အသံတိတ်သပိတ် ဈေးမပိတ်ရန် စစ်ကောင်စီ အရှိန်အဟုန် လုပ်ဆောင်နေ

0

သျှမ်းပြည်နယ်အတွင်းရှိ မြို့များတချို့တွင် လာမည့် ဖေဖော်ဝါရီ ၁ ရက်နေ့တွင် ဈေးမပိတ်ရန်အတွက် စစ်ကောင်စီများက အရှိန်အဟုန်ဖြင့် အတင်းအကြပ်လုပ်ဆောင်နေကြောင်း စုံစမ်းသိရှိရသည်။

ဖေဖော်ဝါရီ ၁ ရက်သည် စစ်အာဏာသိမ်း တနှစ်ပြည့်ဖြစ်သည့်အတွက် “အသံတိတ် သပိတ်” လုပ်ဆောင်ရန် လူမှုကွန်ရက် စာမျက်နှာပေါ်တွင် ထုတ်ပြန်ကြေညာခဲ့သည်။

ထို့ကြောင့် စစ်အာဏာကို လွန်ဆန်သည့် လုပ်ရက်ဖြစ်သည့်အတွက် ဖေဖော်ဝါရီ ၁ ရက်တွင် ဈေးဆိုင်များကို လာမဖွင့်ဘဲ ပိတ်ထားပါက ဆိုင်ခန်းများကို ချိတ်ပိတ်မည်ဖြစ်ပြီး ဆိုင်ခန်းအတွင်းရှိ ပစ္စည်းများနှင့် ဆိုင်ခန်းများကိုပါ သိမ်းယူသွားမည် ဖြစ်ကြောင်း စစ်ကောင်စီ အုပ်စုက လိုက်လံနှိုးဆော်နေသည်။

“လာမဖွင့်လို့မရဘူးတဲ့။ မဖွင့်ရင် ဆိုင်ခန်းကို ချိတ်ပိတ် ပိတ်ပစ်မယ်တဲ့။ အထဲမှာရှိတဲ့ ပစ္စည်းတွေကိုလည်း သိမ်းမယ်တဲ့။ နေ့တဝက်ပဲ ဖွင့်ရင်ကော ရလားလို့ မေးတာလဲ မရဘူးတဲ့။ တနေကုန်ဖွင့်ထားရမယ်တဲ့။ အခု လက်မှတ်လာထိုးခိုင်းနေတာ” ဟု ပင်လုံမြို့ ဒေသခံ ဈေးဆိုင်ခန်းပိုင်ရှင် အမျိုးသမီး တစ်ဦးက ပြောသည်။

သျှမ်းပြည်အတွင်းရှိ စျေးဆိုင်ခန်းများကို မပိတ်ရန်အတွက် စစ်ကောင်စီ လက်အောက်ခံ စည်ပင်သာယာရေးနှင့် ရဲများက လက်မှတ်လာရောက်ထိုးခိုင်းကြောင်း သိရသည်။

ထို့ပြင် တချို့ ဒေသများတွင်လည်း ယမန်နေ့ (ဇန်နဝါရီ ၂၆) ညနေပိုင်း၌ ဈေးဆိုင်ခန်းများ မပိတ်ရန်အတွက် လော်ဖြင့် လိုက်လံ နှိုးဆော်နေကြောင်း သိရသည်။


“ဟုတ်တယ်။ သူတို့ လော်နဲ့လိုက်အော်နေတာ။ ၁ ရက်နေ့ကျရင် ဆိုင်မပိတ်ရဘူးလို့ လိုက်အော်တာ။ တရုတ်နှစ်သစ်ကူးနဲ့ တိုက်ဆိုင်လို့ပိတ်မယ်လို့ပြောလည်း ပိတ်လို့ မရဘူးလို့ပြောတယ်” ဟု တောင်ကြီးမြို့ ဒေသခံ အမျိုးသားတစ်ဦးက ပြောသည်။

ဆက်လက်ပြီး မိုင်းဆတ်မြို့ ဒေသခံ လူငယ်တစ်ဦးကလည်း “စည်ပင်တွေနဲ့ ရဲတွေ လက်မှတ်လိုက်ထိုးခိုင်းနေတာတော့ တွေ့တယ်။ ၁ ရက်နေ့ကျရင် ဈေးမပိတ်ဖို့ ဆိုင်ခန်းတွေ မပိတ်ဖို့ လက်မှတ်ထိုးခိုင်းနေတာ။ ဆိုင်ပိတ်ရင် ဖမ်းမယ်လို့တော့ ကြားတယ်” ဟု ပြောသည်။

လာမည့် ဖေဖော်ဝါရီ ၁ ရက်နေ့တွင် Silence Strike ကို မအောင်မြင်နိုင်ရန်အတွက် စစ်ကောင်စီ က နည်းမျိုးစုံဖြင့် လိုက်လံ ကန့်ကွက်နေလျက်ရှိကြောင်း သိရသည်။

ထိုသို့ Silence Strike ပြုလုပ်ပြီး စစ်ကောင်စီကို ဆန်ကျင်ဆန္ဒပြခြင်းသည် အထိရောက်ဆုံးသော ဆန့်ကျင်မှုဖြစ်ကြောင်း၊ Silence Strike ကို ပြုလုပ်သင့်ကြောင်း သျှမ်းပြည်မြောက်ပိုင်း မူဆယ်မြို့ မှ အသက် ၃၅ နှစ်အရွယ် စိုင်းလှ က ပြောသည်။

“ဒီ Silence Strike ဆန့်ကျင်မှုက ပြီးခဲ့တုန်းကကြည့်ရင် ထိရောက်မှုရှိတယ်။ ဒါကြောင့် သူတို့ အခု အဲလိုမဖြစ်အောင် လိုက်ကန့်ကွက်နေတာ။ ကျနော်တို့မြို့မှာတော့ ဆိုင်ပိတ်ရမယ်လို့တော့ လိုက်အော်ပြောတာမရှိသေးဘူး။ လိုက်အော်ပြောလည်း ကျနော်တို့ ဆိုင်ပိတ်ထားမှာဘဲ” ဟု စိုင်းလှက ဆိုသည်။

စစ်အာဏာရှင် အစိုးရကို မလိုအပ်၊ မလိုချင်သည့်အတွက် Silence Strike အသံတိတ်သပိတ် ပြုလုပ် ဆန့်ကျင်ဆန္ဒပြသင့်ကြောင်း ပြည်သူများက ပြောသည်။

အသံတိတ် သပိတ်ပြုလုပ်မည်ဖြစ်သဖြင့် ဖေဖော်ဝါရီ ၁ ရက်တွင် ဆိုင်ပိတ်မည်ဟု လူမှုကွန်ရက် စာမျက်နှာပေါ်တွင် ရေးတင်သည့် ဆိုင်ရှင်များကို စစ်ကောင်စီ အုပ်စုမှ စတင်ဖမ်းဆီးမှုပြုလုပ်နေသည့်အပြင် ဆိုင်များကိုလည်း သိမ်းဆည်းနေကြောင်း သိရသည်။

Leave a Comments