ကရင်နီပြည် (ကယား) လွိုင်ကော်မြို့ မှ ထွက်ပြေးလာကြသည့် စစ်ဘေးရှောင် ပြည်သူများကို ညောင်ရွှေမြို့နယ် ထီရိကျေးရွာတွင် ပအိုဝ်းအမျိုးသားအဖွဲ့အစည်း (PNO)တပ်ဖွဲ့က စစ်ရှောင်များကို စစ်ဆေးလျက်ရှိကြောင်း စုံစမ်းသိရှိရသည်။
ယမန်နေ့ ဇန်နဝါရီ ၉ ရက် လွိုင်ကော်မြို့နယ်တွင် စစ်ကောင်စီနှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားခဲ့ပြီး ဒေသခံများက ထွက်ပြေးတိမ်းရှောင်လာရာ PNO တပ်ဖွဲ့က လမ်းတွင် ပိတ်ပြီး စစ်ဆေးမှု ပြုလုပ်ကြောင်း သတင်းရရှိသည်။
“မနေ့ကတော့ လမ်းတွေပိတ်ထားတာ။ ကျနော်တို့ တပ်ဖွဲ့နဲ့ သွားညှိလိုက်လို့ အခုတော့ ပြန်ပေးသွားပြီလို့ပြောတယ်။ ပိုက်ဆံကောက်ယူတာတွေလည်းရှိတယ်။ သူတို့ ကောက်ခံ စစ်ဆေးတာက ဖယ်ခုံ အရှေ့ဘက်ကမ်းဒေသနဲ့ နီးတယ်။ ဒီနေ့ထိတော့ စစ်ဆေးမှုတွေ ရှိနေသေးတယ်တဲ့” ဟု ဖယ်ခုံမြို့ PDF တပ်ဖွဲ့ဝင်တဦးက သျှမ်းသံတော်ဆင့်ကို ပြောသည်။
လက်ရှိအချိန်ထိ လွိုင်ကော်မြို့နယ်အတွင်း တိုက်ပွဲ ဆက်လက်ဖြစ်ပွားနေသဖြင့် ယနေ့ (ဇန်နဝါရီ ၁၀)ရက်မှာလည်း ပြည်သူများ ထပ်မံ ထွက်ပြေးတိမ်းရှောင်လာနေကြောင်း၊ ယနေ့ထိ PNO တပ်ဖွဲ့မှ လမ်းတွင် စစ်ဆေးမှုများ ဆက်လက်ပြုလုပ်နေကြောင်း ထွက်ပြေးတိမ်းရှောင်လာသူတစ်ဦးက ပြောသည်။
“ဒီနေ့ထိလည်း စစ်ရှောင်တွေက ထွက်ပြေးနေကြသေးတယ်။ အခုထိ ထွက်ပြေးလာတာတွေ ရှိနေသေးတယ်။ လမ်းမှာလည်း PNO တပ်ဖွဲ့တွေက စစ်ဆေးနေတာတော့ရှိတယ်။ ရန်ပုံငွေ ဆိုပြီး ပိုက်ဆံတောင်းတာတွေရှိတယ်” ဟု လွိုင်ကော်မှ ထွက်ပြေးလာသူတစ်ဦးက ပြောသည်။
လွိုင်ကော်မြို့နယ်တွင် စစ်ကောင်စီနှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲပြင်းထန်လျက်ရှိပြီး ဒေသခံ ထောင်ချီ အိုးအိမ်ကို စွန့်ခွာပြီး ထွက်ပြေးနေလျက်ရှိသည်။
ယမန်နေ့ညထိ စစ်ကောင်စီ တပ်ဖွဲ့မှ လွိုင်ကော်မြို့အနီးတဝိုက်တွင် ရဟတ်ယာဉ် အသုံးပြုပြီး ပစ်ခတ်မှုရှိနေသဖြင့် ပြည်သူများ ထိတ်လန့်ကာ ထွက်ပြေးနေရကြောင်း သိရသည်။
