သျှမ်းပြည်တောင်ပိုင်း ဟိုပုံးမြို့တွင် တပ်မတော်က စစ်တပ်ထောက်ခံပွဲ ပြုလုပ်ခဲ့သော်လည်း မြို့တွင်းမှာတော့ လူစည်ကားခြင်း မရှိခဲ့ကြောင်း စုံစမ်းသိရှိရသည်။
ယနေ့ ဖေဖော်ဝါရီ (၁)ရက်နေ့တွင် စစ်အာဏာသိမ်း (၁)နှစ်ပြည့်သည့် အနေဖြင့် ပြည်သူများ အသံတိတ်သပိတ်ပြုလုပ်နေစဉ် စစ်ကောင်စီဘက်က စစ်တပ်ထောက်ခံပွဲ ပြုလုပ်ခဲ့ကြောင်း သိရှိရသည်။
“(စစ်ကောင်စီ)သူတို့ လူတွေ လာချသွားတယ်။ အယောက် (၅၀)လောက် ရှိမယ်ထင်တယ်။ ကား (၄)စီးနဲ့ လာချသွားတယ်” လို့ ဟိုပုံးဒေသခံ တစ်ဦးက ပြောသည်။
ယနေ့ နေ့လည် (၁)နာရီဝန်းကျင်က ဟိုပုံး မွေတော်ဘုရားတွင် စစ်တပ်ဘက်က ထောက်ခံပွဲ ပြုလုပ်ရန်အတွက် လူအင်အား (၅၀)ခန့် လာချထားကြောင်း ဒေသခံများက ပြောဆိုကြသည်။
“သူတို့ ထောက်ခံပွဲက လုပ်ပေမယ့် မြို့ထဲ လူတွေလည်း မရှိဘူး။ သူတို့ ခြိမ်းခြောက်ထားတဲ့အတွက်ကြောင့် စျေးထဲကတော့ စျေးဆိုင်တွေ ဖွင့်ထားတာ တွေ့ရတယ်” ဟု ဟိုပုံးမြို့ခံ တစ်ဦးက ပြောသည်။
ဖေဖော်ဝါရီ (၁)ရက်နေ့တွင် တစ်တိုင်းပြည်လုံး အသံတိတ်သပိတ် ပြုလုပ်ရန် စီစဉ်ဆောင်ရွက်နေစဉ် စစ်တပ်ဘက်က တပ်ထောက်ခံပွဲပြုလုပ်ခြင်း၊ စျေးဆိုင်များကို မဖွင့်ပါက ဥပဒေနှင့်အညီ အရေးယူမည်ဖြစ်ကြောင်းလည်း ခြိမ်းခြောက် ပြောဆိုခဲ့သည်ဟု သိရသည်။
Leave a Comments