို့ ဒေသခံ တစ်သောင်း နီးပါး မြို့တွင်းတွင် ပိတ်မိနေကြောင်း စုံစမ်းသိရှိရသည်။
ဖေဖော်ဝါရီ ၁၅ ရက်နေ့မှစပြီး ပြည်သူ့ကာကွယ်ရေးတပ်ဖွဲ့ PDF နှင့် စစ်ကောင်စီတို့ တိုက်ပွဲဖြစ်ပွားခဲ့သည့်အတွက် ဒေသခံတချို့ ထွက်ပြေးတိမ်းရှောင်ခဲ့ကြပြီး တချို့ဒေသခံများက မိုးဗြဲမြို့တွင်းတွင် ပိတ်မိကျန်ရှိနေကြောင်း သိရသည်။
“တချို့ပြည်သူတွေတော့ စစ်ဘေး ထွက်ပြေးတိမ်းရှောင်နေကြပြီ။ ဒါပေမဲ့ တချို့ မထွက်ပြေးနိုင်တဲ့သူတွေ ရှိနေသေးတယ်။ မြို့ထဲမှာ ပိတ်မိပြီး ခံနေတဲ့သူတွေက ရှိနေသေးတယ်” ဟု Mobye Rescue Team အဖွဲ့ဝင်တစ်ဦးက ပြောသည်။
အဆိုပါ မိုးဗြဲမြို့ ဒေသခံများသည် မြို့ပြင်သို့ ထွက်ပြေးတိမ်းရှောင်ခဲ့ကြပြီး တချို့ ပြည်သူများက နီးစပ်ရာ ဆွေမျိုးအိမ်နှင့် ဘုန်းကြီးကျောင်းသို့ ထွက်ပြေးတိမ်းရှောင်နေကြရသည်။
“စစ်ရှောင်တွေက ကိုယ့်အစီစဉ်နဲ့ ထွက်ပြေးနေကြတာရှိတယ်။ စုပြီး တစ်နေရာထဲမှာ ရှိနေတာတော့ မဟုတ်တော့ဘူး။ မြို့ထဲမှာ တချို့က ခံပြီး ပိတ်နေတာရှိနေသေးတယ်။ ၃ ပုံဆို ၂ ပုံလောက်က မြို့ထဲကျန်နေတာ” ဟု အထက်ပါ Mobye Rescue Team အဖွဲ့ဝင်တစ်ဦးက ပြောသည်။
မိုးဗြဲမြို့တွင် စစ်ကောင်စီက လက်နက်ကြီးဖြင့် ရမ်းသမ်းပစ်ခတ်ခဲ့တာကြောင့် ပြည်သူများ လက်နက်ထိမှန်ပြီး ဒဏ်ရာရရှိမှုများလည်း ရှိနေသည်။ အလားတူ ယမန်နေ့ (ဖေဖော်ဝါရီ ၁၇)ရက်နေ့က စစ်ကောင်စီ လက်နက်ကြီး ပစ်ခတ်မှုကြောင့် ဒေသခံ (၇)ဦး လက်နက်ထိမှန် ဒဏ်ရာရရှိခဲ့ကြောင်း သိရသည်။
