သျှမ်းပြည်မြောက်ပိုင်း မုံးကိုးမြို့နယ်အတွင်း ဖြစ်ပွားသည့် ကိုးကန့်တပ်မတော် (MNDAA) နှင့် တိုက်ပွဲတွင် အထိနာသည့် စစ်ကောင်စီတပ်သည် မိုင်းယော်တိုက်နယ်ရှိ မဟာမိတ်တပ်ဖွဲ့ကို တိုက်လေယာဥ်ဖြင့် အကြမ်းဖက် ထိုးစစ်ဆင်နေကြောင်း သတင်းသိရသည်။
ပြီးခဲ့သည့် ဇန်နဝါရီလ ၂၈ ရက်နေ့ မိုင်းယော်တိုက်နယ်နှင့် မိုင်းဟက်ကြား လုံမွန်းကျေးရွာအုပ်စုအတွင်း သွားလာလှုပ်ရှားနေသည့် မဟာမိတ်တပ်ဖွဲ့တို့၏ စခန်းနေရာများကို စစ်ကောင်စီဘက်မှ တိုက်လေယာဥ်ဖြင့် ထိုးစစ်ဆင်နေကြောင်း မိုင်းယော်တိုက်နယ်မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“မုံးကိုးဘက်က အထိနာပြီး ဆုတ်လာတဲ့ စစ်ကောင်စီတွေက လုံမွန်းကျေးရွာအနီးမှာ မဟာမိတ်တွေ ဝိုင်းထားခံရ တယ်၊ နောက်တော့ စစ်ကောင်စီက တိုက်လေယာဥ်နဲ့ လာတိုက်ကူပြီး သူတို့လူကို ခေါ်ထုတ်သွားတယ်” ဟု ၎င်းက ပြောသည်။
လုံမွန်းကျေးရွာအုပ်စုသည် မြောက်ပိုင်းမဟာမိတ်တို့၏ သွားလာလှုပ်ရှားရာနေရာဖြစ်ပြီး မုံးကိုးဘက်မှ ဆုတ်ခွာ လာသည့် စစ်ကောင်စီတပ်ဖွဲ့တို့ကို ဝိုင်းထားစဥ် တိုက်လေယာဥ်ဖြင့် တိုက်ခိုက်ခြင်းခံရပြီး နှစ်ဦးနှစ်ဖက် ထိခိုက်သေဆုံးမှုများလည်း ရှိကြောင်း သတင်းသိရသည်။
“ကျဆုံးမှု အရေအတွက်တော့ တိတိကျကျမသိရသေးဘူး၊ ဒါပေမဲ့ မြေပြင်မှာ ဝိုင်းထားခံရတဲ့ စစ်ကောင်စီ တပ်သားနဲ့ မဟာမိတ်တပ်သားတွေလည်း ထိခိုက်ကျဆုံးမှုရှိတယ်လို့ ကြားရတယ်၊ စစ်ကောင်စီတွေ တိုက်လေယာဥ်အားကိုးနဲ့ မဟာမိတ်နေရာတော်တော်များများကို လက်နက်ကြီးနဲ့ လေယာဥ်ဗုံးကြဲကြဲခဲ့တယ်” ဟု မိုင်းယော်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
မိုင်းယော်တိုက်နယ်အတွင်း ပျောက်ဆုံးနေသည့် စစ်ကောင်စီတပ်မှ ဗိုလ်ကြီးအဆင့်ရှိသူအရာရှိ ၁ ဦး၊ ဗိုလ် ၁ ဦးနှင့် တပ်ကြပ်ကြီး ၁ ဦးတို့သည် ပြီးခဲ့သည့် ဇန်နဝါရီလ ၂၈ ရက်နေ့မှ ယနေ့ထိ သတင်းအစအန မကြားရသေးကြောင်း သတင်းသိရသည်။
ယင်းအရာရှိ ၃ ဦး ပျောက်ဆုံးနေမှုကြောင့် လုံမွန်းကျေးရွာအုပ်စု အပြင် မိုင်းယော်တိုက်နယ်မှ တခြား သောနေရာများတွင် သွားလာလှုပ်ရှားနေသည့် မဟာမိတ်တပ်ဖွဲ့များလည်း တိုက်လေယာဥ်ဖြင့် ဗုံးကြဲ တိုက်ခိုက်ခံနေရကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“သူတို့(စကစ)အရာရှိတွေ ဒီနယ်ထဲမှာ ပျောက်နေတယ်ဆိုတဲ့ အငြိုး၊ မုံးကိုးဘက်က စစ်ရှုံးတဲ့ အငြိုးနဲ့ ဇန်နဝါရီလ ၂၈ ရက်ကတည်းက ဒီမိုင်းယော်ထဲကို ထိုးစစ်ဆင်နေတာ၊ ကိုးကန့်တပ်ဖွဲ့ သင်တန်းပေးတဲ့နေရာကို တိုက်လေယာဥ်နဲ့ ဗုံးကြဲလို့ သင်တန်းစခန်းက လူတွေ တော်တော်များများ ကျဆုံးရတယ်လို့လည်း ကြားရတယ်” ဟု မိုင်းယော်မြို့ မှ ဒေသခံတစ်ဦးက သျှမ်းသံတော်ဆင့်ကို ပြောသည်။
လက်ရှိ မိုင်းယော်တိုက်နယ်အတွင်းတွင် သွားလာလှုပ်ရှားနေသည့် တိုင်းရင်းသားလက်နက်ကိုင်များအနေဖြင့် ကချင်တပ်မတော် (KIA)၊ ကိုးကန့်တပ်မတော် (MNDAA)၊ တအာန်းအမျိုးသားတပ်မတော် (TNLA)၊ သျှမ်းတပ်မတော် (SSPP/SSA) နှင့် ရခိုင်တပ်မတော် AA တို့အပြင် စစ်ကောင်စီတပ်ဖွဲ့လည်း သွားလာလှုပ်ရှားနေကြောင်း သိရသည်။
