Sunday, July 21, 2024

 သျှမ်းလက်နက်ကိုင် တိုက်ပွဲကြောင့် ထိုင်းသို့ တရားမဝင်လာသူ (၂၂၀) ဦးကျော် ဖမ်းဆီးခံထားရ

Must read

ထိုင်းနိုင်ငံမြောက်ပိုင်း ချင်းမိုင်ခရိုင် ဖန်မြို့နယ်အတွင်းသို့ တရားမဝင် ဝင်ရောက်လာသူ (၂၂၀) ကျော် ဖမ်းဆီးထိန်းသိမ်းခံ ထားရကြောင်း စုံစမ်းသိရှိရသည်။

အဆိုပါ ဝင်ရောက်လာသူများသည် သျှမ်းပြည်တွင်း တိုင်းရင်းသားလက်နက်ကိုင် အချင်းချင်း တိုက်ပွဲဖြင့် သော်လည်းကောင်း၊ ကရင်နီပြည် မှာ စစ်ကောင်စီ နှင့် ပြည်သူ့ကာကွယ်ရေး တပ်မတော် တို့ကြား တိုက်ပွဲပြင်းထန်မှုကြောင့် ပြည်သူများ ထွက်ပြေးတိမ်းရှောင်ခဲ့ရသည်။

 ဇန်နဝါရီ (၂၉) ရက်နေ့ စာရင်းအရ သျှမ်းပြည် မိုင်းကိုင်၊ မိုင်းရှုး၊ ကျိုင်းတောင်း၊ လဲချား၊ ပင်လုံ၊တောင်ကြီး၊ ဖယ်ခုံ နှင့် ကရင်ပြည် လွိုင်ကော်တို့မှ ထွက်ပြေးလာပြီး ချင်းမိုင်ခရိုင် အတွင်း ထိုင်းနယ်စပ် ဖန်မြို့နယ် မှာ ဝင်လာသူ (၂၂၇) ဦး ဖမ်းဆီးခဲ့ရပြီး ထိုအထဲမှာ အမျိုးသမီး (၁၀၃) ဦး ပါရှိကြောင်း ရှမ်းအမျိုးသမီးရေးရာ ဆက်သွယ်လှုပ်ရှား ဆောင်ရွက်ရေး အသင်း  (SWAN) မှ ထုတ်ပြန်ထားသည်။

“ထိုင်းဘက်က တာဝန်ရှိသူတွေပြောပြချက်အရတော့ ပြန်ပို့မယ်လို့တော့ ပြောတယ်။ ဒါပေမယ့် ရက်တော့ အတိအကျမပြောဘူး။ သူတို့ဘက်တော့ပြန်ပို့မယ်လို့တော့ပြောတယ်” ဟု SWAN မှ တာဝန်ရှိသူ တစ်ဦး က သျှမ်းသံတော်ဆင့် ကိုပြောသည်။

 ဖန်မြို့နယ်မှာ ရောက်ရှိသည့် စစ်ရှောင်များသည် ချောင်းဆိုးပျောက်ဆေးများ၊ အကိုက်အခဲပျောက်ဆေးများ၊ အမျိုးသမီး အမျိုးသား အတွင်းခံ ပစ္စည်းများလိုအပ်နေကြောင်း ၎င်းက ထပ်လောင်းပြောသည်။

“ပြီးခဲ့တဲ့ ၂ ရက် ၃ ရက်လောက်က မယ့်အိုင်းမြို့နယ်မှာလည်း (၃၅) ဦးကျော်ရှိတယ်။ သူတို့တွေကတော့ သောက်ရေတွေ ခေါင်းလျှော်ရည်တွေ လိုအပ်တယ်” ဟု SWAN က တာဝန်ရှိသူ တစ်ဦး ကပြောသည်။

မိုင်းကိုင်မြို့ အတွင်း “ဝ” တပ်သားများ တိုးများလာကာ အမျိုးသမီးငယ်များကို အတင်းအဓမ္မ လက်ထပ်ယူမှုများရှိပြီး လိင်ပိုင်းဆိုင်ရာ  အကြမ်းဖက်မှုများ မုဒိမ်းမှုများ ရှိခဲ့ကြောင်း SWAN ထုတ်ပြန်ချက်အရ သိရသည်။

ပြီးခဲ့သည့် ၂၀၂၁ စက်တင်ဘာလမှ စတင်ပြီး သျှမ်းပြည်တွင်းရှိ တိုင်းရင်းသားလက်နက်ကိုင်တပ်များအချင်းချင်းကြား တိုက်ပွဲပြင်းထန်မှုကြောင့် စစ်ရှောင်များ နေရပ်သို့ အများအပြား ထွက်ပြေးတိမ်းရှောင်ခဲ့ရသည်။

Leave a Comments

- Advertisement -spot_img

Latest article