သျှမ်းပြည်အရှေ့ပိုင်း တာချီလိတ်မြို့နယ်အတွင်းတွင် အာဏာသိမ်းစစ်ကောင်စီတို့သည် အမျိုးသားဒီမိုကရေစီ အဖွဲ့ချုပ် NLD ပါတီဝင်များနှင့် အပြစ်မဲ့ပြည်သူများကို ဗုံးပေါက်ကွဲမှုနှင့် ဆက်စပ်ပြီး စွပ်စွဲ ဖမ်းဆီးနေကြောင်း သိရသည်။

တာချီလိတ်မြို့မှ မြို့မရဲစခန်းဝန်းအတွင်း ရဲလိုင်းခန်းအပါအဝင် ရက်သတ္တပတ်အတွင်း (၄)ကြိမ်မြောက် ဗုံးပေါက်ကွဲမှု ဖြစ်ပွားခဲ့သည့် ကိစ္စကို NLD ပါတီဝင်များနှင့် လူငယ်များက ပြုလုပ်ခဲ့သည်ဟု စွပ်စွဲကာ ဖမ်းဆီးထိန်းသိမ်းမှု ပြုလုပ်နေကြောင်း တာချီလိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဝန်ကြီးချုပ်ခရီးစဉ်ကတည်းက ဗုံး စပေါက်တာ ဒီတစ်ပတ်အတွင်း (၄) ကြိမ်ရှိနေပြီ၊ မြို့ထဲမှာလည်း နေ့တိုင်း အစစ်အဆေးတွေရှိတယ်။ NLD ပါတီနဲ့ ပတ်သက်တဲ့ လူတွေကို အဓိက လိုက်ဖမ်းနေတယ်၊ အခုက ၁၀ ဦးလောက် ရှိနေပြီ” ဟု တာချီလိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီတို့သည် NLD ပါတီနှင့် ပတ်သက်သူများ၊ စစ်ကောင်စီကို ဆန့်ကျင်လှုပ်ရှားသည်ဟု ထင်မှတ်သော ပြည်သူများကိုလည်း စွပ်စွဲချက်များဖြင့် လိုက်လံဖမ်းဆီးနေကြောင်း တာချီလိတ်မြို့မှ လွှတ်တော်ကိုယ်စားလှယ်အဖြစ် ယှဥ်ပြိုင်အနိုင်ရဖူးသည့် အမျိုးသားတစ်ဦးက ဆိုသည်။

“သူတို့ကို ဆန့်ကျင်မှ NLD ဖြစ်မှ ဖမ်းတာ မဟုတ်ပါဘူး၊ သူတို့ အမြင်မကြည်တဲ့ ပြည်သူတွေကိုလည်း အမြင်ကတ်ပုဒ်မနဲ့ ဖမ်းပါတယ်၊ သူတို့ဖမ်းသွားပြီး ထောင်ထဲမှာပဲ သေရတဲ့သူတွေရှိသလို ပြန်လွှတ်လာပြီး မကြာခင်မှာ သေဆုံးရတဲ့သူတွေလည်း ရှိတယ်၊ ဒီလိုကိစ္စတွေနဲ့ ပတ်သက်ပြီး စကစတွေဘက်က ဘာမှ ဖြေရှင်းချက်မပေးဘူး၊ ပြည်သူတွေ လူ့အခွင့်အရေး ဘယ်လောက် ဆုံးရှုံးရလဲ၊ ဘယ်လောက်အနိုင်ကျင့်ခံရလဲ ဆိုတာ သိသာတယ်” ဟု လွှတ်တော်ကိုယ်စားလှယ် အနိုင်ရခဲ့ဖူးသည့် အမျိုးသားက ပြောသည်။

တာချီလိတ်မြို့တွင်းမှ တစ်ပတ်အတွင်း ဗုံးပေါက်ကွဲမှုများဆက်တိုက်ဖြစ်ပွားပြီးနောက် တာချီလိတ်မြို့နေ NLD ပါတီမှ ပြည်သူ့လွှတ်တော်ကိုယ်စားလှယ် ဦးဝင်းစွမ်၏ နေအိမ်ကို စစ်ကောင်စီက ဇန်နဝါရီလ ၁၃ ရက်က ချိတ်ပိတ်ခဲ့ခြင်းဖြစ်ပြီး နေအိမ်အတွင်းကိုလည်း မွှေနှောက်ဖျက်ဆီးသွားကြောင်း အထက်ပါ လွှတ်တော်ကိုယ်စားလှယ်က ပြောသည်။
“ဦးဝင်းစွမ်ကို PDF ခေါင်းဆောင်လို့ စကစတွေက ထင်နေတာ၊ အဲ့ကြောင့် သူ့ကို အသည်းအသန်လိုက်ရှာနေတယ်၊ သူ့အိမ်ကိုလည်း ချိတ်ပိတ်တယ်။ သူဝင်ထွက်သွားလာတတ်တဲ့ အိမ်တွေကိုလည်း ဝင်ရောက် စစ်ဆေးမှုတွေရှိတယ်” ဟု ၎င်းက ပြောသည်။

ဦးဝင်းစွမ်သည် NLD ပါတီမှ အနိုင်ရ လွှတ်တော်ကိုယ်စားလှယ်တစ်ဦးဖြစ်ပြီး လက်ရှိတွင် တောခိုပြီး PDF ခေါင်းဆောင်လုပ်နေသည်ဟု စစ်ကောင်စီက စွပ်စွဲကာ ၎င်းအိမ်နှင့် တခြားပြည်သူတို့၏ နေအိမ်ကို စစ်ကောင်စီတပ်သားတို့မှ ဝင်ရောက်စီးနင်းစစ်ဆေးလေ့ရှိကြောင်း သိရသည်။

တာချီလိတ်မြို့တွင်းမှ ပေါက်ကွဲမှု (၄)ကြိမ်စလုံးကို TCL.KKK.SHN အဖွဲ့ ပြုလုပ်ခြင်းဖြစ်ကြောင်း ထုတ်ပြန် ကြေညာခဲ့ပြီး အာဏာသိမ်း စစ်ကောင်စီအနေဖြင့် ဖမ်းဆီးထားသူများကို ချက်ချင်းပြန်လွှတ်ပေးရန်နှင့် မဆိုင်သူများ ဖမ်းဆီးစစ်ဆေးခြိမ်းခြောက်မှုများကို ရပ်တန့်ရန်၊ မြို့တွင်း ပြည်သူများ သွားလာရေးတွင် စစ်ဆေးခံနေရမှုကြောင့် ထိတ်လန့်နေ၍ စစ်ဆေးမှုများကို ရုပ်သိမ်းပေးရန် ၎င်းတို့ ထုတ်ပြန်ချက်မှ တောင်းဆိုထားပါသည်။