သျှမ်းပြည် အရှေ့ပိုင်း တာချီလိတ်မြို့နယ်တွင် မကြာခဏ ပစ္စည်းခိုးယူမှု၊ လုယက်ခံရမှု နှင့် ဓားပြတိုက်မှုများ ပိုမိုဖြစ်ပွားလာတဲ့အတွက် ဒေသခံများ၏ လုံခြုံရေး စိုးရိမ်နေရပြီဖြစ်ကြောင်း သျှမ်းသံတော်ဆင့်ကို ပြောသည်။
“ဒီမှာက နယ်စပ်မြို့ဖြစ်ပြီး လူပေါင်းစုံရှိတယ်လေ။ ဆိုင်ကယ်တွေ ခိုးခံရတယ်။ ဓားပြတိုက်တာ၊ ပစ္စည်းလုတာတွေရော ခဏခဏကို ကြားနေရတာ ဆိုတော့ ကျမတို့အတွက်က လုံခြုံမှု မရှိတော့ဘူး။ ခုဆို အပြင်ထွက် သွားလာရမှာကိုတောင် စိတ်မချရတော့ဘူး။ ညပိုင်းမှ မဟုတ်ဘူး နေ့လည်ပိုင်းလည်း စိတ်မချရတော့ဘူး” ဟု တာချီလိတ်မြို့မှ သက်ကြီး အမျိုးသမီးတစ်ဦးက ပြောသည်။
တာချီလိတ်မြို့တွင် ဆိုင်ကယ်နှင့် အခြားပစ္စည်းများ ခိုးယူခံရမှု၊ လမ်းသွားလမ်းလာများထံမှ ပစ္စည်းလုယူထွက်ပြေးမှုများ မကြာခဏ ဖြစ်ပွားနေသော်လည်း သက်ဆိုင်ရာတာဝန်ရှိသူများ၊ ရဲနှင့် စစ်သားတို့မှ တာဝန်ယူ ဖမ်းဆီး အရေးယူပေးနိုင်ခြင်း မရှိတဲ့အတွက် ပိုမို စိုးရိမ်နေရကြောင်း ဒေသခံများက ဆိုသည်။
တချို့ရပ်ကွက်များတွင် အိမ်ဝိုင်းအတွင်း ရပ်ထားသည့် မော်တော်ဆိုင်ကယ်များလည်း ခိုးယူခံနေရကြောင်း၊ လမ်းသွားလမ်းလာများအား ရိုက်နှက်ကာ ပစ္စည်းလုယူမှုများလည်း ပိုမို အဖြစ်များလာကြောင်း သိရသည်။
“အိမ်ဝိုင်းထဲထိ ဝင်ခိုးတာ။ အိမ်နောက်ဘေး လမ်းလည်း မရှိဘူး၊ အိမ်က လမ်းအပိတ်ပဲ၊ အဲ့တာကို ဝင်ခိုးသွားတယ်။ CCTV ထဲ တွေ့တယ်၊ ဒါပေမယ့် မဖမ်းမိဘူး။ ရဲတွေ စစ်သားတွေကလည်း ပြည်သူကို ဘာမှ တာဝန်မယူပေးနိုင်တော့ဘူး” ဟု အထက်ပါ အမျိုးသမီး က ဆက်ပြောသည်။
ဆိုင်ကယ်နှင့် အခြားပစ္စည်းခိုးယူခံရမှုသည် ညပိုင်းတွင် အဖြစ်များပြီး ပစ္စည်းလုယက်မှုများမှာ ညပိုင်းအပြင် နေ့လည်ပိုင်း လူအသွားအလာ နည်းသည့်နေရာများတွင် ဖြစ်ပွားနေကြောင်း သိရသည်။
တာချီလိတ်မြို့တွင် ပြီးခဲ့သည့် ဖေဖော်ဝါရီ ၈ ရက်နေ့တွင် ဂေါက်ကွင်းအနီး ဆိုင်ကယ်လုယူ ရိုက်နှက်မှု ဖြစ်ပွားခဲ့ပြီး လူသေဆုံးမှုအထိ ဖြစ်ခဲ့ကြောင်း သိရသည်။
Leave a Comments