သျှမ်းပြည်တောင်ပိုင်း မိုင်းကိုင်မြို့နယ်တွင် တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားနေသည့်ကြား စစ်ကောင်စီဘက်မှ ဝါးတားဂိတ် (၂)နေရာ ထပ်မံ ပြုလုပ်လိုက်ကြောင်း စုံစမ်းသိရှိရသည်။
စစ်ကောင်စီတို့ လာလုပ်ထားသည့် ဝါးတားဂိတ်များမှာ မိုင်းကိုင်မြို့ ရပ်ကွက်(၆) လွယ်လိုင် အောင်မင်္ဂလာကျောင်းတိုက်ရှေ့တွင် တစ်နေရာရှိပြီး ဒေသအခေါ် လွယ်မော (ကတ်ဖွီးကျေးရွာ) သွားသည့်ဘက်တွင် တစ်နေရာ ဖြစ်ကြောင်း သိရသည်။
“လွယ်လိုင် ထဲမှာပဲ (၂)နေရာစလုံး လာလုပ်ထားတယ်။ အသွားအလာကို မေးတယ်။ ဖုန်းတွေ ကားတွေတော့ မစစ်ဘူး။ ဒီလို နိုင်ငံရေး ရှုပ်ထွေးနေချိန် သူတို့ ဂိတ်တွေ လာလုပ်ထားတော့ စိုးရိမ်ရတယ်” လို့ မိုင်းကိုင်မြို့နယ် လွယ်လိုင်ဒေသခံ အမျိုးသမီးတစ်ဦးက ပြောသည်။
ပြီးခဲ့သည့် ဇန်နဝါရီ (၁၁)ရက်နေ့ထိ စစ်ကောင်စီတို့သည် စစ်ရှောင်စခန်းတွင်သာ လာရောက်စခန်းချထားခဲ့တာဖြစ်ပြီး ယမန်နေ့ ဇန်နဝါရီ (၁၆)ရက်က စတင်ထားရှိတာဖြစ်ကြောင်း သိရသည်။
“သူတို့ စစ်ရှောင်တွေနဲ့ အတူလာပြီး စခန်းချကတည်းက ပြန်မလာတော့ပဲ ဂိတ် လုပ်လိုက်တာထင်တယ်။ ဘယ်လိုလာမလဲတော့ မသိရသေးဘူး။ ခုမှ စလုပ်တယ်ဆိုတော့” ဟု လွယ်လိုင်ဒေသခံ အမျိုးသားတစ်ဦးက ပြောသည်။
မိုင်းကိုင်မြို့နယ်တွင် တိုင်းရင်းသား လက်နက်ကိုင် တိုက်ပွဲများကြောင့် ဒေသခံ (၂၅၀၀)ကျော် ထွက်ပြေးတိမ်းရှောင်ခဲ့ပြီး လက်ရှိချိန်ထိ နေရပ်သို့ မပြန်နိုင်သေးကြောင်း စုံစမ်းသိရှိရသည်။
“တိုက်ပွဲမဖြစ်တဲ့ နေရာတွေတော့ ပြန်သွားကြတဲ့သူတွေရှိသလို တိုက်ပွဲဖြစ်မှာကို စိုးရိမ်ပြီး ကြိုပြီး တိမ်းရှောင်လာတဲ့ သူတွေလည်း ရှိတယ်။ နေ့တိုင်းတော့ ပြန်တဲ့သူ ရှိသလို လာတဲ့သူတွေလည်း ရှိတယ်” ဟု ၎င်း အမျိုးသားက ပြောသည်။
မိုင်းကိုင်မြို့တွင် လက်ရှိအချိန်ထိ စစ်ရှောင် (၃၀၀၀)နီးပါးရှိပြီး စားနပ်ရိက္ခာ၊ အနွေးထည်များနှင့် တဲ ပြုလုပ်ရန်အတွက် မိုးကာများ လိုအပ်နေကြောင်း သိရသည်။
