သျှမ်းပြည်မြောက်ပိုင်း ကွက်ခိုင်မြို့အတွင်း စစ်ကောင်စီ အာဏာသိမ်းပြီးနောက်ပိုင်း လောင်းကစားနှင့် မူးယစ်ဆေးဝါး သုံးစွဲသူ ပိုမိုများလာကြောင်း စုံစမ်းသိရှိရသည်။
စစ်ကောင်စီ လက်ထက် ကွက်ခိုင်မြို့ပေါ်ရှိ ရပ်ကွက်အတွင်းမှာ လောင်းကစားရုံများ ဖွင့်လှစ်ခြင်း၊ လမ်းကြိုလမ်းကြားအတွင်း မူးယစ်ဆေးဝါးသုံးစွဲသူနှင့် သူခိုးများ များပြားလာသည့်အတွက် ဒေသခံများအနေဖြင့် လုံခြုံမှုမရှိကြောင်း ကွက်ခိုင်ဒေသခံ အမျိုးသား တစ်ဦးက ပြောသည်။
“လမ်းကြားတွေဆို ဖြတ်တောင် မဖြတ်ရဲတော့ဘူး။ ဒေသခံတွေ ပေါင်းပြီး သွားတင်လို့တော့ ပြောကြတယ်။ သွားတင်ရင်လဲ တာဝန်ယူ ဖြေရှင်းပေးမယ့်သူ ရှိမလားပေါ့။ ကျနော်တို့မြို့ လုံခြုံမှုက လုံးဝ မရှိတော့ဘူး” ဟု ကွက်ခိုင်ဒေသခံ အမျိုးသား တစ်ဦးက ပြောသည်။
အာဏာသိမ်းပြီးနောက် လောင်းကစားရုံများလာခြင်းနှင့် မူးယစ်းဆေးဝါး ရောင်းဝယ်၊ သုံးစွဲသူ များပြားလာသည့်အပြင် ထိုအထဲတွင် အသက် (၁၀)နှစ်ကျော်အရွယ် အမျိုးသား အမျိုးသမီးများလည်း ဆေးသုံးစွဲလာကြောင်း ဒေသခံများက ပြောသည်။
“သွားကြည့်လိုက်ရင် (၁၂)နှစ် (၁၃)နှစ်အရွယ် ကလေးတွေ လမ်းဘေးမှာ ဆေးသုံးနေကြတယ်။ တချို့လည်း ဆေးထိုးကြတဲ့အဆင့်ရောက်တယ်။ ဘယ်ချောင်မှာပဲ သွားကြည့်ကြည့် ဆေးထိုးနေကြတယ်။ အမျိုးသမီးတွေလည်းပါတယ်” ဟု အမည်မဖော်လိုသူ တစ်ဦးက ပြောသည်။
ယခုရက်ပိုင်း ကွက်ခိုင်မြို့ပေါ် ကားများ ဆိုင်ကယ်များလည်း မကြာခဏ ပျောက်ဆုံးပြီး သက်ဆိုင်ရာ အစိုးရဌာနသို့ သွားရောက်တိုင်ကြားပေမယ့် တာဝန်ယူ ဖြေရှင်းပေးခြင်း မရှိကြောင်း ဒေသခံများက ပြောသည်။
“ဒီလို လောင်းကစားတွေ၊ မူးယစ်ဆေးတွေ များလာတော့ သူခိုးတွေလည်း များလာတယ်။ ပြီးခဲ့တဲ့ (၃)ရက် (၄)ရက် လောက်ကပဲ ကားတွေ (၄) စီး (၅) စီးလောက် ပျောက်တယ်။ ဆိုင်ကယ်တွေလည်း မကြာခဏပျောက်တယ်။ အိမ်ထဲထိ ဝင်ခိုးကြတာ” ဟု ဒေသခံ အမျိုးသမီး တစ်ဦးက ပြောသည်။
ကွက်ခိုင်မြို့နယ်သည် တိုင်းရင်းသားလက်နက်ကိုင်များဖြစ်ကြသော TNLA၊ KIA နှင့် စစ်ကောင်စီ တို့ လှုပ်ရှားရာ နယ်မြေဖြစ်ပြီး မကြာခဏ တိုက်ပွဲဖြစ်ပွားရာ နယ်မြေလည်း ဖြစ်သည်။
လာမည့် ဖေဖော်ဝါရီ (၁)ရက်နေ့သည် စစ်ကောင်စီမှ အာဏာသိမ်းခြင်း တစ်နှစ်ပြည့်ပြီဖြစ်ပြီး လောင်းကစားရုံများ၊ မူးယစ်ဆေးဝါးများ၊ သူခိုးများလည်း မြို့နယ်တိုင်း နီးပါး ရှိလာသည်။
Leave a Comments