သျှမ်းပြည်မြောက်ပိုင်း ကျောက်မဲမြို့တွင် စစ်ထောက်လှမ်းရေးက မှားယွင်းပြီး ဖမ်းဆီးသွားသည့် စိုင်းထွန်းဝင်းအား သတ်ဖြတ်ပြီးနောက်ပိုင်း တာဝန်ယူဖြေရှင်း လျော်ကြေးပေးတာ မရှိကြောင်း စုံစမ်းသိရသည်။
ကျောက်မဲမြို့သို့ စစ်ဘေးရှောင်လာသည့် ဦးထွန်းဝင်းအား ဖေဖော်ဝါရီ ၃ ရက်နေ့က စစ်ထောက်လှမ်းရေးအဖွဲ့က လာရောက်ဖမ်းဆီးသွားပြီး သတ်ဖြတ်လိုက်ကြောင်း၊ တာဝန်ယူဖြေရှင်းပေးခြင်းလည်း မရှိကြောင်း ရှမ်းလူ့အခွင့်အရေးမဏ္ဍိုင်မှ ထုတ်ပြန်ထားကြောင်း သိရသည်။
“ဒီကိစ္စနဲ့ ပတ်သက်ပြီးတော့ တာဝန်ရှိတဲ့ ရဲတွေ၊ စစ်သားတွေ ဘာမှ တာဝန်ယူပေးတာမရှိဘူး။ လျော်ကြေးတွေ ပြန်ပေးတာလည်း မရှိဘူး။ စစ်ထောက်လှမ်းရေးအဖွဲ့က လာဖမ်းသွားတာ။ ဖမ်းပြီး နှိပ်စက်သတ်ဖြတ်တယ်လေ” ဟု ရှမ်းလူ့အခွင့်အရေးမဏ္ဍိုင် ပြောခွင့်ရ စိုင်းဟော်ရှဲန်က ပြောသည်။
အဆိုပါ စိုင်းထွန်းဝင်းကို ဖမ်းဆီးသတ်ဖြတ်သွားသည့် ရဲ နှင့် တာဝန်ရှိသူများကို နောက်တစ်နေ့တွင် ဆွေမျိုးများက ရဲစခန်းသို့ သွားရောက်ရှာဖွေရာတွင် မတွေ့ရှိတော့ကြောင်း သိရသည်။
ထို့အပြင် စိုင်းထွန်းဝင်းသည် ယာဉ်မတော်တဆကြောင့် သေဆုံးသွားကြောင်း၊ ယာဉ်မတော်တဆ သေဆုံးမှုကိုလည်း ဆွေမျိုးများအား လက်မှတ်ရေးထိုးခိုင်းကြောင်း သိရသည်။
“စိုင်းထွန်းဝင်းကို သတ်ပြီးနောက်တစ်နေ့မှာ ဆွေမျိုးတွေက ရဲစခန်းမှာ သွားရှာကြည့်တော့ လာဖမ်းတဲ့ ရဲတွေ၊ တာဝန်ရှိသူတွေကို မတွေ့တော့ဘူး။ ပြီးတော့ သူတို့က စိုင်းထွန်းဝင်းကို ယာဉ်မတော်တဆကြောင့် သေတယ်လို့ ပြောတယ်။ အဲကြောင့်သေတာကိုလည်း လက်မှတ်ရေးထိုးခိုင်းတယ်။ သူတို့ တာဝန်မယူဘဲ ခေါင်းရှောင်တာပေါ့။ အရင်ကလည်း သူတို့ ဒီလိုမျိုးလုပ်နေတာဘဲ” ဟု အထက်ပါ စိုင်းဟော်ရှဲန်က ပြောသည်။
စိုင်းထွန်းဝင်းကို မူးယစ်ဆေးသတင်းအရ လာရောက်ရှာဖွေခဲ့ပြီး ၎င်းအား လက်ထိပ်ခတ်၊ စောင်ဖြင့် ခေါင်းကို အုပ်ကာ ရိုက်နှက်ကန်ခဲ့ကြောင်း သိရသည်။
ထို့အပြင် စိုင်းထွန်းဝင်၏ ခယ်မ ဖြစ်သူကိုလည်း ရိုက်နှက်ကာ ဆံပင်ဆွဲ၊ ခန္ဓာကိုယ်တွင် ရှာဖွေပြီး ပိုက်ဆံနှင့် တန်ဖိုးရှိ ပစ္စည်းများကိုပါ ယူသွားကြောင်း သိရသည်။
စိုင်းထွန်းဝင်း၏ ရုပ်အလောင်းကို ရင်ခွဲစစ်ဆေးရာတွင်လည်း အရိုးများကျိုးနေပြီး ကိုယ်တွင်းအင်္ဂါ အစိတ်အပိုင်းများလည်း ထိခိုက်ထားကြောင်း သိရသည်။
