သျှမ်းပြည်တောင်ပိုင်း ဖယ်ခုံမြို့နယ်အတွင်း ယနေ့ (ဇန်နဝါရီ ၆)ရက် မနက် ၆နာရီဝန်းကျင်တွင် အာဏာသိမ်းစစ်ကောင်စီ က ရဟတ်ယာဉ်ဖြင့် ဗုံးကြဲတိုက်ခိုက်ခဲ့ကြောင်း သတင်းသိရသည်။
စစ်ကောင်စီတပ်ဖွဲ့တို့ တပ်စွဲနေရာချထားသည့် ဖယ်ခုံမြို့နယ်၊ ကုန်းဆုံကျေးရွာ အနီး ကင်းပုန်းစခန်းနှင့် တပ်စခန်းတို့ကို ကရင်နီမှ ပြည်သူ့ကာကွယ်ရေး မဟာမိတ်တပ်ဖွဲ့တို့ ပူးပေါင်းတိုက်ခိုက်မှု အပြီး စစ်ကောင်စီဘက်မှ လေယာဥ်ဖြင့် ဗုံးကြဲတိုက်ခိုက်ကြောင်း PKPF မှ အဖွဲ့ဝင် တစ်ဦးက သျှမ်းသံတော်ဆင့် ကို ပြောသည်။
“ကျနော်တို့ ဒဏ်ရာရရဲဘော်တွေအတွက် အချိန်ပေးနေစဥ်မှာ စကစဘက်က လေယာဥ်စစ်ကူနဲ့ ဗုံးကြဲတိုက်ခိုက် ခဲ့ပါတယ်၊ ဒီကနေ့ တိုက်ပွဲမှာ ကျနော်တို့ မဟာမိတ်တပ်ဖွဲ့အနေနဲ့ စကစ ၁၀ ကျော် ခြေမှုန်းနိုင်ခဲ့တယ်၊ ကျနော်တို့ ရဲဘော် ၄ ယောက် ဒဏ်ရာရခဲ့တယ်၊ ၂ယောက်တော့ စိုးရိမ်ရတယ်”ဟု ၎င်းက ပြောသည်။
ယနေ့ ဖြစ်ပွားသည့် တိုက်ပွဲတွင် စစ်ကောင်စီတပ်မှ တပ်သား (၁၀)ဦးကျော်သေဆုံးခဲ့ပြီး၊ PKPFဘက်မှ (၄)ဦးဒဏ်ရာရရှိကာ ၂ဦးစိုးရိမ်ရကြောင်းသိရသည်။
ယနေ့ စစ်ကောင်စီတို့၏ အကြမ်းဖက် တိုက်ခိုက်မှုကြောင့် ဖယ်ခုံမြို့နယ်အတွင်း ကျန်ရှိနေသေး သည့် တချို့ကျေးရွာနေပြည်သူများက ပင်လောင်းဘက်သို့ ထွက်ပြေးတိမ်းရှောင် ရကြောင်း သိရသည်။
“ပြည်သူ (၁၀၀) နီးပါး ပင်လောင်းကိုထပ်တိုးလာပါတယ်၊ ကျနော်တို့လည်း ရောက်လာမဲ့ စစ်ရှောင် တွေ အသင့်လာနေထိုင်လို့ရနိုင်အောင် စီစဥ်ထားပြီးသားပါ၊ ဒါပေမဲ့ ဆောင်းတွင်းဖြစ်နေတာက တစ်မျိုးနဲ့ စားရေးသောက်ရေးတွေအတွက်တော့ ခက်ခဲမှုက ရှိပါတယ်” ဟု ပင်လောင်းမြို့မှ စစ်ဘေးရှောင် များကို ကူညီပေးနေသူက သျှမ်းသံတော်ဆင့်ကို ပြောသည်။
ပြီးခဲ့သည့် ၂၀၂၁ ခုနှစ် အောက်တိုဘာလအတွင်းမှာလည်း ဖယ်ခုံမြို့နယ်အတွင်းတွင် ဒေသခံပြည်သူ့ ကာကွယ် ရေးတပ်ဖွဲ့နှင့် အာဏာသိမ်းစစ်ကောင်စီတပ်တို့ တိုက်ပွဲ လေးရက်ကြာသည်အထိ ပြင်းထန်စွာ ဖြစ်ပွားခဲ့သဖြင့် ရွာပေါင်း (၈)ရွာ က ဒေသခံ ၅၀၀၀ နီးပါး ရွာလုံးကျွတ် ထွက်ပြေးတိမ်းနေရဆဲ ဖြစ်သည်။
လက်ရှိတွင် ကရင်နီပြည်နယ်အတွင်းနှင့် သျှမ်းပြည်တောင်ပိုင်း ဖယ်ခုံမြို့အတွင်းမှာ စစ်ကောင်စီတို့က လျှပ်စစ်မီးဖြတ်တောက်ခြင်း၊ ကုန်စည်စီးဆင်းမှု ဖြတ်တောက်ခြင်းနှင့် တချို့သော နေရာများတွင် ဖုန်းလိုင်းများ ဖြတ်တောက်ထားခြင်းကို လုပ်ဆောင်နေကြောင်း ဒေသခံများထံမှသိရှိရသည်။
