သျှမ်းပြည်အရှေ့ပိုင်း တာချီလိတ်မြို့နေ ပြည်သူများ အသွားအလာ သတိထားရန်၊ စစ်ကောင်စီသတင်းပေး (ဒလန်)များ သတိထားနေထိုင်ရန်အတွက် တာချီလိတ်မြို့ ပြည်သူ့ကာကွယ်ရေး တပ်ဖွဲ့ (TCL-PDF) က ယမန်နေ့ ဇန်နဝါရီ (၁၀) ရက်နေ့တွင် ထုတ်ပြန်ကြေညာခဲ့သည်။

ထိုထုတ်ပြန်ချက်တွင် တာချီလိတ်မြို့မှ ကျိုင်းတုံသွားလာသူများအနေဖြင့် ကားမှန်ချသွားလာရန်၊ စစ်ကောင်စီ ဒလန်များ လုပ်ငန်းစဉ်မှ ရပ်တန့်ရန်၊ NON CDM များနှင့် အနီးကပ်သွားလာမှုများ မပြုလုပ်ရန် နှင့် စစ်ကောင်စီများ ဖွင့်လှစ်ထားသည့် လောင်းကစားရုံများတွင် မသွားရန်အတွက် ထုတ်ပြန်ထားသည်။

“လုပ်စရာတွေရှိနေတဲ့ ကာလမှာ ပြည်သူများအနေနဲ့လည်း ထုတ်ပြန်ချက်အတိုင်း လိုက်နာပေးစေချင်တယ်။ ကျနော်တို့ ထုတ်ပြန်ထားတဲ့ အတိုင်းကို ပြည်သူတွေအကုန်လုံး လိုက်နာပေးကြပါ။ တကယ်လို့ မလိုက်နာရင်တော့ ကျနော်တို့ အနေနဲ့ လုံးဝ တာဝန်မယူဘူးဆိုတာ ပြောချင်ပါတယ်” ဟု (TCL-PDF) အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။

တာချီလိတ်မြို့တွင် စစ်ကောင်စီ တပ်ဖွဲ့များက ညတိုင်းနီးပါး ကားများဖြင့် လှည့်လည် စစ်ဆေးမှုများ ပြုလုပ် နေလျက်ရှိကြောင်း သိရသည်။

ထို့အပြင် ယမန့်နေ ဇန်နဝါရီ (၁၀)ရက် လဝက ရုံးပေါက်ကွဲမှုဖြစ်ပွားပြီးနောက် တာချီလိတ်မြို့တွင် ယနေ့ စစ်ကောင်စီ မြို့ပေါ်လှည့်လည်နေလျက်ရှိကြောင်း ဒေသခံများပြောပြချက်အရ သိရသည်။

“တာချီလိတ်မှာတော့ ညတိုင်းနီးပါး ကားတွေနဲ့ လှည့်လည် စစ်ဆေးနေတာတွေတော့ ရှိတာပေါ့။ ဒီနေ့လည်း ကားတွေနဲ့ မြို့ပေါ်လှည့်လည်ပြီး ကြည့်နေတာတွေရှိတယ်တဲ့။ မနေ့က ပေါက်ကွဲမှုနဲ့ ပတ်သက်ရင်လည်း ပတ်သက်မှာပေါ့။ ဘယ်သူက လဝက ရုံးကို သွားဖောက်ခွဲလဲတော့ ကျနော်တို့လည်း မသိရသေးဘူး” ဟု တာချီလိတ်မြို့ ဒေသခံ အမျိုးသားတစ်ဦးက ပြောသည်။

တာချီလိတ်မြို့နယ် ပြည်သူ့ကာကွယ်ရေးတပ်ဖွဲ့ TPDF ကို ဇွန်လ (၈)ရက်နေ့က စတင်ဖွဲ့စည်းခဲ့ကြောင်း သိရသည်။