သျှမ်းမြောက် ကျောက်မဲမြို့ သျှမ်းစာပေနှင့်ယဉ်ကျေးမှုရှိ စစ်ရှောင်စခန်းတွင် မုန့်ဖုတ်သင်တန်း ပြုလုပ်ပေးခဲ့ကြောင်း စုံစမ်းသိရသည်။
ထို မုန့်ဖုတ်သင်တန်းကို ပြီးခဲ့သည့် ဇန်နဝါရီ ၆ ရက်နေ့မှစပြီး ယမန်နေ့အထိ သင်တန်း(၅)ရက် ပြုလုပ်ခဲ့တာဖြစ်ကြောင်း သိရသည်။
“အဆင့်မြင့် မုန့်ဖုတ်နည်းတွေ သင်ပေးတာပါ၊ ကိတ်မုန့်တွေ၊ ရိန်းဘိုးကိတ်၊ ဘက်တာကိတ်၊ ချောကလပ်ကိတ် အားလုံး (၁၂)မျိုးရှိတယ်၊ စစ်ရှောင်စခန်းမှာ ရှိတဲ့ စစ်ရှောင်လူငယ်တချို့နဲ့ အပြင်လူနဲ့ ပေါင်းပြီးတော့ သင်ပေးတာ၊ လာသင်ပေးတဲ့ အဖွဲ့က LTLG အဖွဲ့ပါ၊ သင်တန်းတက်တဲ့လူ အများစုကတော့ အမျိုးသမီးတွေပါပဲ” ဟု ကျောက်မဲ သျှမ်းစာပေနှင့် ယဉ်ကျေးမှုအသင်း ဥက္ကဌ လုံးလျန်းဟန် က သျှမ်းသံတော်ဆင့်ကို ပြောသည်။
အဆိုပါ မုန့်ဖုတ်သင်တန်းတွင် သင်တန်းသားတို့မှ အဆင့်မြင့် မုန့်မျိုးစုံ (၁၂)မျိုးကို သင်ယူခဲ့ရတာဖြစ်ပြီး သင်တန်းဆင်းပွဲကို ယနေ့ (ဇန်နဝါရီ ၁၁)ရက်တွင် ပြုလုပ်ခဲ့တာဖြစ်ကြောင်း သိရသည်။
“ပညာတစ်ခု တိုးလာတာပေါ့၊ နောက်ပြီး ဒီဟာကို လုပ်တတ်သွားရင် အပိုဝင်ငွေရမယ်၊ ပြီးတော့ အဖွဲ့ ကွန်ရက်တွေလည်း ချိတ်ဆက်ပေးထားတယ်၊ မုန့်ဖုတ်စက်တွေလည်း ပေးထားတယ်၊ ပစ္စည်း ကိရိယာတွေကိုလည်း ကူညီပေးထားတယ် ဆိုတော့ ဒါက သူတို့အတွက် ဝင်ငွေရလာနိုင်တာပေါ့၊ ဒါက တကယ့်ကို ကောင်းတဲ့ သင်တန်းတစ်ခုပါပဲ” ဟု လုံးလျန်းဟန်က ဆက်ပြောသည်။
ပြီးခဲ့သည့် ဒီဇင်ဘာလအတွင်းတွင်လည်း ထိုစစ်ရှောင်စခန်းမှ စစ်ရှောင် (၂၂)ဦးအား ဝါးလက်မှု အခြေခံပညာကို သင်ကြားပေးခဲ့ကြောင်း သိရသည်။ ထို့အပြင် ယခုလအတွင်း အဆင့်မြင့် ဝါးလက်မှုသင်တန်း၊ အခြား အသိပညာဆွေးနွေးရေးတို့ကိုလည်း ပြုလုပ်ပေးဖို့ အစီစဉ် ရှိထားကြောင်း သိရသည်။
ထို သျှမ်းစာပေနှင့်ယဉ်ကျေးမှု စစ်ရှောင်စခန်းတွင် စစ်ရှောင် (၃၀၀)ဝန်းကျင် ရှိနေပြီး အများစုမှာ ဟူးဆွန်၊ မြိုင်းဆိုင်း၊ တွန်ဟိတ်၊ ချုံးသစ်၊ ကျိန်ကိုင်နှင့် နားလဲင့် ကျေးရွာတို့မှ စစ်ရှောင်ပြည်သူများဖြစ်သည်။
ယနေ့ အချိန်ထိ ကျောက်မဲမြို့နယ်အတွင်း မိုင်းတင်းကျေးရွာအုပ်စုရှိ စစ်ရှောင်စခန်း၊ ရပ်ကွက် (၈) ဓမ္မာရုံနှင့် မိုင်းငေါ့မြို့ စစ်ရှောင်စခန်းတို့ အပါအဝင် စစ်ရှောင်ပြည်သူ (၉၀၀)ကျော် ရှိနေဆဲဖြစ်ကြောင်း သိရသည်။
Leave a Comments