သျှမ်းပြည်တောင်ပိုင်း ပင်းတယမြို့နယ်အတွင်းတွင် စစ်ကောင်စီတပ်သား အများအပြားရှိနေသည့်ကြား ခိုးယူလုယူမှုလည်း ပိုများပြားလာကြောင်း သတင်းသိရသည်။
ပြီးခဲ့သည့် ၂၀၂၁ ခုနှစ်နှောင်းပိုင်းမှ စတင်ကာ ပင်းတယမြို့နယ်အတွင်းတွင် ပြည်သူနေအိမ်များအထိ စစ်ကောင်စီ တပ်သားတို့၏ အကြမ်းဖက် ဝင်ရောက်စီးနင်း ဖမ်းဆီးမှုများအပြင် ဒေသတွင်း သူခိုးများလည်း ပေါများလာသည့် အတွက် နေ့စဥ် လူနေမှုဘဝ မလုံခြုံကြောင်း ဒေသခံများက ပြောသည်။
“စိတ်လုံခြုံမှု မရှိတာတော့ အမှန်ပဲ၊ ပြီးတော့ ည ည ဆိုလည်း ကောင်းကောင်းမအိပ်ရဘူး၊ အရင်က စစ်ကောင်စီ တွေ လာနှောင့်ယှက်မှာ ကြောက်နေရတာက တစ်မျိုး၊ အခုက ကိုယ့်အိမ် ကိုယ့်ပစ္စည်း သူများလာခိုးသွားမှာကို စိုးရိမ်နေရတယ်” ဟု ပင်းတယမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် ပင်းတယမြို့နယ်အတွင်း သူခိုးများ လုယက်ပေါများမှုကြောင့် အမျိုးသမီးများအတွက်လည်း သွားလာရေး အတွက် အခက်အခဲများ ရှိနေကြောင်း ပင်းတယမြို့နယ်မှ မချို က သျှမ်းသံတော်ဆင့်ကို ပြောသည်။
“လမ်းတစ်လျှောက်လုံး မြို့ဝင်၊ မြို့ထွက်နေရာတိုင်း စစ်ကောင်စီရဲ့ စစ်ဆေးရေးဂိတ်တွေ ရှိနေပေမဲ့ နေရာတိုင်းမှာ ရှိနေတယ်၊ အမျိုးသမီးတစ်ယောက်အနေနဲ့ လမ်းသွားလမ်းလာဖို့ရော ညအိပ်ညနေဖို့ရော အရမ်းကို ခက်ခဲတယ်၊ လုံခြုံမှု မရှိသလို ခံစားနေရတယ်၊ ကျမတို့ဆို လမ်းသွားလမ်းလာဖို့ အတော်စဥ်းစားနေရတယ်” ဟု မချိုက သျှမ်းသံတော်ဆင့်ကို ပြောသည်။
လက်ရှိ ပင်းတယမြို့နယ်ထဲတွင် စစ်ကောင်စီတပ်တို့၏ စစ်ဆေးရေးဂိတ်များနှင့် မြို့တွင်းအင်အား ဖြန့်ကျက်ထား သော်လည်း နေအိမ်နှင့် ဆိုင်ခန်းများ ဖောက်ထွင်းမှုအထိ သူခိုးနှင့် လုယက်သူများက တစ်နေ့ထက်တစ်နေ့ ပေါများလာကြောင်း သိရသည်။
အကြမ်းဖက်စစ်တပ်မှ အာဏာသိမ်းယူပြီးနောက် နိုင်ငံတဝန်းလုံး၌ ခိုးဆိုးလုယက်မှုများ ပေါ်ပေါ်ထင်ထင် သောင်းကျန်းလာနေသော်လည်း စစ်ကောင်စီလက်အောက်ခံ ရဲတပ်ဖွဲ့က အရေးယူဖမ်းဆီးခြင်းမရှိကြောင်း သိရသည်။
Leave a Comments