သျှမ်းပြည်တောင်ပိုင်း ညောင်ရွှေမြို့နယ် မိုင်းသောက်မြို့ ငွေတောင်ဓမ္မာရုံတွင်ရောက်ရှိနေသည့် ကရင်နီ စစ်ဘေးရှောင် (၉၀)ဝန်းကျင်အတွက် စားနပ်ရိက္ခာလိုအပ်ကြောင်း စုံစမ်းသိရှိရသည်။
ဇန်နဝါရီ (၁၂)ရက်က ကရင်နီပြည်မှ ထွက်ပြေးတိမ်းရှောင်လာပြီး လက်ရှိမှာ ရေရှည်အတွက် စားနပ်ရိက္ခာ လိုအပ်ကြောင်း မိုင်းသောက်ဒေသခံ ပရဟိတလုပ်ဆောင်နေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
“သူတို့ စထွက်ပြေးလာတုန်းကတော့ အဝတ်တစ်ထည် ကိုယ်တစ်ခုပဲလာတယ်။ အဝတ်အထည်တွေတော့ အလှူရှင်တွေ လာလှူပေးသွားပြီ။ ခုလိုအပ်တာက စားနပ်ရိက္ခာတွေပဲ လိုအပ်တယ်” ဟု ၎င်းကဆိုသည်။
ထိုထွက်ပြေးလာသည့် စစ်ရှောင်များကို ကိုဗစ်-၁၉ ကြိုတင်ကာကွယ်သည့် အနေဖြင့် ကျန်းမာရေးဌာနမှ လာပြီး စစ်ဆေးမှုများ ပြုလုပ်ခဲ့ကြောင်း စုံစမ်းသိရှိရသည်။
“ကိုဗစ်-၁၉ ကိုတော့ ရောက်လာကတည်းက အားလုံးကို စစ်ဆေးပြီးပြီ။ ခုထက်ထိတော့ ဘာမှ မဖြစ်သေးဘူး။ ဒီနေ့လည်း စစ်ရှောင်တွေ နည်းနည်းထပ်ရောက်လာမယ်လို့တော့ ကြားတယ်။ ခုထက်ထိတော့ မရောက်လာသေးဘူး” ဟု မိုင်းသောက် ပရဟိတ တစ်ဦးက ဆက်ပြောသည်။
ကရင်နီပြည် လွိုင်ကော်မြို့ပေါ်ထိ အာဏာသိမ်း စစ်ကောင်စီမှ တိုက်လေယာဉ်၊ စစ်ရဟတ်ယာဉ်နှင့် တင့်ကားများကို အသုံးပြုပြီး တိုက်ခိုက်မှုများ ပြုလုပ်သဖြင့် ပြည်သူများ ဘေးလွတ်ရာ သျှမ်းတောင်ဘက်သို့ ဆက်လက် ပြောင်းရွှေ့လာနေကြောင်း သိရသည်။
