စစ်ကောင်စီက ကျုးလွန်ထားသည့် အကြမ်းဖက်မှုများကို အနီးကပ် စောင့်ကြည့်အရေးယူပေးရန်အတွက် ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းက ကုလသမဂ္ဂ လုံခြုံရေးကောင်စီ အကြမ်းဖက်မှု တိုက်ဖျက်ရေးကော်မတီ အစည်းအဝေးတွင် တိုက်တွန်းပြောဆိုခဲ့ကြောင်းသတင်းရရှိသည်။
ဖေဖော်ဝါရီ (၁၄) ရက်က ပြုလုပ်သည့် ကုလသမဂ္ဂ လုံခြုံရေးကောင်စီ အကြမ်းဖက်မှု တိုက်ဖျက်ရေး ကော်မတီ အစည်းအဝေးမှာ ဦးကျော်မိုးထွန်း ကတိုက်တွန်းပြောဆိုခဲ့ခြင်းဖြစ်ကြောင်း သိရသည်။
မြန်မာနိုင်ငံမှာ စစ်တပ်က မအောင်မြင်သည့် နိုင်ငံတော်အာဏာ မတရားသိမ်းပြီးသည့် အချိန်ကစပြီး စစ်တပ်က မြန်မာပြည်သူအပေါ် ရက်စက်ကြမ်းကြုတ်မှုများ ကျယ်ကျယ်ပြန့်ပြန့် နှင့် စနစ်တကျ ကျုးလွန်ကြောင်း၊ ကုလသမဂ္ဂ၏ မြန်မာနိုင်ငံ နှင့် သက်ဆိုင်သည့် စုံစမ်းစစ်ဆေးရေး ယန္တရား IIMM ၏ထုတ်ပြန်ချက် အရ စစ်တပ်က အကြမ်းဖက်မှုများ လူသားမျိုးနွယ်စု အပေါ် ကျုးလွန်သည့် ပြစ်မှု မြောက်နိုင်ကြောင်းတယ်လို့ ထုတ်ဖော်ပြောကြားခဲ့ကြောင်း သိရှိရသည်။
စစ်တပ်က လွန်ခဲ့သည့် နှစ်အတွင်းကလည်း လူအစုလိုက် အပြုံလိုက်သတ်ဖြတ်မှုများ ပြည်သူများ၏ နေအိမ် မီးရှို့ဖျက်ဆီးခြင်း၊ လူသားမဆန်သည့် ပြစ်မှုများ နှင့် ရက်စက်ကြမ်းကြုတ်မှုများ ကျုးလွန်ခဲ့ကြောင်း သံအမတ်ကြီး က ထုတ်ဖော်ပြောဆိုခဲ့သည်။
ပြီးခဲ့သည့် ၂၀၂၁ ခုနှစ် ဒီဇင်ဘာ (၅) ရက်နေ့က ရန်ကုန်မြို့မှာ ငြိမ်းချမ်းစွာ ဆန္ဒထုတ်ဖော်နေကြသည့် ပြည်သူအုပ်စုကို စစ်တပ်မှ အနောက်မှ နေပြီး ကားဖြင့် ဝင်တိုက်ခဲ့ရာ ပြည်သူ (၅) ဦး အသက်ဆုံးရှုံးခဲ့ရကြောင်း၊ စစ်တပ်မှ လူမြင်ကွင်း ကျုးလွန်ခဲ့သည့် ပြစ်မှုတစ်ရပ်ပင်ဖြစ်ကြောင်း သံအမတ်ကြီးက ပြောဆိုလိုက်သည်။
မြန်မာနိုင်ငံမှာ အကြမ်းဖက်မှုကို တရားဥပဒေ စိုးမိုးရေး အတွက် ဖော်ဆောင်နေသည့် တပ်ဖွဲ့ဝင်များက ကျုးလွန်နေသည့် အတွက် ဝမ်းနည်းဖွယ်ကောင်းကြောင်း ထို့ကြောင့် နိုင်ငံတကာ အသိုက်အဝန်းအနေဖြင့် အကြမ်းဖက်မှုမျိုးကို အပြင်းထန်ဆုံး ရှုတ်ချသင့်ပြီး ပြစ်မှုကျုးလွန်သူများကိုလည်း တရားဥပဒေအရ အရေးယူသင့်ကြောင်း ဦးကျော်မိုးထွန်း ကပြောသည်။
