သျှမ်းပြည်မြောက်ပိုင်း နမ့်ခမ်းမြို့လယ်ခေါင် သို့ တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) တပ်သားများ ရောက်ရှိလာသဖြင့် အခွန်ကောက်ခံသည့် ကဒ်များ လိုက်ဝေနေကြောင်း စုံစမ်းသိရသည်။
ယနေ့ ဖေဖော်ဝါရီ (၄) ရက် မနက် (၉) နာရီခန့်က (TNLA) တပ်သားများသည် နမ့်ခမ်းမြို့ လယ်ခေါင်ရှိ မြို့မစျေး ပတ်ဝန်းကျင် တွင် အင်အားအများအပြား ရောက်ရှိလာပြီး TNLA တံဆိပ်ပါပြီး၊ မိုင်းကိုအောင် အခွန်များဦးစီးဌာန ဆိုသည့် စာသားပါကဒ် လိုက်လံဝေနေသဖြင့် ဒေသခံများ စိုးရိမ်ထိတ်လန့်နေကြကြောင်း ဒေသခံများက ပြောဆိုကြသည်။
“စျေးနားက သူတို့ အခွန်ကဒ်တွေကို လိုက်ဝေပေးနေတယ်။ သူတို့က မြို့ထဲထိ ဘယ်လို ဝင်လာတာလဲ။ စကစ တပ်တွေ ရှိတယ်။ စျေးအနီးနားလည်း ရဲစခန်းရှိတယ်။ပြည်သူတွေအတွက်တော့ လုံးဝလုံခြုံမှု မရှိတော့ဘူး” ဟု နမ့်ခမ်းဒေသခံ လူငယ် တစ်ဦး ကပြောသည်။
TNLA တပ်သား (၅၀)ခန့်သည် စစ်ဝတ်စုံအပြည့် လက်နက်များကိုင်ဆောင်လာပြီး စျေးအတွင်းသို့ ရောက်ရှိလာသည့် အတွက် ဆိုင်များလည်း ရုတ်တရက် ပိတ်ကာ ထွက်ပြေးနေရကြောင်းသိရသည်။
“စျေးပေါက်အကုန်လုံးပဲ စောင့်နေကြတယ်။တစ်ချို့လည်းဆိုင်တွေ ထားပြီး ပြေးကြတယ်။ တစ်ချို့လည်း အလျင်အမြန် သိမ်းကြတယ်။ ဝရုန်းသုန်းကား ဖြစ်ကုန်ကြတယ်။ပြည်သူတွေ ထိတ်လန့်ကုန်ကြတယ်” ဟု နမ့်ခမ်းဒေသခံ စျေးသည်အမျိုးသမီး တစ်ဦး ကပြောသည်
ထိုကိစ္စ နှင့် ပတ်သက်ပြီး TNLA ပြောရေးဆိုခွင့်ရှိသူ ဗိုလ်မှူးမိုင်းအိုက်ကျော်ကို အကြိမ်ကြိမ်ဆက်သွယ်ခဲ့ သော်လည်း မရရှိခဲ့ပေ။
ပြီးခဲ့သည့် ဇန်နဝါရီ (၄) ရက် နေ့လည် (၁) နာရီဝန်းကျင်က မြို့မစျေးထဲ အခွန်လာကောက်သည့် (TNLA) တပ်သားများ ပစ်ခတ်မှုဖြစ်ပွားပြီး အမျိုးသား (၂) ဦးသေဆုံးသွားပြီးနောက် ဇန်နဝါရီ (၅) ရက်မှာ ဝတ်စုံအပြည့်ဖြင့် နမ့်ခမ်းမြို့မစျေးထဲ ပြန်လည်ရောက်ရှိလာကြောင်း သိရှိရသည်။
လက်ရှိ နမ့်ခမ်းမြို့နေ ပြည်သူများသည် လုံခြုံမှု မရှိသည့်အပြင် အားကိုးရမည့် စစ်တပ်များလည်း မရှိတော့သည့်အတွက် ဒေသခံများ နေ့စဉ်နှင့် အမျှ စိုးရိမ်ထိတ်လန့်နေကြကြောင်း နမ့်ခမ်းမြို့ခံများက ပြောဆိုကြသည်။
Leave a Comments