၂၀၁၈ မေလ က အစိုးရထောင်မှ လွတ်မြောက်လာသည့် သျှမ်းပြည်တပ်မတော် SSPP/SSA မူစယ်ခရိုင် အုပ်ချုပ်ရေးမှူးဆင့် ရှိ စဝ်စံမြင့်သည် ယနေ့ နံနက်ပိုင်းတွင် မန္တလေး ဆေးရုံတွင် ကွယ်လွန် သွားသည်ဟု သတင်းရရှိသည်။
၂၀၁၈ ခု သြဂုတ်လ ၂၀ မန္တလေး ဆေးရုံတွင် အသည်းခြောက်ရောဂါဖြင့် ကွယ်လွန် အနိစ္စရောက်သွားကြောင်း မိသားစု အသိုင်းအဝိုင်းက ပြောသည်။
“မူစယ်မှာ ၂ နှစ်ကြာ ချုပ်နှောင်ထားပြီး လားရှိုးအကျဉ်းထောင်ကို ပို့တာ။ လားရှိုးထောင်ကနေ မေလ ကလွတ်လာတယ်။ ဒီမနက်ဆုံးသွားတယ်။ သူဆုံးသွားတာ မိသားစုအတွင်း ဆုံးရှုံးမှုကြီးတင်မကဘူး။ တပ်အတွက် ဆုံးရှံုးမှု တခုဘဲ” – ဟု ညီဖြစ်သူ သျှမ်းပြည်တပ်မတော် SSPP/SSA ပြောခွင့်ရ ဗိုလ်မှူးစိုင်းဘုန်းဟန် က ပြောသည်။
အသက် ၄၀ ခန့်ရှိ စဝ်စံမြင့် ကွယ်လွန်ချိန် ဇနီး နှင့် အတူ သားတဦး ၊ သမီး တဦး ကျန်ရစ်ခဲ့သည်။
စဝ်စံမြင့်၏ ကြွင်းကျန်ရုပ်အလောင်းကို မန္တလေးမှ သျှမ်းပြည်သို့ သယ်ယူကာ ဇာတိမြေတွင် သင်္ဂြိုဟ်မည်ဟုလည်း မိသားစုအသိုင်းအဝိုင်းက ပြောသည်။
“ထိန်းသိမ်းခံရစဉ် ရိုက်နှက်စစ်ဆေးခံရတယ်။ ဒါမယ့် သေဆုံးတာက အတွင်းကြေ နဲ့မဟုတ်ဘူး ။ ပြီးတော့ သူက အရက်သမားလဲမဟုတ်ဘူး။ အသဲခြောက် ရောဂါနဲ့ ဆုံးတာ ။ သူထောင်ကျချိန် ဆေးထိုးခံရတယ်ပြော တယ်။ အခု သေဆုံးမှုက ရိုးသားရဲ့လား စဉ်းစားစရာပေါ့ ။” – ဟု ၄င်း၏ မိတ်ဆွေတဦးကပြောသည်။
စဝ်စံမြင့်သည် သျှမ်းပြည်တပ်မတော် SSPP/SSA ၏ မူစယ်မြို့ ဆက်ဆံရေးရုံးတွင် တာဝန်ကျချိန်၂၀၁၆ မတ်လ တွင် မူစယ်မြို့မှ ကွတ်ခိုင်မြို့သို့ အသွား လမ်းခရီးတွင်အစိုးရတပ်မတော်မှ ဖမ်းဆီးခြင်းခံရသည်။ ၂၀၁၈ မေလတွင် လားရှိုးအကျဉ်းထောင်မှ ပြန်လည်လွတ်လာခြင်းဖြစ်သည်။
Leave a Comments