သျှမ်းပြည်တောင်ပိုင်း ဟဲဟိုးမြို့တွင် ပစ်ခတ်မှုများ ဖြစ်ပွားပြီးနောက် ယနေ့ (ဇန်နဝါရီလ ၁၀ )ရက်တွင် စစ်ကောင်စီမှ အင်အား အများအပြား ချထားကြောင်း သတင်းသိရသည်။
ယမန်နေ့ (ဇန်နဝါရီလ ၉ )ရက် ည ၁၁ နာရီကျော် ဝန်းကျင်တွင် ဟဲဟိုးမြို့ အနောက်ဘက်နှင့် အင်းထိပ်ခေါင်မယ်တို့ဘက်တွင် ပေါက်ကွဲသံနှင့် သေနတ်ပစ်ခတ်သံများ ကြားခဲ့ရကြောင်း ဟဲဟိုးမြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဗုံးသံအရင်ကြားတာပါ၊ ကင်းလှည့်နေတဲ့ စစ်ကောင်စီ တပ်သားတွေကို ဗုံးနဲ့ ပစ်လိုက်တယ်လို့ ကြားရပါတယ်၊ နောက်တော့ အချင်းချင်းပစ်တဲ့ သေနတ်သံတွေ ထွက်လာတယ်၊ ဗုံးတွေရော၊ အချိန်က ၂၀ မိနစ်ဝန်းကျင် လောက်ပဲကြာပါတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
ပစ်ခတ်သံများ ငြိမ်သွားပြီးနောက် ခဏအကြာတွင် စစ်ကားများသည် ဟဲဟိုးမြို့ ဘူတာဘက်သို့ ဦးတည် မောင်းနှင်သွားပြီး ယနေ့ (ဇန်နဝါရီ ၁၀)ရက် မနက်ပိုင်းတွင် မြို့အဝင်အထွက်များနှင့် မြို့တွင်း အဓိကနေရာများတွင် စစ်ကောင်စီမှ အင်အားအများအပြား လာရောက်နေရာယူထားကြောင်း သိရသည်။
“ဘူတာနားမှာရယ်၊ မြို့ဝင်မြို့ထွက်ရယ်၊ ဆေးရုံနဲ့ ရဲစခန်းတွေမှာ လုံခြုံရေး အင်အားတွေ ချထားတယ်၊ မြို့ထဲမှာလည်း အရပ်ဝတ်နဲ့ သွားလာနေတဲ့ စစ်သားတွေ ရဲတွေ ရှိနေတယ်၊ လေယာဉ်ကွင်းသွားတဲ့ လမ်းတစ်လျှောက်မှာလည်း သူတို့စောင့်နေတယ်” ဟု ဟဲဟိုးမြို့ခံ တစ်ဦးက သျှမ်းသံတော်ဆင့်ကို ပြောသည်။
အဆိုပါ ပစ်ခတ်မှုတွင် ဟဲဟိုးမြို့တွင်း ကင်းလှည့်နေသော စစ်ကောင်စီတပ်သားအဖွဲ့ကို တခြားလက်နက်ကိုင် တပ်ဖွဲ့တစ်ခုမှ ဗုံးဖြင့် လာရောက်ပစ်ခတ်တိုက်ခိုက်ခြင်းဟု အကြမ်းဖျင်း သိထားရသော်လည်း မည်သည့် အဖွဲ့အစည်းဖြစ်ကြောင်း မသိရှိရသေးပေ။
စစ်ကောင်စီတို့၏ အာဏာသိမ်းယူမှုကို တော်လှန်သည့် ဒေသခံပြည်သူ့ကာကွယ်ရေးတပ်ဖွဲ့ နှင့် စစ်ကောင်စီ တပ်တို့၏ တိုက်ပွဲသည် ကရင်နီပြည် ဘက်မှတစ်ဆင့် သျှမ်းပြည် တောင်ပိုင်းနယ်အတွင်း ရောက်ရှိလာနိုင်သည့် အခြေအနေများ ရှိနေသည့်အတွက် ပြည်သူများ အသွားအလာ သတိထားကြပါရန်လည်း သက်ဆိုင်ရာများက သတိပေး ပြောဆိုမှုများရှိနေကြောင်း သိရသည်။
Leave a Comments