သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ်သို့ ရောက်ရှိလာသည့် စစ်ဘေးရှောင်များ (၆၀၀) နီးပါး နေရပ်သို့ ပြန်သွားပြီးဖြစ်ကြောင်း စုံစမ်းသိရှိရသည်။
မိုင်းယော်တိုက်နယ် အတွင်း မြောက်ပိုင်းမဟာမိတ် နှင့် စစ်ကောင်စီတို့ကြား တိုက်ပွဲပြင်းထန်မှုကြောင့် ပန်သပြေကျေးရွာ ဒေသခံများ လွယ်စက်ကျေးရွာဒေသခံများ ထွက်ပြေးတိမ်းရှောင်လာပြီး မိုင်းယော်စျေးထဲသို့ လာရောက်နေထိုင်ကြကြောင်း စုံစမ်းသိရှိရသည်။
“မိုင်းယော်စျေးထဲ ရောက်လာတဲ့ စစ်ရှောင်တွေ ပြန်ကုန်ပြီ။ တစ်ချို့လည်း ဆွေမျိုးအိမ်မှာ သွားနေထားတယ်။ ဒီနေ့လည်း ပန်ဝူးလှိုင်ရွာဘက် တိုက်ပွဲဖြစ်တယ်လို့ကြားတယ်” ဟု မိုင်းယော်ဒေသခံ တစ်ဦး ကပြောသည်။
ယနေ့ ဖေဖော်ဝါရီ (၁၇) ရက်နေ့တွင် မိုင်းယော်တိုက်နယ် ပန်ဝူးလှိုင်ကျေးရွာအုပ်စုဘက် စစ်ကောင်စီ နှင့် မြောက်ပိုင်းမဟာမိတ်တို့ တိုက်ပွဲဖြစ်ပွားခဲ့ကြောင်း သိရှိရသည်။
“ပြီးခဲ့တဲ့ ၃ ရက် ၄ ရက်နေ့က တိုက်ပွဲအရမ်းပြင်းထန်တော့ ဒေသခံတွေ မိုင်းယော်စျေးထဲ ထွက်ပြေးလာတဲ့ သူတွေရှိသလို လားရှိုးဘက် သွားတဲ့သူတွေလည်း ရှိတယ်။ ဒီနေ့လည်း တိုက်ပွဲပြန် ဖြစ်တယ်လို့ကြားတယ်” ဟု မိုင်းယော်ဒေသခံ အမျိုးသား လူငယ် တစ်ဦးကပြောသည်။
ဖေဖော်ဝါရီ (၁၄) ရက်တွင် မြောက်ပိုင်းမဟာမိတ် နှင့် စစ်ကောင်စီတို့ တိုက်ပွဲကြောင့် ဒေသခံများ ထွက်ပြေး တိမ်းရှောင်ခဲ့ရသည်။
မိုင်းယော်တိုက်နယ်အတွင်း စစ်ကောင်စီလက်အောက်ခံ တပ်မ (၉၉) နှင့် (၈၈) တို့ ရှိထားပြီး တိုင်းရင်းသား လက်နက်ကိုင်များဖြစ်ကြသော ကချင်လွတ်မြောက်ရေးတပ်မတော် (KIA) ၊ ကိုးကန့်တပ်မတော် (MNDAA) ၊ တအာင်းအမျိုးသားလွတ်မြောက်ရေးတပ်မတော် (TNLA) နှင့် ရှမ်းပြည်တိုးတက်ရေးပါတီ (SSPP/SSA) တို့ လှုပ်ရှားသည့် နေရာဒေသဖြစ်သည်။
