သျှမ်းပြည်တောင်ပိုင်း မိုးဗြဲမြို့တွင် ယမန်နေ့ (ဖေဖော်ဝါရီ ၁၇) ရက်တွင် စစ်ကောင်စီ နှင့် မဟာမိတ်ပြည်သူ့ကာကွယ်ရေး တပ်ဖွဲ့ PDF တို့ တိုက်ပွဲဖြစ်ပွားခဲ့ပြီး နှစ်ဦးနှစ်ဘက်က ကျဆုံးမှု များစွာရှိပြီး အရပ်သား ၇ ဦး ကျည်ထိမှန်ခဲ့ကြောင်း စုံစမ်းသိရှိရသည်။

ယမန်နေ့ မနက်ပိုင်းမှ စတင်ပြီး ည ၈နာရီကျော်ထိ တိုက်ပွဲဖြစ်ပွားခဲ့ကာ တိုက်ပွဲအတွင်း စစ်ကောင်စီဘက်က အနည်းဆုံး (၂၀) ဦးခန့် သေဆုံးခဲ့ပြီး PDF တပ်ဖွဲ့ဘက်မှ ၁၀ ဦးဝန်းကျင်အထိရှိနိုင်ကြောင်း မိုးဗြဲ PDF တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီဘက်ကတော့ အနည်းဆုံး ၂၀ ဦးထိရှိတယ်။ အဲထက်များဖို့ဘဲ ရှိတယ်။ စစ်ကောင်စီဘက်က တော်တော် အထိနာတယ်။ ကျနော်တို့ မိုးဗြဲ အဖွဲ့ကတော့ ၇ ဦး ကျရှုံးသွားတယ်။ ၆ ဦးလောက်တော့ ဒဏ်ရာရသွားတယ်။ မဟာမိတ်တပ်ဖွဲ့တွေလည်း ကျဆုံးမှုတွေရှိတယ်” ဟု မိုးဗြဲ PDF တပ်ဖွဲ့ဝင် တစ်ဦးက သျှမ်းသံတော်ဆင့် ကို ပြောသည်။

ထို့အပြင် မဟာမိတ်အနေဖြင့် ပါဝင်တိုက်ခိုက်ခဲ့သည့် KNDF ဖယ်ခုံအခြေစိုက် တပ်ရင်းမှ (၂) ဦး ကျဆုံးသွားပြီး (၅) ဦး ဒဏ်ရာရရှိခဲ့ကြောင်း KNDF တပ်ဖွဲ့ဝင်တစ်ဦးက ပြောသည်။

“စစ်ကောင်စီကျဆုံးမှုက များမယ်ထင်တာပဲ။ တိကျသတင်းသွားယူဖို့ မရသေးဘူး။ ကျနော်တို့မှာလည်း ဒဏ်ရာ (၅) ယောက်လောက် ရတယ်။ ကျဆုံးကတော့ (၂) ယောက်ရှိတယ်” ဟု KNDF တပ်ဖွဲ့ဝင် တစ်ဦးက ပြောသည်။

ယမန်နေ့တိုက်ပွဲတွင် စစ်ကောင်စီဘက်က အထိနာပြီးနောက်ပိုင်း လက်နက်ကြီးဖြင့် ဝင်ရောက်တိုက်ခိုက် စစ်ဆင်ခဲ့တာကြောင့် PDF တပ်ဖွဲ့ဘက်မှ ကျဆုံးမှု များသွားကြောင်း သိရသည်။

အဆိုပါ ကျဆုံးသွားသည့် မဟာမိတ် ပြည်သူ့ကာကွယ်ရေးတပ်ဖွဲ့များအားလုံးသည် လက်နက်ကြီးကြောင့်သာ ကျဆုံးသွားကြောင်း သိရသည်။

“ကျနော်တို့ ရဲဘော်တွေအားလုံးကလည်း လက်နက်ကြီးနဲ့ လေကြောင်း စစ်ကူမှာ ကျဆုံးသွားတာတွေဘဲရှိမယ်။ လက်နက်ငယ်နဲ့ဆိုရင်ဆိုရင်တော့ ကျနော်တို့ အသာစီးရယူနိုင်တယ်။ လက်နက်ကြီးနဲ့ ပစ်ကူနေတာတော့ ကျနော်တို့ တော်တော်လေးကို ခံလိုက်ရတယ်” ဟု အထက်ပါ မိုးဗြဲ PDF က ပြောသည်။

ကျဆုံးသွားသူများသည် PDF တပ်ဖွဲ့အပြင် PDF များကို ရှေ့တန်းတွင် တာဝန်ယူပြီး ဆေးကုသပေးနေသည့် ဒေါက်တာ တစ်ဦးလည်း ကျဆုံးသွားကြောင်း သိရသည်။ အဆိုပါ ဒေါက်တာလည်း လက်နက်ကြီးကြောင့် သေဆုံးသွားကြောင်း သိရသည်။

“ဒေါက်တာက ရှေ့တန်းစစ်မြေပြင်မှာ ဆေးလိုက်ကုပေးတာပေါ့။ လိုက်ကုပေးတဲ့အခါမှာ သူလည်း ရဲဘော်တွေနဲ့အတူ ကျဆုံးသွားတယ်။ ဒေါက်တာလည်း လက်နက်ကြီးကြောင့်ပဲ ကျဆုံးသွားတယ်” ဟု PDF တပ်ဖွဲ့များက ပြောသည်။

ယမန်နေ့တိုက်ပွဲသည် စစ်ကောင်စီဘက်မှ အထိနာပြီးနောက်ပိုင်း တင့်ကား၊ တိုက်လေယာဉ်ဖြင့် ဝင်ရောက် တိုက်ခိုက်ခဲ့ကြောင်း သိရသည်။

” မနေ့က ပြည်သူကတော့ (၇) ယောက်ထိခိုက်ဒဏ်ရာရတယ်။ ကလေး ၁ ဦး နဲ့ အမျိုးသမီး ၂ ဦးလည်းပါတယ်။ အမျိုးသမီးတစ်ဦးကတော့ တင့်ကားနဲ့ ပစ်လို့ ခြေထောက်ထိတာ။ ခြေထောက်ဖြတ်ရတယ်လို့သိရတယ်” ဟု Mobye Rescue Team က အဖွဲ့ဝင် တစ်ဦး က သျှမ်းသံတော်ဆင့်ကို ပြောသည်။

ထိုနည်းတူ ယမန်နေ့ ဖြစ်ပွားသည့် တိုက်ပွဲတွင် စစ်ကောင်စီက တင့်ကားဖြင့် ဝင်ရောက်တိုက်ခိုက်ခဲ့တာကြောင့် ဒေသခံ အမျိုးသမီးတစ်ဦးလည်း လက်နက်ကြီးထိမှန်သွားခဲ့ပြီး ခြေထောက်ဖြတ်လိုက်ရကြောင်း သိရသည်။