သျှမ်းပြည် မြောက်ပိုင်း ကျောက်မဲမြို့နယ် ဟူးကွက်ကျေးရွာတွင် ဒေသခံ (၃)ဦး မိုင်းထိခဲ့ပြီး (၂)ဦး ပွဲချင်းပြီး သေဆုံးခဲ့ကြောင်း သတင်းသိရသည်။
ယမန်နေ့ (ဖေဖော်ဝါရီ ၇)ရက် နေ့လည်ပိုင်း (၁၂)နာရီဝန်းကျင်က ဟူးကွက်ကျေးရွာခံ (၃)ဦး လက်ဖက်ခြံထဲတွင် မိုင်းထိခဲ့ပြီး သေဆုံး ၊ ဒဏ်ရာရရှိခဲ့တာဖြစ်ကြောင်း သိရသည်။
“မိုင်းထိပြီး ၂ ယောက် သေသွားတာ။ ဒဏ်ရာက တော်တော်ပြင်းလို့ ပွဲချင်းပြီး သေဆုံးသွားတယ်လို့ ပြောတယ်။ သက်ကြီးတစ်ယောက်ကတော့ မသေဘူး၊ ဒဏ်ရာတော့ ပြင်းတယ်တဲ့။ ဘယ်လိုဖြစ်ပြီး မိုင်းထိတာလဲတော့ သေခြာ မသိရဘူး။ လက်ဖက်ခြံထဲမှာဖြစ်သွားတာလို့ပဲ ကြားတာ” ဟု ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
သေဆုံးသူ နှစ်ဦးမှာ မိုင်းကျော်လင်းထွေး အသက် (၁၇)နှစ် နှင့် မိုင်းလှမင်းဌေး အသက် (၁၅)နှစ် တို့ဖြစ်ကြောင်း၊ မိုင်းလှမင်းဌေး၏ ဖခင်ဖြစ်သူ ဦးအိုက်ဌေးမှာ မိုင်းစထိမှန် ဒဏ်ရာ ရရှိခဲ့ကြောင်း သိရသည်။
ပြီးခဲ့သည့်နှစ် စက်တင်ဘာလတွင်လည်း ဟူးကွက်ဒေသခံ (၂)ဦး ခြံသွားစဉ် မိုင်းနင်းမိကာ ဒဏ်ရာ ပြင်းထန်စွာရရှိခဲ့သည်။
ထို့အပြင် ထိုဒေသတွင် ၂၀၂၁ ခုနှစ်အတွင်းက တိုင်းရင်းသား လက်နက်ကိုင်တပ်များ ဖြစ်သည့် တပ်ပေါင်းစု (TNLA ၊ SSPP/SSA) နှင့် RCSS/SSA တို့ တိုက်ပွဲပြင်းထန်စွာ ဖြစ်ပွားခဲ့သည့် နေရာဒေသဖြစ်ကြောင်းလည်း သိရသည်။
