ဆီဆိုင်မြို့နယ်အတွင်း ရောက်ရှိနေသည့် တချို့စစ်ရှောင်များအတွက် ရေအခက်အခဲရှိနေ

0

သျှမ်းပြည်တောင်ပိုင်း ဆီဆိုင်မြို့နယ်အတွင်းရောက်ရှိနေသည့် ကရင်နီစစ်ဘေးရှောင်များ ခိုလှုံနားနေသည့် တချို့သော နေရာများတွင် ရေအခက်အခဲရှိနေကြောင်း သတင်းသိရသည်။

ဆီဆိုင်ရောက်စစ်ရှောင်

“သောက်ရေအတွက်တော့ အားလုံးအဆင်ပြေပါတယ်၊ ဒါပေမဲ့ ချိုးဖို့နဲ့ လျှော်ဖို့ ဖွတ်ဖို့က အားလုံးအတွက် မလုံလောက်ဘူး၊ အဲ့ကြောင့် စခန်းနဲ့ နည်းနည်းဝေးတဲ့ ရေကန်ကိုသွားရတယ်၊ အဲ့အတွက် တချို့က သွားဖို့ အဆင်မပြေဘူး” ဟု စစ်ရှောင်များ ရောက်ရှိနေသည့် လင်းမေတ္တာ ပရဟိတ ဘော်ဒါဆောင်မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

လင်းမေတ္တာပရဟိတ ဘော်ဒါဆောင်သို့ ရောက်ရှိလာသော ကရင်နီစစ်ဘေးရှောင်များအနက် အများစုသည် ကလေးနှင့် အမျိုးသမီး / မိခင်များဖြစ်ကြပြီး ရောဂါသည် နှင့် နာမကျန်းသူများလည်း ရှိသည့်အတွက် အဝေးသို့ သွားရောက်ရေချိုးရန်လည်း ခက်ခဲကြောင်း ၎င်းက ပြောသည်။

ဆီဆိုင်ရောက်် စစ်ရှောင်

“ကျနော်တို့ လင်းမေတ္တာဆီကိုရောက်လာတဲ့ သူတွေထဲမှာ အမျိုးသမီးနဲ့ ကလေးတွေပိုများတယ်၊ ပြီးတော့ လေဖြတ်ရောဂါသည်လည်းရှိတယ်၊ သူတို့တွေအနေနဲ့ အဝေးကို သွားဖို့က အဆင်မပြေတော့ ချို့ယွင်းချက် အနေနဲ့ ကလေးငယ်မိခင်နဲ့၊ သက်ကြီးပိုင်းတွေ ပြီးတော့ နာမကျန်းဖြစ်တဲ့သူတွေကို ဒီကရေကို သုံးခိုင်းပြီး ကျန်တဲ့သူတွေက ရေကန်ကို သွားရတယ်” ဟု လင်းမေတ္တာ ပရဟိတ ဘော်ဒါဆောင်မှ တာဝန်ရှိသူ တစ်ဦးက ဆိုသည်။

လက်ရှိတွင် လင်းမေတ္တာ ပရဟိတာ ဘော်ဒါဆောင်သို့ရောက်ရှိနေသည့် ကရင်နီစစ်ရှောင်ပြည်သူများ ၇၀ ဝန်းကျင်ခန့်ရှိနေပြီး စားနပ်ရိက္ခာ၊ သုံးရေ၊ အဝတ်အထည်နှင့် စောင်များ လိုအပ်နေကြောင်းလည်း သိရသည်။

Leave a Comments