သျှမ်းပြည်မြောက်ပိုင်း နမ့်ခမ်းမြို့တွင်း စစ်ကောင်စီ ထုတ်ကုန်များကို အသုံးမပြုရန်အတွက် နမ့်ခမ်းပျောက်ကြား အဖွဲ့က ထုတ်ပြန်ထားသည့် စာစောင်သည် လူမှုကွန်ရက် စာမျက်နှာပေါ် ပျံ့ နှံ့နေကြောင်း စုံစမ်းသိရှိရသည်။

ထိုစာတစ်စောင် ပျံ့ နှံ့ပြီးနောက်ပိုင်း နမ့်ခမ်းမြို့ရှိ ဆိုင်များတချို့တွင် စစ်ကောင်စီ ထုတ်ကုန် ဘီယာများကို ရောင်းချမှု မရှိတော့ကြောင်း သိရသည်။

“စာကတော့ အွန်လိုင်းပေါ်ပဲ ပျံ့ နှံ့တာ တွေ့တယ်။ ဆိုင်တွေမှာ လိုက်ဖြန့်ဝေနေတာတော့ မသိဘူး။ အဲ့စာကြောင့် တချို့ဆိုရင် စစ်ကောင်စီ ထုတ်ကုန်တွေကို မရောင်းတော့တာရှိတယ်။ တချို့က သူတို့ ပစ္စည်းတွေကို ဆက်ပြီး မယူတော့ဘူး။ စိတ်ပူကြတာတော့ရှိတယ်” ဟု နမ့်ခမ်းမြို့ ဒေသခံ လူငယ် အမျိုးသားတစ်ဦးက ပြောသည်။

နမ့်ခမ်းမြို့ ပျောက်ကြားအဖွဲ့က ထုတ်ထားသည့် စာသည် စစ်ကောင်စီ ထုတ်ကုန် Myanmar ဘီယာများ မတင်ရောင်းရန်၊ ရန်ကုန် – မန္တလေးမြို့ – လားရှိုးမြို့မှ နမ့်ခမ်းအထိ ကားကြီးများ စစ်ကောင်စီထုတ်ကုန်များကို မတင်ပို့ရန်၊ စစ်ကောင်စီကို လိုင်းကြေးပေးပြီး Game ဆိုင်များ၊ လောင်းကစားများ ပိတ်သိမ်းသွားရန်၊ Mytel Sim Card (Wifi) များ ကြေညာရောင်းချခြင်း မပြုလုပ်ရန်အတွက် ထုတ်ပြန်ထားသည်။

ထိုထုတ်ပြန်ချက်တွင် နမ့်ခမ်းမြို့ ပျောက်ကြားအဖွဲ့က ထုတ်ပြန်ထားသော်လည်း ဒေသခံတချို့က နမ့်ခမ်းမြို့ပေါ်တွင် PDF ရှိ၊ မရှိ‌ မသေချာကြောင်း ပြောသည်။

“စာကတော့ နမ့်ခမ်းမြို့ ပျောက်ကျားအဖွဲ့ ဆိုပေမယ့် အခုက မြို့မှာ ပြောက်ကျားအဖွဲ့ရှိလား မသိဘူး။ ရှိလား၊ မရှိဘူးလားဆိုတာ သေချာ မသိရတာ။ ဗုံးပေါက်နေတာတွေလည်းရှိတယ်။ ဒါပေမဲ့ အတည်မပြုနိုင်သေးဘူး” ဟု နမ့်ခမ်းမြို့ အမျိုးသားတစ်ဦးက ပြောသည်။

နမ့်ခမ်းမြို့တွင် လက်နက်ကိုင်တပ်ဖွဲ့ အများအပြားရှိသည့် ဒေသတစ်ခု ဖြစ်သည်။

နမ့်ခမ်းမြို့တွင်လည်း ဖေဖော်ဝါရီ ၁ ရက်နေ့တွင် ဆိုင်ခန်းများ မပိတ်ရဟု စစ်ကောင်စီ တပ်ဖွဲ့များကလည်း ဝန်ခံလက်မှတ် လိုက်လံထိုးခိုင်းနေကြောင်း သိရသည်။