Monday, July 22, 2024

PNLO/PNLA မှ ကရင်နီစစ်ဘေးရှောင်များကို ကျန်းမာရေးစောင့်ရှောက်မှုများ ပြုလုပ်ပေးနေ

Must read

သျှမ်းပြည်တောင်ပိုင်း မောက်မယ်မြို့နယ် ကဒူးကြီးကျေးရွာအတွင်း ရောက်ရှိလာသည့် ကရင်နီပြည်ဘက်မှ စစ်ဘေးရှောင်များကို PNLO/PNLA က ကျန်းမာရေးစောင့်ရှောက်မှုပေးနေကြောင်း သတင်းသိရသည်။

ပြီးခဲ့သည့် ၂၀၂၁ ခုနှစ် နှစ်ကုန်ပိုင်းမှ စတင်ပြီး ကရင်နီပြည်ဘက်မှ ကဒူးကြီးကျေးရွာဘက်သို့ စစ်ရှောင်ရောက်ရှိ လာသည့် စစ်ဘေးရှောင်များကို PNLO မှ ကျန်းမာရေးဝန်ထမ်းများ ကွင်းဆင်းပြီး ကျန်းမာရေးစောင့်ရှောက်မှုများ ပြုလုပ်ပေးနေကြောင်း ဗိုလ်မှူး မြင့်အောင်က သျှမ်းသံတော်ဆင့်ကို ပြောသည်။

“ကျနော်တို့ကနေ ဒီမောက်မယ်နယ်နဲ့ ကဒူးကြီးရွာဘက်ကို စစ်ရှောင်ရောက်လာတဲ့ ပြည်သူအားလုံးကို ကိုဗစ် ရှိ/မရှိ စစ်ဆေးပေးပါတယ်၊ အပူချိန်တွေ တိုင်းပေးတယ်၊ ပြီးတော့ တခြား ဖျားနှာတာနဲ့ တုတ်ကွေးဖြစ်တဲ့ သူတွေကိုလည်း ဆေးဝါးနဲ့ ကုသမှုတွေ ပြုလုပ်ပေးနေပါတယ်” ဟု PNLA မှ ဗဟိုကျန်းမာရေး တာဝန်ခံ ဗိုလ်မှူး မြင့်အောင် က သျှမ်းသံတော်ဆင့်ကို ပြောသည်။

ထို့အပြင် လက်ရှိ ကဒူးကြီးကျေးရွာနှင့် အနီးပတ်ဝန်းကျင်အတွင်း ရောက်ရှိလာသည့် မွေးကင်းစ ကလေးငယ်များ အပါအဝင် တစ်နေ့လျှင် စစ်ရှောင်ဦးရေ ၂၀ မှ ၅၀ ကြား နေ့စဥ်ဝင်ရောက်လာသည့်အတွက် စစ်ရှောင်များကို ရေရှည်ထောက်ပံ့ပေးနိုင်ရန် အလှူရှင်များ ပါဝင်လာရန်လည်း ဖိတ်ခေါ်ကြောင်း ဗိုလ်မှူးမြင့်အောင် က ဆက်လက်ပြောဆိုထားသည်။

“တုပ်ကွေးနဲ့ တခြား ကျန်းမာရေးဆိုင်ရာကုသမှုတွေအတွက် ဆေးဝါးအထောက်အကူတွေ လိုအပ်ပါတယ်၊ ပြီးတော့ ကလေးတွေအတွက် အနွေးထည်တွေ လိုအပ်နေပါတယ်၊ အလှူရှင်များ ကျနော်တို့ PNLO နဲ့ ချိတ်ဆက်ပြီးဖြစ်စေ၊ တစ်ဦးတစ်ယောက် အနေနဲ့ဖြစ်စေ ပါဝင်လှူဒါန်းပေးကြပါလို့ ပြောချင်ပါတယ်” ဟု ဗိုလ်မှူး မြင့်အောင်က ပြောသည်။

ကဒူးကြီးကျေးရွာအတွင်း ရောက်ရှိလာသည့် ကရင်နီစစ်ရှောင်များကို PNLO ရဲ့ ဆက်ဆံရေးရုံးသို့ ဆက်သွယ်ပြီး ကူညီနိုင်သည့်အပြင် PNLO မှ ဗဟိုကျန်းမာရေးအဖွဲ့ဝင် ဆရာမ နန်းငယ် ဖုန်းနံပါတ် ၀၉ – ၈၉၉ ၄၉၀ ၃၂၂ သို့ ဆက်သွယ်လှူဒါန်းနိုင်ကြောင်းလည်း ပြောဆိုထားသည်။

PNLO တပ်ဖွဲ့သည် ၂၀၁၅ ခုနှစ် အောက်တိုဘာ ၁၅ ရက်တွင် တခြားသော တိုင်းရင်းသားလက်နက်ကိုင် ၇ ဖွဲ့နှင့်အတူ တစ်နိုင်ငံလုံး အပစ်ခတ်ရပ်စဲရေး သဘောတူစာချုပ် (NCA) လက်မှတ်ရေးထိုးခဲ့သည့် ပအိုဝ်းတိုင်းရင်းသား လက်နက်ကိုင်တပ်ဖွဲ့ ဖြစ်သည်။

Leave a Comments

- Advertisement -spot_img

Latest article