သျှမ်းပြည်တောင်ပိုင်း ပင်လောင်းမြို့နယ်တွင်း ရောက်ရှိနေသည့် စစ်ရှောင် (၃၀၀၀)ကျော် စောင်နှင့် အနွေးထည်များ လက်ရှိချိန်ထိ လိုအပ်နေကြောင်း စုံစမ်းသိရှိရသည်။
ပင်လောင်းမြို့သည် ရာသီဥတု ပိုအေးလာပြီး ထွက်ပြေးလာသည့် စစ်ရှောင်များသည် အနွေးထည်နှင့် စောင်များ မပါလာသည့်အတွက် အခက်ခဲဖြစ်နေကြောင်း စစ်ရှောင်များကို ကူညီပေးသူ တစ်ဦးက ပြောသည်။
“လက်ရှိ စားနပ်ရိက္ခာတော့ လုံလောက်နေတယ်။ ရက်ကြာလာရင်တော့ ခက်ခဲလာနိုင်တယ်။ ခုချိန် ပင်လောင်းက အရမ်းအေးတယ်။ တချို့လည်း ဘာမှ မရလာဘူး။ ပါလာတဲ့သူတွေလည်း မလုံလောက်ဘူး” ဟု စစ်ရှောင်များကို ကူညီပေးနေသည့် အမျိုးသမီး တစ်ဦးက ပြောသည်။
ထို စစ်ရှောင်များသည် ကရင်နီပြည်ဘက် စစ်ကောင်စီနှင့် ပြည်သူ့ကာကွယ်ရေးတပ် (PDF)တို့ တိုက်ပွဲဖြစ်ပွားခဲ့သဖြင့် ထွက်ပြေးလာသည့် ဒေသခံများဖြစ်ကြပြီး ဇန်နဝါရီ လဆန်းပိုင်းကတည်းက ထွက်ပြေးလာကြသည့်သူများ ဖြစ်ကြောင်း သိရှိရသည်။
“တချို့လည်း ပြီးခဲ့တဲ့ (၃)ရက် (၄)ရက်လောက်မှ ရောက်လာတဲ့သူတွေလည်း ရှိတယ်။ရပ်ကွက်ထဲက မိတ်ဆွေ အမျိုးအိမ်တွေမှာ နေကြတာများတယ်။ ဘုန်းကြီးကျောင်းမှာ နေတဲ့သူက အနည်းအကျဉ်းပဲရှိတယ်။ ကျမတို့ ရွာမှာဆို (၄၀၀)ကျော်လောက်ရှိတယ်။ တစ်အိမ်ကို (၁၅)ယောက် နေနေကြတယ်” ဟု ဒေသခံ အမျိုးသမီး တစ်ဦးက ပြောသည်။
ထို ထွက်ပြေးလာသည့် စစ်ရှောင်များထဲတွင် ကိုယ်ဝန်ဆောင် အမျိုးသမီးများလည်း ရှိပြီး ထွက်ပြေးလာသည့် လမ်းတွင် ကလေးမီးဖွားရသည့် မိခင်များလည်း ရှိနေကြောင်း သိရှိရသည်။
“ခုမှ သွေးနုသားနု မိခင်တွေ ထွက်ပြေးလာတာလည်း ပါတယ်။ လမ်းမှာ မွေးလာတဲ့ ကိုယ်ဝန်ဆောင်တွေလည်းရှိတယ်။ ကျမတို့ ရွာဘက်မှာ (၄)ဦးလောက် ရှိသွားပြီ သွေးနုသားနု မိခင်တွေ။ အဲ့ဒါတွေလည်း အကူညီလိုအပ်တယ်” ဟု စစ်ရှောင်များကို ကူညီပေးနေသူ အမျိုးသမီးတစ်ဦးက ပြောသည်။
ပင်လောင်မြို့နယ်အတွင်း ရောက်ရှိလာသော စစ်ရှောင်ဦးရေများသည် ခန့်မှန်းထားသည်ထက် များပြားနေသည့်အတွက် နေရာ တိုးချဲ့ပြင်ဆင်ထားရကြောင်း သိရှိရသည်။
