သျှမ်းပြည်တောင်ပိုင်း နမ့်စန်မြို့ရှိ မြို့မဈေးအတွင်းဖွင့်လှစ်ထားသည့် ခမ်းလီရွှေဆိုင်ကို ယနေ့ (ဇန်နဝါရီ ၇)ရက် ညနေ ၃ နာရီဝန်းကျင်တွင် မျက်နှာဖုံးဝတ်ဆင်ထားသည့် အမျိုးသားလူငယ်တစ်စုက သေနတ်ဖြင့် ပစ်ခတ်ဓားပြတိုက်ရန် ကြိုးစားခဲ့ကြောင်း သတင်းသိရသည်။
ယနေ့ ဇန်နဝါရီလ ၇ ရက်နေ့ ညနေ ၃ နာရီကျော် ဝန်းကျင်တွင် နမ့်စန်မြို့မဈေးအတွင်းရှိ ခမ်းလီရွှေဆိုင်ကို လူငယ်တစ်စုက သေနတ်ပစ်ဖောက်ခြောက်လန့်ပြီး မှန်ဘောင်များကို ရိုက်ခွဲကာ ဓါးပြတိုက်ရန် ကြိုးစားခဲ့ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“ဓါးပြတိုက်ဖို့လာတာပေါ့၊ ဒါပေမဲ့ ပစ္စည်းတွေတော့ မပါသွားဘူး၊ လူကလည်း များတော့ သူတို့လန့်ပြီး ပြန်ပြေးသွား တယ်၊ ဒါပေမဲ့ အမျိုးသားတစ်ယောက်က ခါးထိသွားတယ်၊ နောက်တစ်ယောက်ကတော့ ခြေကျင်းဝတ်ကို ထိသွားတယ်” ဟု ဈေးအနီးရှိနေသူတစ်ဦးက သျှမ်းသံတော်ဆင့်ကို ပြောသည်။
ဓါးပြတိုက်ရန်ကြိုးစားသည့် လူတစ်စုသည် ရွှေဆိုင်မှန်ဘောင်ကို ရိုက်ခွဲစဥ် လူများ ဝိုင်းလာကြသဖြင့် လန့်ပြီး ပြန်လည်ထွက်ပြေးသွားခဲ့ကြောင်း၊ ထို့နောက် စစ်ကောင်စီလက်အောက်ခံ ရဲနှင့် စစ်သားတို့သည် အရပ်ဝတ်များ ဝတ်ဆင်ကာ လူနာတင်ယာဥ်များနှင့်အတူ အခင်းဖြစ်ပွားရာသို့ ရောက်လာကြောင်း ဒေသခံများက ပြောသည်။
“သူတို့တွေ ထွက်ပြေးပြီးမှ လူနာတင်ယာဥ်ရော၊ ရဲရော စစ်သားရော ရောက်လာကြတယ်၊ ရဲနဲ့ စစ်သားတွေက အရပ်ဝတ်တွေများကြတယ်၊ နောက်ကျပြီး ရောက်လာတဲ့သူကမှ ယူနီဖောင်းဝတ်နဲ့ ဈေးကို ပိတ်ခိုင်းတာ၊ ဒဏ်ရာ ရတဲ့သူတွေကို ဆေးရုံကို သယ်သွားကြပြီ၊ သိပ်စိုးရိမ်စရာမရှိဘူးပြောပါတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
လက်ရှိတွင်လည်း စစ်သားနှင့်ရဲတို့က ဈေးနှင့် အနီးပတ်ဝန်းကျင်တွင် လုံခြုံရေးချထားပြီး ပြည်သူများ သတိနှင့် သွားလာနေထိုင်ကြရန် သတိပေးပြောဆိုမှုများ ရှိကြောင်း သိရသည်။
ယင်းကဲ့သို့ နေ့ခင်းအချိန် ဓါးပြတိုက်ရန်ကြိုးစားမှုဖြစ်ပွားသည့် နမ့်စန်မြို့သည် အာဏာသိမ်းစစ်ကောင်စီတို့၏ တပ်ဖွဲ့များအပြင်၊ ၎င်းတို့၏ လက်အောက်ခံ ပြည်သူ့စစ်တပ်ဖွဲ့များ၊ တိုင်းရင်းသားလက်နက်ကိုင်တပ်ဖွဲ့များနှင့် ဒေသခံပြည်သူ့ကာကွယ်ရေးလှုပ်ရှားမှုများရှိသည့် နယ်မြေ ဖြစ်သည်။
