သျှမ်းတောင် ကာလိမြို့တွင် ယမန်နေ့ ( ဒီဇင်ဘာလ ၁၂ )ရက် မနက်ပိုင်း၌ ကာလိပြည်သူ့စစ်အဖွဲ့ တပ်မဟာအမှတ် (၇) မှ ကာလိဈေးသည် အမျိုးသမီး (၂)ဦးကို သွေးထွက်သည်အထိ ရိုက်နှက်မှု ပြုလုပ်ခဲ့ကြောင်း သတင်းသိရသည်။

ဖြစ်စဥ်မှာ ကာလိမြို့ အမှတ် ၁ ရပ်ကွက်တွင်ရှိသည့် ဈေးဟောင်းနေရာအတွင်းတွင် ဈေးရောင်းနေသူများကို ဈေးသစ်နေရာသို့ ပြောင်းရွှေ့ရောင်းချရန် ကာလိပြည်သူ့စစ်အဖွဲ့ တပ်မဟာ အမှတ် (၇) မှ တပ်သားများ လာရောက် ပြောဆိုနေချိန် ဈေးသည်များက ၎င်းတို့၏ အခက်အခဲကို ပြောပြရာ ပြည်သူ့စစ်အဖွဲ့မှ အသက် ၆၀ ကျော်နှင့် အသက် ၅၀ ကျော် အမျိုးသမီးဈေးသည် (၂)ဦးကို သွေးထွက်သည်အထိ ရိုက်နှက်ခဲ့ကြောင်း သိရသည်။

“အမျိုးသမီး ၂ ဦးက ဒဏ်ရာတော်တော်များတယ်။ အသက် ၆၀ ကျော်က လက်ထိပ်ခတ်ခံရတယ်။ လက်ထိပ်ကို စောင့်ဆွဲလိုက်တော့ အသားစတွေ လှန်သွားတယ်။ အသက် ၅၀ ကျော် အမျိုးသမီးကတော့ လက်သီးနဲ့ထိုးခံရတယ်။ ရင်ဘတ်၊ နားထင်နဲ့ လည်ပင်း ထိုးခံရတယ်။ အသက်ရှူရင် အောင့်နာနေတယ်။ ဒါပေမယ့် ဆေးကုသမှုမရဘူး။ သက်ဆိုင်ရာကလည်း တာဝန်မယူဘူး” ဟု ကာလိဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိ ဒဏ်ရာပြင်းထန်စွာရရှိသည့် အမျိုးသမီး (၂)ဦး ဆေးကုသရန်အတွက် သက်ဆိုင်ရာ တာဝန်ရှိသူကို သွားရောက်ပြောဆိုခဲ့သော်လည်း တာဝန်ရှိသူမှ တာဝန်ယူမှု၊ တာဝန်ခံမှုမရှိသည့်အပြင် ကာလိ စျေးသူ၊ စျေးသားများကိုလည်း တစုံတရာမျှ လာရောက်ပြောဆိုခြင်း မရှိခဲ့ပေ။

“အသက် ၆၀ အမျိုးသမီးက စျေးသစ်ကိုသွားရင် အဆင်မပြေဘူး။ ခက်ခဲတယ်ပြောလို့ ပြည်သူ့စစ်က လက်ထိပ်ခတ်လိုက်တာ။ နောက်တယောက်က ဒီလို လက်ထိပ်မခတ်နဲ့ အာဏာမသုံးနဲ့ပြောလို့ ပြည်သူ့စစ်က လက်သီးနဲ့ အကြိမ်ကြိမ်ထိုး လှဲကျတဲ့အထိပဲ” ဟု မျက်မြင်တွေ့ရှိသည့် အသက် ၅၀ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ ရုန်းရင်းဆန်ခတ်ဖြစ်နေချိန်တွင် လူငယ်များနှင့် ရပ်ကွက်လူကြီးတချို့မှ ရောက်လာပြီး လက်ထိပ်ကို ဖြည်ပေးရန် တောင်းဆိုရာ ပြည်သူ့စစ်တပ်ဖွဲ့တို့က လက်ထိပ်ကို ဆောင့်ဆွဲပြီး ဖြုတ်လိုက်သဖြင့် လက်ထိပ်ခတ် ခံထားရသည့် အမျိုးသမီး၏ ဘယ်ဖက်လက်တစ်ခုလုံးထုံကျင်သွားပြီး အသားများလည်း လန်ထွက်သွားကြောင်း သိရသည်။

ဈေးအတွင်းသို့ ရောက်လာပြီး အမျိုးသမီးဈေးသည်များကို ရိုက်နှက်မှုများပြုလုပ်ခဲ့သည့် ကာလိပြည်သူ့စစ်တို့ ကြောင့် ဈေးအတွင်း အခွန်ကောက်နေသည့် အမျိုးသားလည်း ကြောက်လန့်ပြီး သတိလစ်သွားသည့်အတွက် လက်ရှိတွင် ဆေးရုံတင်ထားရကြောင်း ဒေသခံများက သျှမ်းသံတော်ဆင့်ကို ပြောသည်။

ပြည်သူ့စစ်တပ်ဖွဲ့တို့မှ လက်နက်အပြည့်အစုံဖြင့် ဈေးသူ/ဈေးသားများကို နိုင်ထက်စီးနင်း မတရားပြုလုပ်ရိုက်နှက် ခြင်းနှင့် ပတ်သက်ပြီး ပြည်သူများနှင့် ဈေးသူဈေးသားများ စုပေါင်းကာ ကာလိပြည်သူ့စစ် တပ်မဟာ အမှတ် ၇ ဌာနချုပ်သို့ သွားရောက်ခဲ့သော်လည်း ဝင်ခွင့်မပေးသည့်အပြင် လက်ခံစကားပြောခြင်းလည်း မရှိကြောင်း ဒေသခံများက ပြောသည်။

ဈေးသို့ရောက်လာသည့် ကာလိပြည်သူ့စစ်တပ်ဖွဲ့ တပ်မဟာ အမှတ် (၇)သည် စုစုပေါင်း အင်အား ၂၀ ဝန်းကျင်ခန့်ရှိနေပြီး သေနတ်များကိုယ်စီနှင့် ကာလိပြည်သူ့စစ် ယူနီဖောင်းများ ဝတ်ထားကြောင်းလည်း သိရသည်။

ထိုကဲ့သို့ ပြုမူဆောင်ရွက်ခြင်းနှင့်ပတ်သက်ပြီး ကာလိပြည်သူ့စစ် တပ်မဟာ အမှတ်(၇) ကို ဆက်သွယ်မေးမြန်းရန် ကြိုးစားခဲ့သော်လည်း အဆက်အသွယ်မရရှိခဲ့ပါ။