သျှမ်းပြည် မြို့တော်တောင်ကြီး နှင့် လားရှိုးမြို့တို့တွင် ယခုရက်ပိုင်းအတွင်း ကိုဗစ် – ၁၉မျိုးကွဲဖြစ်သည့် အိုမီခရွန် ဖြစ်သူများ မြင့်တက်လာကြောင်း ဒေသတွင်း သတင်းအရ သိရသည်။
ဖေဖော်ဝါရီလ ၁၄ ရက်တွင် အပြင်ထွက် သွားလာသူများပြားသည့် လားရှိုးမြို့တွင် အိုမီခရွန် ရောဂါပိုး ကူးစက်ခံရသူ ၁၈ ဦး စစ်ဆေးတွေ့ရှိကြောင်း သတင်းသိရသည်။
“မနေ့မနက်ပိုင်းမှာ အပြင်ထွက်သွားလာတဲ့သူတွေကို စစ်ဆေးရေးဂိတ်မှာနဲ့တချို့ကလည်း နီးစပ်ရာ နေရာမှာ စစ်ကြတော့ ၁၄ ယောက်တွေ့တယ်၊ နောက်နေ့လည်ပိုင်းကျတော့ ပြည်သူ့ဆေးရုံကြီးမှာ လားရှိုးက (၂)ဦး၊ နမ္မတူ(၁)ဦး၊ သီပေါ(၁)ဦး စုစုပေါင်း(၁၈)ဦး တွေ့ရှိပါတယ်” ဟု လားရှိုးမြို့မှ အမည်မဖော်လိုသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် ဖေဖော်ဝါရီလ ၁၄ ရက်နေ့တွင် တောင်ကြီးမြို့၊ အမှတ်(၇) အခြေခံပညာအထက် တန်းကျောင်းရှိ ကျောင်းသူ/သား များကို (RDT) ဖြင့် ဖေဖော်ဝါရီ ၁၄ ရက်က စစ်ဆေးခဲ့ရာ ၁၇ ဦး၌ COVID-19 ပိုးတွေ့ရှိခဲ့ကြောင်း မြို့နယ်ရုံးထုတ်ပြန်ချက်အရ သိရသည်။
တောင်ကြီးမြို့နယ် အတွင်း၌ ယခုရက်ပိုင်းအတွင်း COVID-19 ပိုးရှိသူများ ပြန်လည် တွေ့ရှိလာသည့် အပြင် COVID-19 ဖြင့် သေဆုံးရသူများလည်း ရှိနေကြောင်း သိရသည်။
Leave a Comments