သျှမ်းပြည်တောင်ပိုင်း ကာလိမြို့ ရှမ်းစာပေနှင့် ယဉ်ကျေးမှု အဖွဲ့မှ ဦးဆောင်ပြီး သျှမ်းပြည်အမျိုးသားနေ့အထိမ်းမှတ် အတွက် လူငယ်များကို စုစည်းပြီး အားကစားပွဲကျင်းပ ခဲ့ကြောင်း စုံစမ်းသိရှိရသည်။
ယမန်နေ့ (ဖေဖော်ဝါရီ ၄) ရက် မနက် ၉ နာရီဝန်းကျင်ကစပြီး အခမ်းအနားကို စတင်ဖွင့်လှစ်ခဲ့ပြီး လူငယ်များ စွမ်းရည်မြှင့်တင်ရေး နှင့် လူငယ်အချင်းချင်းကြား ဆက်သွယ်မှုအားကောင်းလာစေသည့် ရည်ရွယ်ချက်ဖြင့် ပြုလုပ်ခဲ့ကြောင်းသိရသည်။
“လူငယ်တွေကို စွမ်းရည်မြင့်တင်ပေးချင်တယ်။ ပြီးတော့ အားကစားတော်တဲ့သူတွေကိုလည်း ပို့ပေးချင်တာပေါ့။ နောက်တစ်ခုတော့ လူငယ်တွေအချင်းချင်းအကြာမှာ ဆက်သွယ်မှုအားကောင်းလာစေချင်တယ်။ တစ်မြို့နဲ့ တစ်မြို့ကြား လူငယ်တွေ ပိုပြီးသိကျွမ်းလာမယ်ဆိုရင် ဒါက ကျနော်တို့ သျှမ်းလူမျိုးအတွက် ဂုဏ်ယူစရာတစ်ခုဖြစ်လာမယ်” ဟု အစီစဉ်တွင် ပါဝင်လှုပ်ရှားသည့် အမျိူးသားတစ်ဦးက ပြောသည်။
ကာလိမြို့တွင် ကိုဗစ် -၁၉ ပိုးတွေ့လူနာ မရှိသောကြောင့် အားကစားပွဲကိုကျင်းပရကြောင်း အစီစဉ်တွင် ပါဝင်သည့် အထက်ပါ အမျိုးသားက ပြောသည်။
အဆိုပါ အားကစားပွဲကို ကျင်းပရာတွင်လည်း ဒေသခံ များတစ်ချို့က ကိုဗစ် -၁၉ ပိုးတွေ့လူနာ ထပ်တွေ့ရှိလာမှာကို စိုးရိမ်းနေလျက်ရှိကြောင်း သိရသည်။
“ နည်းနည်းတော့ ကြောက်တာပေါ့။ ကျမတို့ ကာလိမှာ ကိုဗစ် ပိုးတွေ့လူနာတော့ မရှိသလောက် နည်းသွားပြီးလေ။ တစ်ခြားမြို့ကလာတဲ့သူတွေကနေဘဲ ပြန်ပွားလာမှာကိုတော့ စိုးရိမ်စိတ်တော့ ရှိတာပေါ့” ဟု ကာလိမြို့ ဒေသခံအမျိုးသမီး နန်းလောဝ်က ပြောသည်။
လာမည့် ဖေဖော်ဝါရီ ၇ ရက်နေ့တွင် သျှမ်းပြည်အမျိုးသားနေ့၏ (၇၅) နှစ်ပြည့် နေ့ဖြစ်ကြောင်းသိရသည်။
