သျှမ်းပြည်မြောက်ပိုင်း သိန္နီမြို့ အဝင် တိုးဂိတ်နှင့် ကားလမ်းမကြီပေါ် လမ်းသွားလမ်းလာယာဥ်များကို ငွေတာင်း ခံလေ့ရှိသည့် ရဲနှစ်ဦးကို သန္နီပြည်သူ့ကာကွယ်ရေးတပ်ဖွဲ့ TNPDF က ပစ်သတ်ရှင်းလင်းလိုက်ကြောင်း သတင်းရရှိသည်။

ပြီးခဲ့သည့် ဇန်နဝါရီလ ၅ ရက်နေ့ ညနေ ၆ နာရီဝန်းကျင်အချိန်တွင် ငွေကောက်ခံမှု ပြုလုပ်ပြီး ပြန်လာသော အဆိုပါ ရဲသားနှစ်ယောက်ကို TNPDF တပ်ဖွဲ့ဝင်များက အလစ်ငိုက် ဝင်ရောက်ဖမ်းဆီးခဲ့ရာ ခုခံမှုများ ပြုလုပ်သည့်အတွက် သေနတ်ဖြင့် ပစ်သတ်ခဲ့ရကြောင်း TNPDF ပြန်ကြားရေးတာဝန်ခံအဖွဲ့က သျှမ်းသံတော်ဆင့်ကို ပြောသည်။

“ဒီရဲသားနှစ်ယောက်က ပြောင်းမိန့်တော့ ကျထားပါပြီ၊ ဒီလို မကျခင်မှာ ငွေအရမ်းတောင်းခဲ့သလို ပြောင်းခါနီးလည်း ပိုက်ဆံပိုကောက်လို့ ပြည်သူတွေ ဒုက္ခရောက်ရတယ်လေ၊ အဲ့ကြောင့် ကျနော်တို့က သွားဖမ်းတာ။ သူတို့က ပြန်ခုခံတာတွေ လုပ်တော့ ကျနော်တို့ ဒီလိုလုပ်လိုက်ရတာပါ” ဟု TNPDF ၏ ပြန်ကြားရေးတာဝန်ခံက သျှမ်းသံတော်ဆင့်ကို ပြောသည်။

အဆိုပါ ရဲသားနှစ်ဦး၏ ရုပ်အလောင်းကို သိန္နီမြို့မှ ကွတ်ခိုင်မြို့ဘက် အထွက် တိုးဂိတ်အကျော်ရှိ ကြက်ခြံနားတွင် ပစ်ထားပြီး ၄ ရက်ကြာသည့် အချိန်တွင် အနံ့များထွက်လာသဖြင့် သက်ဆိုင်ရာ မိသားစုဝင်များ သိရှိရန် ၎င်းတို့ လူမှုကွန်ယက် Facebook Page တွင် ရေးသားတင်ပြခဲ့ကြောင်း TNPDF က ဆိုသည်။

“ခုရက်ပိုင်း ကြက်မွေးမြုုရေးခြံက ထွက်တဲ့ ကြက်ချေးအနံ့နဲ့ အပုတ်နံ့တွေကြောင့် သက်ဆိုင်ရာ မိသားစုကို သိရှိ စေချင်လို့ ကျနော်တို့ Page မှာ ထုတ်ပြန်ခဲ့ပါတယ်၊ မနေ့ည (ဇန်နဝါရီလ ၉ ရက်)မှာတော့ ဝဋ်ကြွေးပြေ စေတီအနီး စခန်းချထားတဲ့ စစ်ကောင်စီတပ်သားတွေကနေ အလောင်းကို လာရှင်းသွားတယ်လို့ သိရပါတယ်” ဟု သျှမ်းသံတော်ဆင့်ကို ပြောသည်။

TNPDF သည် သျှမ်းပြည် မြောက်ပိုင်း သိန္နီမြို့နယ်အတွင်း အခြေစိုက် လှုပ်ရှားနေသည့် NUG လက်အောက်ခံ ပြည်သူ့ကာကွယ်ရေးတပ်ဖွဲ့တစ်ခု ဖြစ်ကြောင်း သိရသည်။