သျှမ်းမြောက် ကျောက်မဲ မြို့တွင် ယမန်နေ့ (ဇန်နဝါရီ ၂၃)ရက် ည (၉)နာရီ ဝန်းကျင်က ရပ်ကွက် (၇) သံလမ်းအနီးနေ အမျိုးသား တစ်ဦးအား စစ်ကောင်စီတပ်သားများမှ လာရောက်ဖမ်းဆီးသွားကြောင်း သတင်းသိရသည်။
“ဘာလို့ ဖမ်းသွားလဲတော့ သေချာ မသိရသေးဘူး၊ စစ်ဆေးမေးမြန်းတာတွေလုပ်ပြီး အိမ်ထဲ ဝင်မွှေသွားတယ်၊ လပ်တော့တွေ၊ ဖုန်းတွေ ယူစစ်တယ်လို့တော့ ကြားတယ်၊ အဲ့တာတွေလည်း သိမ်းသွားပြီ၊ ဘေးအိမ်မှာနေတဲ့ သူတွေရဲ့ ပိုက်ဆံ နဲ့ ရွှေတွေလည်း ယူသွားတယ်လို့ ကြားတယ်၊ ဘယ်လောက်ပါသွားလဲတော့ သေခြာ မသိရဘူး” ဟု အမည်မဖော်လိုသူ အသက် ၄၀ကျော် ဒေသခံ တစ်ဦးက ပြောသည်။
ထို ဖမ်းဆီးခံရသည့် အမျိုးသားသည် ကျောက်မဲမြို့မှ တောင်ပေါ် (ခြုံးသစ်ကျေးရွာ) ဘက်သို့ လက်ဖက်ကုန်များ သယ်ဆောင် သွားလာနေသူ ဖြစ်ကြောင်း သိရသည်။
“သူက ဒီတိုင်း ရိုးရိုးကားမောင်းတဲ့သူပဲ၊ တောင်ပေါ် နဲ့ မြို့ထဲကို လက်ဖက်တွေ တင်ပြီး သွားလာတယ်လို့တော့ ကြားတယ်၊ အဲ့ည (ယမန်နေ့)က သူတို့အိမ်ပဲ လာစစ်တာမဟုတ်ဘူး၊ သူ့ ဘေးက အိမ်တွေလည်း စစ်ဆေးမေးမြန်း ခံရတယ်၊ ခု ဘယ်ကို ခေါ်သွားလဲ သေချာ မသိဘူး၊ ဒီမြို့မှာက စစ်ဆေးတာ ဖမ်းခံရတာတွေ ပိုများလာတယ်၊ လုံခြုံမှုကို မရှိတော့ဘူး” ဟု အထက်ပါ ဒေသခံက ဆိုသည်။
ကျောက်မဲမြို့တွင် ယခုလအတွင်း မြို့ပေါ်ရှိ ဒေသခံလူငယ်များ အပါအဝင် နောင်ပိန်ကျေးရွာမှ သက်ကြီး အမျိုးသားတစ်ဦးကိုလည်း ပြီးခဲ့သည့် ဇန်နဝါရီလ ၁၉ ရက်နေ့က စစ်ကောင်စီမှ ဖမ်းဆီးသွားကြောင်း သိရသည်။
ထို့အပြင် မြို့တွင်း ရပ်ကွက်များတွင်လည်း လမ်းသွားလမ်းလာပြည်သူများအား စစ်ဆေးမေးမြန်ခြင်း ပိုမိုပြုလုပ်လာကြောင်း ဒေသခံများထံမှ သိရသည်။
Leave a Comments