သျှမ်းပြည်တောင်ပိုင်း လွိုင်လင်မြို့တွင် ကရင်နီပြည်မှ ထွက်ပြေးလာသည့် စစ်ရှောင် (၂၀၀)ခန့် ရောက်ရှိထားကြောင်း စုံစမ်းသိရှိရသည်။
ထိုစစ်ရှောင်များသည် လွိုင်လင်မြို့ရှိ အာစီ ခရစ်ယာန်ကျောင်းတွင် (၇၀)ဦး၊ နှစ်ခြင်း ခရစ်ယာန် ကျောင်းတွင် (၁၁)ဦး၊ ရပ်ကွက်တွင်းရှိ နေအိမ်တွင် (၁၀၀)ကျော်ခန့်ရှိပြီး ဆွေမျိုး မိတ်ဆွေ နေအိမ်များတွင်လည်း ရှိထားကြောင်း သိရှိရသည်။
“တချို့အိမ်တွေဆို (၁၈)ယောက် ကနေ အယောက် (၂၀)လောက်ထိတော့ ရှိနေကြတယ်။ ရပ်ကွက်တိုင်း ရှိကြတယ်။ တစ်ရပ်ကွက်ကို ဘယ်နှအိမ် လာနေထားလဲဆိုတော့ မသိရသေးဘူး” ဟု လွိုင်လင်မြို့ ပရဟိတ အမျိုးသမီးတစ်ဦးက ပြောသည်။
ထို စစ်ရှောင်များသည် ကရင်နီပြည် ဖရူဆိုမြို့နယ်၊ ဒီးမော့ဆိုမြို့နယ်တို့မှ ဒေသခံများဖြစ်ကြပြီး ပြီးခဲ့သည့် ဇန်နဝါရီ (၁၂) ရက်ခန့်က ရောက်ရှိလာကြကြောင်း စုံစမ်းသိရှိရသည်။
“အလှူရှင်တွေတော့ လာလှူဒါန်းတာတွေ ရှိကြတယ်။ တချို့လည်း ရုတ်တရက် ထွက်ပြေးလာရတော့ ဘာမှ မရလာခဲ့တဲ့သူတွေလည်း ရှိတယ်။ အဝတ်တစ်ထည် ကိုယ်တစ်ခုနဲ့ လာရတဲ့သူတွေလည်းရှိတယ်” ဟု စစ်ရှောင်များကို ကူညီပေးနေသူ အမျိုးသမီး တစ်ဦးက ပြောသည်။
ကရင်နီပြည်တွင် စစ်ကောင်စီနှင့် ပြည်သူ့ကာကွယ်ရေးတပ်ဖွဲ့ (PDF)တို့ တိုက်ပွဲဖြစ်ပွားမှုကြောင့် စစ်ကောင်စီဘက်မှ လေကြောင်းဖြင့် တိုက်ခိုက်လာသည့်အတွက် ဒေသခံ ပြည်သူများ သျှမ်းတောင်သို့ အများအပြား ထွက်ပြေးလာခဲ့ရသည်။
ကရင်နီပြည် လွိုင်ကော်၊ ဒီးမော့ဆို၊ ဖရူဆို နှင့် သျှမ်းတောင် မိုးဗြဲ တို့တွင် စစ်ကောင်စီ၏ ထိုးစစ်ဆင်မှုများ တစ်နေ့ထက် တစ်နေ့ ပိုမိုဆိုးရွားလာပြီး လက်ရှိမှာ လူဦးရေ (၁)သိန်း (၇)သောင်းကျော် စစ်ရှောင်ထွက်ပြေးနေကြရကြောင်း အမျိုးသမီးများ အဖွဲ့ချုပ် (မြန်မာနိုင်ငံ) WLB မှ သိရသည်။
