သျှမ်းတောင် ပင်လောင်းမြို့နယ် နောင်တရားမြို့တွင် ရောက်ရှိခိုလှုံနေသော ကရင်နီပြည်မှ စစ်ရှောင်လာသည့် ကလေးငယ်များအား အခြေခံပညာများကို သင်ကြားပေးနေကြောင်း သိရသည်။

နောင်တရားမြို့ စစ်ရှောင်စခန်း (၃)နေရာမှ အသက် (၁၅)နှစ်အောက် စစ်ဘေးရှောင်ကလေးငယ် ၃၀၀ ဝန်းကျင်အား အခြေခံပညာ သင်ကြားပေးတာဖြစ်ကြောင်း ဒေသခံတစ်ဦးက ပြောသည်။

“အဓိကတော့ သူတို့လေးတွေ ပျော်ပျော်ရွှင်ရွှင်နဲ့ အချိန်ကို ဖြတ်သန်းနိုင်အောင်၊ နောက်ပြီးတော့ သူတို့တွေ ကြုံတွေ့ခဲ့ရတဲ့ ဒုက္ခတွေက စိတ်ဒဏ်သင့်မှု မဖြစ်အောင်၊ စိတ်အားငယ်မှုတွေ မဖြစ်အောင်၊ သူတို့တွေရဲ့ အချိန်တွေ အလကားကုန်ဆုံးမှုမရှိအောင် ဒါတွေကို ရည်ရွယ်ပြီး အခြေခံ စာပေ သင်ပေးတာပါ၊ စိတ်ပိုင်းဆိုင်ရာ မထိခိုက်စေဖို့ပါ” ဟု နောင်တရားဒေသခံ ဦးခွန်ဆန်းဦးက သျှမ်းသံတော်ဆင့်ကို ပြောသည်။

ယနေ့ (ဇန်နဝါရီ ၁၉)တွင် စစ်ရှောင်ကလေးငယ် (၁၂၀)ဝန်းကျင်အား စတင် သင်ကြားပေးနေပြီး သင်ကြားပေးသည့် ဆရာ/မ (၅)ဦး ရှိထားကြောင်း သိရသည်။

ကျန်ရှိနေသည့် အသက် (၁၅)နှစ်အောက် ကလေးငယ် (၁၀၀)ကျော်ကိုလည်း စာသင်ကြားပေးနိုင်ရန်အတွက် ထပ်မံ စီစဉ်နေဆဲဖြစ်ကြောင်း ဦးခွန်ဆန်းဦး က ဆက်ပြောသည်။

“ခုက မဏ္ဏုပ်ငှားလိုက်တယ်၊ ပြီးတော့ ရှိတာလေးနဲ့ လုပ်လိုက်တယ်၊ မိုးကာတွေ၊ ဖျာတွေနဲ့ ခင်းတာပေါ့၊ တစ်နေရာတော့ အဆင်ပြေပြီ၊ နောက်တစ်နေရာအတွက်ကတော့ ခု စီစဉ်နေတုန်းပါ၊ ကျောင်းတိုက်ထဲက စတိတ်စင် တစ်ခုပေါ်မှာ မိုးကာ ကာ ၊ ဖျာခင်းပြီး သင်မယ် လို့တော့ မှန်းထားတယ်၊ အဲ့မှာလည်း ကလေး တစ်ရာကျော်ကို သင်ပေးမှာပါ” ဟု ၄င်းက ဆိုသည်။

ထို စစ်ရှောင်ကလေးငယ်များအား တစ်ရက်လျှင် (၄၅)မိနစ် (၄)ချိန် သင်ကြားပေးမှာဖြစ်သည်။

ထိုစစ်ရှောင်များသည် ယခုလအတွင်း ကရင်နီပြည်တွင် စစ်ကောင်စီနှင့် ဒေသခံ ပြည်သူ့ကာကွယ်ရေးတပ်ဖွဲ့ တို့ တိုက်ပွဲပြင်းထန်ခဲ့မှုကြောင့် ပြီးခဲ့သည့် ဇန်နဝါရီ ၁၀ ရက် ဝန်းကျင်ခန့်က လွိုင်ကော်၊ ဖရူဆိုမြို့နယ်တို့ဘက်မှ သျှမ်းတောင် နောင်တရား‌ဒေသသို့ စစ်ရှောင်ထွက်ပြေးလာရသည့် ပြည်သူများဖြစ်ကြောင်း သိရသည်။

လက်ရှိအချိန်ထိ နောင်တရားမြို့ပေါ်နှင့် အနီးပတ်ဝန်းကျင် ကျေးရွာရှိ နေအိမ်များတွင် ခိုလှုံနေကြရသည့် ကရင်နီပြည်မှ စစ်ဘေးရှောင် ၂၀၀၀ ဝန်းကျင်ခန့် ရှိနေပြီး သောက်သုံးရေအတွက် အခက်ခဲရှိနေကြောင်း စစ်ရှောင်ကူညီသူများထံမှ သိရသည်။