သျှမ်းပြည် တောင်ပိုင်း ဆီဆိုင်မြို့နယ်သို့ ရောက်ရှိခိုလှုံနေသည့် ကရင်နီပြည်မှ စစ်ဘေးရှောင်များ စားနပ်ရိက္ခာ လိုအပ်နေကြောင်း သတင်းရရှိသည်။
ဆီဆိုင်မြို့နယ်အတွင်းရှိ စစ်ရှောင်စခန်း၊ ဘုန်းကြီးကျောင်း၊ ဓမ္မာရုံ၊ ဆိုက်ခေါင်စံပြကျေးရွာ၊ ရေဖြူကျေးရွာ၊ နောင်မွန်၊ ဘန်းယဉ်နှင့် အခြားနေရာတို့တွင် ကရင်နီပြည်မှ စစ်ဘေးရှောင်များ ရောက်ရှိခိုလှုံနေကြတာဖြစ်ပြီး နေ့စဉ်စားသောက်ရန် ဟင်းသီးဟင်းရွက်များ လိုအပ်နေတာဖြစ်ကြောင်း စစ်ရှောင်ကူညီသူများက ပြောသည်။
“အဓိကတော့ နေ့တိုင်းစားသောက်ဖို့ ဟင်းသီးဟင်းရွက်တွေ လိုတယ်။ ဆန်ကတော့ ဒီလကုန်လောက်အထိ ရှိထားတယ်။ တစ်ရက်ကို ထမင်း ၃ နပ် ကျွေးတာဆိုတော့ နေ့တိုင်း စားသောက်ဖို့ ဟင်းကတော့ အခက်ခဲဖြစ်တယ်။ သူတို့တွေက ဘယ်လောက် ကြာကြာ နေကြရဦးမလဲ မသိဘူး။ စစ်ရှောင်တွေက သက်ကြီးရွယ်အိုတွေ အများစုပဲ” ဟု ဆိုက်ခေါင်စံပြကျေးရွာမှ စစ်ရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုစစ်ရှောင်များသည် ပြီးခဲ့သည့် ဇန်နဝါရီလအတွင်း ကရင်နီပြည်တွင် စစ်ကောင်စီနှင့် ပြည်သူ့ကာကွယ်ရေးတပ်ဖွဲ့တို့ တိုက်ပွဲပြင်းထန်မှုကြောင့် သျှမ်းပြည်တောင်ပိုင်း ဆီဆိုင်မြို့နယ်အတွင်းသို့ ထွက်ပြေးတိမ်းရှောင် ခိုလှုံခဲ့ကြောင်းသိရသည်။
ယခုရက်ပိုင်းအတွင်း စစ်ရှောင်တချို့ နေရပ်ပြန်သွားသော်လည်း ယမန်နေ့ (ဖေဖော်ဝါရီ ၉)ရက်နေ့အထိ ဆီဆိုင်မြို့နယ်အတွင်း ကရင်နီပြည်မှ စစ်ရှောင်လာသူ တစ်သောင်းဝန်းကျင် ကျန်ရှိနေဆဲဖြစ်ကြောင်း သိရသည်။
“ဒီတစ်ပတ်အတွင်း တစ်ရက်နည်းနည်း ပြန်သွားကြတယ်။ ဦးဇင်းတို့ စောင့်ရှောက်ထားတဲ့ စခန်း ၃ ခု ကနေလည်း ထက်ဝက်လောက်ကို ပြန်သွားပြီ။ အများစု ကျန်တာက ရေဖြူရွာတို့၊ တခြားနေရာတွေ ကျန်တယ်။ တချို့ကလည်း အသိမိတ်ဆွေအိမ်နဲ့ အိမ်ငှားနေကြတာလည်း ရှိနေသေးတယ်” ဟု ဆီဆိုင်မြို့မှ ဦးဇင်းတစ်ပါးမှ မိန့်ကြားသည်။
ထို ဆီဆိုင်မြို့နယ်တွင် ကရင်နီပြည်မှ စစ်ဘေးရှောင်များအပြင် သျှမ်းပြည် တောင်ပိုင်းနှင့် ကရင်နီပြည် နယ်စပ်ရှိ ဖယ်ခုံမြို့မှ စစ်ဘေးရှောင်တချို့လည်း လာရောက်ခိုလှုံနေကြကြောင်း စစ်ဘေးရှောင်ကူညီသူများထံမှ သိရသည်။
သျှမ်းပြည် တောင်ပိုင်း ပင်လောင်းမြို့နယ်အတွင်းတွင်လည်း စစ်ဘေးရှောင် ၅ ထောင်ဝန်းကျင် ကျန်ရှိနေဆဲဖြစ်ကြောင်း သိရသည်။
