သျှမ်းပြည်တောင်ပိုင်း မိုင်းရှူးမြို့နယ်ရှိ စစ်ကောင်စီတပ်မှ ကားတစ်စီးသည် ယနေ့ (ဇန်နဝါရီ ၂၉)ရက် နေ့လည် ၁နာရီ ဝန်းကျင်တွင် သျှမ်းလူငယ်တစ်ဦးကို ကားဖြင့်တိုက်ကာ လူငယ်သေဆုံးသွားကြောင်း စုံစမ်းသိရသည်။

ယနေ့ နေ့လည် ၁နာရီဝန်းကျင်တွင် မိုင်းရှူးမြို့နယ် ဝမ်လုံပန်စွဲကျေးရွာမှ မင်္ဂလာဆောင် တခုမှအပြန် စိုင်းမောင်ညို (ခ) စိုင်းနော်ခမ်းသည် ခြေလျင်တပ်ရင်း (ခလရ) ၁၄၉ တပ်အနီး စစ်ကောင်စီတပ်သား မောင်းနှင်လာသော ကားက အရှိန်ဖြင့် ဝင်တိုက်သဖြင့် သေဆုံးသွားကြောင်း မျက်မြင်တွေ့ ရသည့် ဒေသခံတစ်ဦးက သျှမ်းသံတော်ဆင့်ကို ပြောသည်။

“စိုင်းနော်ခမ်း ကမင်္ဂလာဆောင်သွားကူပြီး ပြန်လာတာ၊ ခလရ ၁၄၉ နားမှာ သူ့ကားအပေါ်သူတက်ဖို့လုပ်နေချိန် စစ်တပ်ကားတစီးက သူ့ကို ၀င်တိုက်လိုက်တာ ၁၅ ပေလောက်လွှင့်ထွက်သွားတယ်။ ” ဟု ယင်းဖြစ်စဥ်များကို မြင်တွေ့ရသည့် ဒေသခံတစ်ဦးက သျှမ်းသံတော်ဆင့်ကို ပြောသည်။

ကားတိုက်ခံရမှုကြောင့် စိုင်းနော်ခမ်းသည် ဦးခေါင်းကွဲ၊ ခြေထောက်ကျိုး အပြင်းအထန်ဒဏ်ရာရရှိသွားသဖြင့် အနီးရှိတွေ့ဖြစ်စဉ်တွေ့ရှိသူ ပြည်သူလူထုက ၄င်းအား ဆေးရုံသို့ ပို့ဆောင်ပေးခဲ့သည်။ သွေးထွက်လွန်သဖြင့် ဆေးရုံ အရောက် သေဆုံးသွားခဲ့သည်ဟု မိုင်းရှူးဒေသခံများက သျှမ်းသံတော်ဆင့်ကိုပြောသည်။

“သူဆေးရုံရောက်တော့ဆုံးသွားတာ။ ဆေးရုံကို ခလရ ၁၄၉ က ဗိုလ်ကြီးအဆင့်နဲ့ တာဝန်ရှိတစ်ဦး က အရပ်၀တ်နဲ့ လိုက်လာတယ်၊ သူ့မိသားစုဝင်တွေကို ခေါ်တွေ့ပြီး သူတို့တပ်ကားမောင်းဆရာက အရက်မူးလွန်လို့ ဖြစ်သွားတာတဲ့။ သေဆုံးသူဆွေမျိုးဘက်က ကားသမားကို အမှုဖွင့်အရေးယူယူ မယူယူ သူတို့ကတော့ သူတို့ကားသမားကို ပြစ်ဒဏ်ပေးမှာဘဲ တဲ့ ။ ခြိမ်းခြောက်တဲ့လေသံနဲ့လာပြောသွားတယ်။ တာဝန်ယူဖို့တော့ တခွန်းမှ မပြောလာဘူး” ဟု မိသားစုဝင်နှင့် နီးစပ်သူက မြို့ခံလူငယ်တဉီးက ပြောသည်။

ကားတိုက်ခံရမှုကြောင့်သေဆုံးသွားသည့် စိုင်းနော်ခမ်း (အသက် ၂၈ နှစ် )တွင် အသက် ၂ နှစ်အရွယ် သမီးလေးတဉီးရှိပြီး ၄င်းသည်မိသားစုအားလုပ်ကိုင်ကျွေးမွေးနေသူ ဒေါက်တိုင်တဉီးလည်းဖြစ်နေသဖြင့် မိသားစုဝင်အတွက် ဆုံးရှုံးမှုများစွာဖြစ်နေကြောင်းသိရသည်။