ကရင်နီပြည်မှ သျှမ်းတောင်သို့ စစ်ရှောင်လာသည့် ပြည်သူများသည် ယနေ့ (ဇန်နဝါရီ ၉)ရက် လက်ရှိအချိန်ထိ တောင်ကြီးမြို့ထဲသို့ ဝင်ခွင့်မရဘဲ ဟိုပုံး ပအိုဝ်းမတောင်တွင် ပိတ်မိနေကြောင်း စုံစမ်းသိရှိရသည်။
ကရင်နီပြည် လွိုင်ကော်မြို့မှ လာသည့် စစ်ရှောင်ပြည်သူများသည် ယနေ့ (ဇန်နဝါရီ ၉)ရက် လက်ရှိအချိန်ထိ ဟိုပုံး ပအိုဝ်းမတောင်တွင် ရပ်ခိုင်းထားပြီး တောင်ကြီးမြို့ထဲသို့ ပေးမဝင်ကြောင်း စစ်ရှောင်လာသူများ ပြောပြချက်အရ သိရသည်။
“စစ်ရှောင်လာတဲ့သူတွေကို ဟိုပုံး ပအိုဝ်းမတောင်မှာ ရပ်ခိုင်းထားတယ်။ တောင်ကြီးဘက်ကိုလည်း ပေးမလာတဲ့အပြင် နောက်ကြောင်းပြန်လှည့်ခွင့်လဲ မပေးဘူး။ ကားတန်းတွေကတော့ အရှည်ကြီးပဲ” ဟု စစ်ရှောင်လာသူတစ်ဦးက သျှမ်းသံတော်ဆင့်ကို ပြောသည်။
ထို ဟိုပုံး ပအိုဝ်းမတောင်တွင် ပိတ်မိနေသည့်သူများမှာ အမျိုးသမီးနှင့် ကလေးသူငယ် အများစုပါဝင်ကြောင်း၊ လက်ရှိမှာတော့ ထိတ်လန့်ကြောက်ရွံ့နေကြကြောင်းလည်း ထိုစစ်ရှောင်က ပြောသည်။
“အဲ့ဂိတ်ကတော့ စစ်ကောင်စီတွေ စောင့်တာ။ အမျိုးသမီး၊ သက်ကြီးရွယ်အိုနဲ့ ကလေးတွေ ထိတ်လန့်နေကြပါတယ်” ဟု စစ်ရှောင်လာသူ တစ်ဦးက ပြောပြသည်။
အဆိုပါ နေရာသည် တောင်ကြီးမြို့နှင့် (၈)မိုင်ခန့် ကွာဝေးကြောင်း သိရသည်။
လွိုင်ကော်မြို့ အတွင်း အာဏာသိမ်းစစ်ကောင်စီနှင့် ပြည်သူ့ကာကွယ်ရေးတပ်မတော်တို့ကြား တိုက်ပွဲ ပြင်းထန်လာသည့်အတွက် သျှမ်းတောင်ဘက်သို့ ပြည်သူများ ပြောင်းရွှေ့လာကြခြင်းဖြစ်ကြောင်း သိရသည်။
Leave a Comments