သျှမ်းပြည်တောင်ပိုင်း ဆီဆိုင်မြို့နယ် ဆိုက်ခေါင်စံပြကျေးရွာတွင် ကရင်နီပြည်ဘက်မှ စစ်ရှောင်များအတွက် နေရာ စီစဉ်ပေးထားကြောင်း စုံစမ်းသိရသည်။
“ဒီနေ့ မနက်ပိုင်းကစပြီး လွိုင်ကော်တို့ဘက်က စစ်ရှောင်တွေရောက်လာတယ်၊ ကျနော်တို့ စီစဥ်ထားတဲ့ နေရာမှာ ရောက်လာတဲ့ စစ်ရှောင်တွေက ၅၀ ကျော် ဝန်းကျင်လောက်ရှိပါတယ်” ဟု ဆိုက်ခေါင်စံပြကျေးရွာ ရပ်မိရပ်ဖ ကော်မတီဝင် ခွန်ကျော်ဇေယျက သျှမ်းသံတော်ဆင့်ကို ပြောသည်။
စစ်ရှောင်များအား ကူညီပေးရေးနှင့်ပတ်သက်ပြီး ဆိုက်ခေါင်နေ တိုင်းရင်းသားပြည်သူများက နွေးထွေးစွာကြိုဆိုရန်၊ စစ်ဘေးရှောင်ပြည်သူများကို နေရာထိုင်ခင်း၊ အစားအသောက်၊ ဆေးဝါးနှင့် လိုအပ်သော အကူအညီများ တတ်နိုင်သလောက် ဖြည့်ဆည်းပေးနိုင်ရန်အတွက် ကော်မတီဖွဲ့စည်းထားကြောင်းလည်း သိရသည်။
“ကျနော်တို့ စီစဥ်ထားတဲ့နေရာတွေက ၅ နေရာ ရှိနေပါတယ်၊ ရောက်လာတဲ့ စစ်ရှောင်ပြည်သူတွေကို နွေးထွေးစွာ ကြိုဆိုမယ်၊ တတ်နိုင်တဲ့ အကူအညီတွေ ပေးမယ်လို့လည်း ကျနော်တို့ ကော်မတီက ဆုံးဖြတ်ထားပါတယ်” ဟု ခွန်ကျော်ဇေယျက သျှမ်းသံတော်ဆင့်ကို ပြောသည်။
လက်ရှိတွင် ကယားပြည် (ကရင်နီပြည်)ဘက်မှ ထွက်ပြေးလာသော ပြည်သူများသည် ဆိုက်ခေါင်ကျေးရွာအတွင်းရှိ အမျိုးများနေအိမ်တွင် ခိုလှုံနေထိုင်ကြသူများလည်း များပြားနေကြောင်း သိရသည်။
စစ်ရှောင်များ ဆိုက်ခေါင်ဒေသသို့ ရောက်ရှိပြီး ခိုလှုံနိုင်ရန်အတွက် အုပ်ချုပ်ရေးမူး ခွန်လှထွန်း- ၀၉၇၈၈၈၁၆၄၈၆၊ ရပ်မိရပ်ဖ ကော်မတီ ဥက္ကဌ ဦးထိုက်အောင် – ၀၉၇၈၂၉၂၅၄၈၁၊ ခွန်ကျော်ဇေယျ – ၀၉၇၉၀၁၈၉၂၀၉ တို့ကို ဆက်သွယ်ပြီး ခိုလှုံနိုင်ကြောင်း သိရသည်။
