သျှမ်းပြည်တောင်ပိုင်း အောင်ပန်းမြို့ ရပ်ကွက်(၄)တွင်နေထိုင်သည့် ပြည်သူများကို စစ်ကောင်စီ အုစ်စုမှ ဧည့်စာရင်း လိုက်လံစစ်ပြီး ဒေသခံ (၄) ဦးကို ဖမ်းဆီးသွားကြောင်း စုံစမ်းသိရှိရသည်။
လွန်ခဲ့သည့် ဖေဖော်ဝါရီ (၄) ရက် ညပိုင်းတွင် စစ်ကောင်စီ အုပ်စုမှ အောင်ပန်းမြို့ရှိ ကိုကျော်စိုး လက်ဖက်ရည်ဆိုင် အတွင်းသို့ ဧည့်စာရင်း လာရောက်စစ်ဆေးပြီး အလုပ်လာလုပ်သည့်လူငယ် (၃) ဦးနှင့် အိမ်ရှင် (၁) ဦးကိုပါ ဖမ်းဆီးသွားကြောင်း သိရသည်။
“ အိမ်ရှင်ရဲ့သားကို အရင်သွားရှာတာတဲ့။ သားမတွေ့လို့ဧည့်စာရင်းစစ်တာ။ ဧည့်စာရင်း ထဲမပါတဲ့သူတွေလည်းရှိနေတော့ ဧည့်စာရင်း မတိုင်ထားလို့ဆိုပြီး သူတို့ဆိုင်က အလုပ်သမားနဲ့ အိမ်ရှင်ကို ဖမ်းသွားတာ။ ညဘယ်ချိန် ဖမ်းသွားလဲတော့ မသိဘူး။ ပြီးခဲ့တဲ့ (၃) ရက်လောက်ဘဲ ရှိသေးတယ် ဖမ်းခံရတာ” ဟု အောင်ပန်မြို့ ဒေသခံ အမျိုးသားတစ်ဦးက ပြောသည်။
အောင်ပန်းမြို့တွင် နေ့စဉ်ဆက်တိုက် စစ်ဆေးမှုများရှိနေသဖြင့် ဒေသခံများကစိုးရိမ်နေကြပြီး သွားလာမှုများကို ကြောက်ရွံ့နေကြကြောင်းသိရသည်။
“ ဒီလိုအချိန်မှာတော့ ကျနော်တို့လည်း ဘာမှ သိပ်မလုပ်ရဲဘူး။ ဒီတိုင်းပဲ သွားလာနေရတာ။ အေးဆေးပဲနေရတာပေါ့။ သူတို့က ဖုန်းတွေစစ်တယ်။ ဘာညာစစ်တယ်။ ကိုယ်တွေလည်း မပါသွားဖို့ ဆင်ခြေပြီးနေနေရတယ်။ အမြဲစိုးရိမ်နေရတယ်။ ကြောက်စိတ်ပြန်ဝင်နေသလိုဖြစ်တာပေါ့” ဟု ဒေသခံ အမျိုးသား တစ်ဦးက ဆိုသည်။
လွန်ခဲ့သည့် ဇန်နဝါရီ ၁၀ ရက် မနက်ပိုင်းတွင်လည်း စစ်ရှောင်များကို ကူညီပေးနေသည့် အမျိုးသားတစ်ဦးကိုလည်း စစ်ကောင်စီက ဖမ်းဆီးသွားပြီး ဇန်နဝါရီ ၃၁ ရက်နေ့က ပြန်လွတ်ပေးခဲ့ကြောင်းသိရသည်။
အလားတူ ဇူလိုင်လအတွင်းက ဖမ်းဆီးခံရသည့် အောင်ပန်းမြို့ ပရဟိတ အလုပ်လုပ်သည့် အမျိုးသား ၂ ဦးကိုလည်း ယနေ့ထိတိုင်းဖမ်းဆီးထားပြီး ဖေဖော်ဝါရီ ၄ ရက်နေ့တွင် အကြမ်းဖက်မှုဖြင့် အမှုဖွင့်ခံထားရပြီး ထောင်ဒဏ် (၇) နှစ်ကျခံရကြောင်းသိရသည်။
