သျှမ်းပြည် တောင်ပိုင်း တောင်ကြီးမြို့သို့ ရောက်ရှိလာသော ကရင်နီစစ်ရှောင်များအတွက် နေရာအတည်တကျနှင့် ထားရှိသည့် စခန်းတစ်ခု လိုအပ်ကြောင်း စစ်ရှောင်များကို ကူညီပေးနေသည့် အဖွဲ့အစည်းထံမှ သိရသည်။
ပြီးခဲ့သည့် ဇန်နဝါရီလ ၉ ရက်နေ့မှ ယနေ့အချိန်အထိ တောင်ကြီးမြို့ပေါ်သို့ စတင်ရောက်ရှိလာသည့် ကရင်နီ စစ်ဘေးရှောင်များ များပြားလာသော်လည်း လက်ရှိအချိန်တွင် အဆင်ပြေသလိုသာ ဖြန့်ကျဲနေထိုင်ရကြောင်း သတင်းသိရသည်။
“တောင်ကြီးမြို့ထဲကို ရောက်လာတဲ့ စစ်ရှောင်တွေက အဆင်ပြေသလို အလှူရှင်ပေးထားတဲ့ နေရာမှာ နေနေ ကြတာရှိတယ်၊ တချို့ကလည်း ပိုက်ဆံပေးပြီး အိမ်ငှားနေတာတို့၊ အမျိုးအိမ်မှာတို့၊ တချို့ကလည်း သာသနာ ကျောင်းမှာ အဲ့လို နေကြရတယ်” ဟု စစ်ရှောင်များကို ကူညီချိတ်ဆက်ပေးနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် တောင်ကြီးမြို့တွင်းသို့ ရောက်ရှိလာသည့် ကရင်နီ စစ်ရှောင်များသည် တစ်နေ့လျှင် ၃၀၀ ဝန်းကျင်နှင့် စုစုပေါင်း ၁၀၀၀ ခန့် ရှိနေကြောင်း သိရသည်။
“အခု ရပ်ကွက်ထဲကို ဝင်နေတဲ့ စစ်ရှောင်တွေကို အိမ်ထောင်စုစာရင်း တောင်းကြည့်တာမျိုးရှိတယ်လို့တော့ ကြား တယ်၊ လိုအပ်တာတွေကို လိုက်ကူညီပေးကြတဲ့ အလှူရှင်တွေက များပေမဲ့ နာမည်မဖော်ချင်ကြဘူး၊ ခေတ်လည်း မကောင်းတော့ စိတ်မချလို့ပေါ့နော်” ဟု တောင်ကြီးမြို့ပေါ်မှ အသက် ၄၅ နှစ်ရှိ အမျိုးသားတစ်ဦးက ပြောသည်။
တောင်ကြီးမြို့အဝင် သံလမ်း စစ်ဆေးရေးဂိတ်တွင် စောင့်ကြသည့် စစ်ကောင်စီတပ်သားများသည် စစ်ရှောင်များ၏ ပစ္စည်းနှင့် ဖုန်းများကို စစ်ဆေးမှုများ ပြုလုပ်နေကြောင်းလည်း သတင်းသိရသည်။
