အာဏာသိမ်း စစ်ကောင်စီတို့ ပြင်းထန်စွာ ထိုးစစ်ဆင်နေသည့် ကရင်နီပြည် (ကယား)ရှိ ပုဗ္ဗာရုံ ပရိယတ္တိစာသင်တိုက် မှ သံဃာ တော် အပါး (၄၀)ကျော်သည် တောင်ကြီးမြို့ရှိ ဝေဠုဝန်ကျောင်းတိုက်သို့ စစ်ရှောင်ရောက်ရှိလာကြောင်း သတင်းသိရသည်။
“လွိုင်ကော်မြို့ထဲနဲ့ ဒီ့ပြင် ကျောင်းတော်တော်များများကိုလည်း လက်နက်ကြီးတွေ သေနတ်တွေလာမှန်တော့ ဦးဇင်းတို့လည်း ရှောင်ထွက်လာရတာပါ၊ ဦးဇင်းတို့ထွက်လာပြီး နောက်တစ်နေ့မှာ ကျောင်းကို လက်နက်ကြီး လာမှန်သွားတယ်၊ ကံကောင်းတယ်ပြောရမယ်” ဟု ဝေဠုဝန်ကျောင်းတိုက်သို့ ရောက်ရှိလာသည့် ဦးဇင်းတစ်ပါး က သျှမ်းသံတော်ဆင့်ကို မိန့်သည်။
လက်ရှိ ဝေဠုဝန်ကျောင်းတိုက်သို့ ရောက်ရှိနေသည့် စစ်ရှောင်သံဃာတော်များမှာ ကျောင်းထိုင်ဆရာတော်ကြီး တစ်ပါး အပါအဝင် ဦးဇင်း (၈)ပါးနှင့် ကိုရင် အပါး ၄၀ ခန့် ရှိကြောင်း ဝေဠုဝန်ကျောင်းတိုက်မှ ဦးဇင်း တစ်ပါးက သျှမ်းသံတော်ဆင့်ကို မိန့်သည်။
“ဦးဇင်းတို့ သွားကြိုခဲ့ပါတယ်၊ ဒီဘက်ကားနဲ့ အဲ့ဘက် (ကရင်နီ)က ကားတွေ လိုက်ပို့တာလည်းပါတယ်၊ ပုပ္ပပါရုံ ကျောင်းက သံဃာတွေအားလုံး ဦးဇင်းတို့ ဝေဠုဝန်ကျောင်းတိုက်မှာ လက်ခံထားပါတယ်၊ စုစုပေါင်း ၅၀ ရှိတယ်” ဟု ဝေဠုဝန်ကျောင်းတိုက်မှ ဦးဇင်းက မိန့်သည်။
ယခုအချိန်သည် ကိုရင်လေးများ စာစစ်သည့်အချိန်လည်း နီးကပ်လာသည့်အပြင် အိမ်ပြန်ပို့ရန် အခက်ခဲရှိနေသည့်အတွက် ဝေဠုဝန်ကျောင်းတိုက်တွင် လက်ခံထားခြင်းဖြစ်ကြောင်း သိရသည်။
“သိပ်မကြာခင်မှာ ကိုရင်လေးတွေအတွက် သံဃာတွေအတွက် စာစစ်တာက ရှိတော့မယ်လေ၊ အဲ့ကြောင့် ကိုရင်လေးတွေကို အိမ်ပြန်ခိုင်းရင်လည်း သင်ထားတဲ့ ပညာတွေ နှမြောလို့၊ အဲ့ကြောင့် ဒီမှာပဲ အားလုံးကို လက်ခံထားပါတယ်” ဟု ဝေဠုဝန်ကျောင်းတိုက်မှ ဦးဇင်းတစ်ပါးက သျှမ်းသံတော်ဆင့်ကို မိန့်သည်။
စစ်ကောင်စီတို့ အကြမ်းဖက် ထိုးစစ်ဆင်နေမှုကြောင့် ကရင်နီပြည် လွိုင်ကော်မြို့နယ်အတွင်းတွင် ပြည်သူ့နေ အိမ်များ၊ ဘာသာရေး အဆောက်အအုံများ၊ ဈေးဆိုင်များနှင့် ဘုန်းကြီးကျောင်းများ အပါအဝင် အဆောက်အအုံများစွာ ထိခိုက်ပျက်စီးရပြီး သံဃာတော်များ အပါအဝင် ပြည်သူတဝက်ကျော် နေရပ်စွန့်ခွာကာ စစ်ဘေးဒဏ်မှ တိမ်းရှောင်ထွက်ပြေးနေရသည်။
Leave a Comments