သျှမ်းပြည်တောင်ပိုင်း အောင်ပန်းမြို့ လျှပ်စစ်မီးပြတ်တောက်နေချိန် ဖယောင်းတိုင်မီးထွန်းရာမှ နေအိမ် မီးလောင်မှု ဖြစ်ပွားခဲ့ကြောင်း စုံစမ်းသိရသည်။
ယမန်နေ့ (ဖေဖော်ဝါရီ ၁၀)ရက် ည ၈ နာရီဝန်းကျင်တွင် အောင်ပန်းမြို့ ၌ လျှပ်စစ်မီးပြတ်တောက်နေချိန် မိုးကောင်းရပ်ကွက် ရှင်လောင်းဝတ်စုံရောင်းသည့်ဆိုင်မှ မီးလောင်မှုဖြစ်ပွားခဲ့ကြောင်း သိရသည်။
“အဲချိန်က မီးပျက်နေတဲ့အချိန်လည်းဖြစ်တယ်။ မီးသွားကူငြိမ်းပေးတဲ့အချိန်မှာပဲ မီးက ပြန်လာတာ။ ဖယောင်းတိုင် မီးကနေပဲ စလောင်သွားတယ် လို့ ပြောတယ်” ဟု အောင်ပန်းမြို့ ပရဟိတ အဖွဲ့ဝင် အမျိုးသားတစ်ဦးက ပြောသည်။
အဆိုပါ မီးလောင်မှုကြောင့် နေအိမ်အပေါ်ထပ် ဆုံးရှုံးသွားပြီး ငွေကြေးအများအပြား ဆုံးရှုံးမှုရှိနိုင်ကြောင်း သိရသည်။
“သူတို့ အပေါ်ထပ်ပဲလောင်သွားတာ။ ငွေ ၁၀ သိန်းလောက်တော့ မီးလောင်သွားတယ်။ ပြီးတော့ မီးခံသေတ္တာလည်း လောင်တယ်။ မီးခံသေတ္တာထဲရှိတဲ့ဟာတွေလည်း မီးထဲပါသွားမယ်ထင်တယ်။ အပေါ်ထပ်တော့ အကုန်ပါသွားတယ်” ဟု အထက်ပါ မီးသွားကူငြိမ်းပေးသည့် အမျိုးသားက ပြောသည်။
အလားတူ လွန်ခဲ့သည့် ဖေဖော်ဝါရီ (၈)ရက်နေ့တွင်လည်း တောင်ကြီးမြို့ ကျောင်းကြီးစုရပ်ကွက်မှာ မီးလောင်မှုဖြစ်ပွားခဲ့သည်။ ထိုမီးလောင်မှုကြောင့် နေအိမ်တစ်ခုလုံး ပြာကြသွားပြီး ဆုံးရှုံးသွားခဲ့ကြောင်း သိရသည်
