သျှမ်းပြည်မြောက်ပိုင်းအတွင်း ဖြစ်ပွားနေသည့် အာဏာသိမ်းစစ်ကောင်စီနှင့် ကိုးကန့်တပ်မတော် (MNDAA)တို့ တိုက်ပွဲကြောင့် မုံးကိုးမြို့ပေါ်သို့ စစ်ဘေးတိမ်းရှောင်ရောက်ရှိလာသော စစ်ရှောင်ဦးရေ ၁၀၀၀ ဝန်းကျင်သည် စားနပ်ရိက္ခာ အရေးပေါ် လိုအပ်နေကြောင်း သတင်းသိရသည်။

“မုံးကိုးမြို့ပေါ်က စစ်ဘေးဒုက္ခသည် ဦးရေ ၁၀၀၀ ကျော်တို့က စားနပ်ရိက္ခာ အရေးတကြီး လိုအပ်နေပါတယ်၊ ဆောင်းတွင်းဆိုတော့ စောင်နဲ့ အနွေးထည်တွေလည်း လိုအပ်နေပါတယ်” ဟု မုံးကိုးမြို့ပေါ်ရှိ စစ်ဘေးရှောင်များကို ကူညီပေးနေသူတစ်ဦးက သျှမ်းသံတော်ဆင့်ကို ပြောသည်။

မုံးကိုးမြို့ရှိ ကချင်နှစ်ချင်းဘုရားကျောင်း စစ်ရှောင်စခန်းတွင် သက်ကြီးရွယ်အိုများ၊ မီးနေသည် မိခင်များ၊ မွေးကင်းစ ကလေးငယ်များလည်း ရှိနေပြီး ၎င်းတို့အတွက် မြေပဲဆံကဲ့သို့ မာကြောသော အစားအစာများက အဆင်မပြေကြောင်း စစ်ရှောင်များကို ကူညီပေးနေသူတစ်ဦးက သျှမ်းသံတော်ဆင့်ကို ပြောသည်။

“စစ်ရှောင်တွေက ကြမ်းပြင်ပေါ် ကဒ်ထူပြားလေးခင်းပြီး အိပ်နေရပါတယ်၊ ကလေးမွေးပြီးခါစ မီးနေသည် မိခင်တွေကလည်း maternal care ကောင်းစွာ မရနိုင်ဘူး၊ နို့တိုက်ကလေးငယ်တွေအတွက်လည်း အာဟာရ လုံလောက်စွာ မရှိနိုင်ဘူး” ဟု မုံးကိုးမြို့ပေါ်တွင် စစ်ရှောင်များကို ကူညီပေးနေသူတစ်ဦးက သျှမ်းသံတော်ဆင့် ကို ပြောသည်။

လက်ရှိတွင် မုံးကိုးမြို့ပေါ်ရှိ ကချင်နှစ်ခြင်းဘုရားကျောင်းနှင့် လီဆူးနှစ်ခြင်းဘုရားကျောင်းတို့တွင် စစ်ဘေးရှောင် တစ်ထောင်ဝန်းကျင်ခန့်ရှိနေပြီး စစ်ရှောင်များအတွက် ရိက္ခာသယ်ဆောင်ရာတွင်လည်း စစ်ကောင်စီတို့၏ စစ်ဆေး ရေးဂိတ်များကြောင့် အဆင်မပြေကြောင်း သတင်းသိရသည်။

“ဒီကနေ နောက်ထပ်သုံးလေးရက်အတွင်း ရိက္ခာမရတော့ရင်တော့ ငတ်ကြလိမ့်မယ်၊ တရုတ်ဘက်ကလည်း လမ်းတွေပိတ်ထားတော့ ဝယ်ရခက်တယ်၊ လမ်းပန်းဆက်သွယ်ရေးခက်ခဲတယ်၊ စစ်ကောင်စီတွေရဲ့ စစ်ဆေးရေး ဂိတ်တွေကြောင့် အလှူရှင်တွေ ပရဟိတသမားတွေလည်း ရိက္ခာတွေ မသယ်ရဲဘူး” ဟု အထက်ပါ ပုဂ္ဂိုလ်က ပြောသည်။

ယခုရက်ပိုင်း သျှမ်းပြည်မြောက်ပိုင်းအတွင်းတွင် စစ်ကောင်စီတပ်ဖွဲ့တို့သည် ကိုးကန့်တပ်ဖွဲ့၊ KIAတပ်ဖွဲ့တို့နှင့် နေ့တိုင်းနီးပါး တိုက်ပွဲဖြစ်ပွားနေလျက်ရှိကြောင်းလည်း သိရသည်။

မုံးကိုးမြို့ပေါ်က စစ်ရှောင်များအတွက် ကူညီမှုများ ပြုလုပ်လိုပါက ဆရာဆွတ်ရိန်အောင် 09793182827 ၊
09403746027 ကို ဆက်သွယ်လှူဒါန်းနိုင်ကြောင်း သိရသည်။