သျှမ်းပြည် အရှေ့ပိုင်း မိုင်းဆတ်မြို့တွင် ကိုဗစ် – ၁၉ ကူးစက်ခံရသည့် လူနာများကို ဆရာဝန်များက ကောင်းမွန်စွာ ဆေးကုသပေးခြင်းမရှိသည့်အပြင် လာရောက်ကြည့်ရှုပေးခြင်းလည်း မရှိကြောင်း စုံစမ်းသိရသည်။

မိုင်းဆတ်မြို့ရှိ ရွှေမဟာ ကွာရန်တင်းစင်တာတွင် ကွာရန်တင်းဝင်နေသည့် ဟိုနားကျေးရွာမှ ကိုဗစ် လူနာများကို ဆရာဝန်များက လာရောက်ကြည့်ရှုစစ်ဆေးပေးမှုနှင့် ကုသပေးမှုများ မရှိကြောင်း ဒေသခံများက သျှမ်းသံတော်ဆင့်ကို ပြောသည်။

“ဒီဇင်ဘာလ ၁၈ ရက်နေ့မှာ ကျနော်တို့ရွာ (ဟိုနားကျေးရွာ)ကို ကိုဗစ်လာစစ်တယ်၊ သေနတ်ကိုင်ထားတဲ့ ရဲတွေလည်း လိုက်လာတယ်၊ နှာခေါင်းထဲကို ထိုးပြီးစစ်တဲ့ဟာပေါ့၊ အဲ့လိုမျိုးဆိုတော့ တချို့ရွာသားတွေက ကြောက်ပြီး တောထဲကို ပြေးပုန်းတာရှိတယ်၊ အစစ်ခံရတဲ့ ၁၇ ယောက်က ကိုဗစ်ရှိတယ်ဆိုပြီး အခု ရွှေမဟာမှာ ကွာရန်တင်း ဝင်နေရတယ်” ဟု ဟိုနားကျေးရွာမှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ ဟိုနားကျေးရွာမှ ကိုဗစ် – ၁၉ စစ်ဆေးတွေ့ရှိသည်ဟု ဆိုသည့် ရွာသား ၁၇ ဦးကို မိုင်းဆတ်မြို့ရှိ ရွှေမဟာ ကွာရန်တင်းစင်တာသို့ ပို့ဆောင်ထားပြီး ကျန်ရှိသည့် မိသားစုဝင်များက ထမင်းဟင်းနှင့် သောက်သုံးရန် ရေ၊ ဆေးဝါးများကို နေ့စဥ် ပို့ဆောင်ပေးရကြောင်း သတင်းသိရသည်။

“ကွာရန်တင်းစင်တာဝင်နေတဲ့သူတွေကို ရွာမှာရှိနေတဲ့ မိသားစုဝင်က ကျနော်တို့ကနေ စားဖို့သောက်ဖို့ ဆေးဝါးကအစ အရာရာပို့ပေးနေရတယ်၊ ပြောချင်တာက ဆရာဝန်တွေက ဘာမှ လာမကြည့်ပေးဘူး၊ ကွာရန်တင်းဝင်နေ တယ်ဆိုလည်း ဒီတိုင်းပဲ ပစ်ထားလိုက်တာ” ဟု အထက်ပါ ပုဂ္ဂိုလ်က ပြောသည်။

ရွှေမဟာ၌ ကွာရန်တင်းဝင်နေသည့် ဟိုနားကျေးရွာမှ အသက် ၆၀ ကျော်အရွယ် အဖွားအိုတစ်ဦးသည် သားသမီး မရှိ တစ်ကိုယ်တည်းနေထိုင်သည့် လက်လုပ်လက်စားဘဝသမားဖြစ်ရာ ၎င်းကွာရန်တင်းဝင်ရချိန်တွင် စားရေး သောက်ရေးအတွက် နီးစပ်ရာ ကွာရန်တင်းဝင်နေသူအချင်းချင်းက ဝေမျှစားသောက်နေရသည်ဟုလည်း သတင်း သိရသည်။

“အဘွားတယောက်ဆိုရင် ရွာထဲမှာ နွားကျောင်းရင်းနဲ့ တစ်နေ့လုပ်တစ်နေ့စားပေါ့၊ သားသမီးမြေးမြစ်မရှိ၊ အခု သူ ကွာရန်းတင်း ဝင်နေရတော့ စားဖို့သောက်ဖို့ လာပို့သူမရှိဘူး၊ အချင်းချင်းဝေမျှပြီး စားသောက်နေရတယ်” ဟု ဟိုနားကျေးရွာမှ အမည်မဖော်လိုသည့် အမျိုးသမီးတစ်ဦးကလည်း ပြောသည်။

လက်ရှိတွင် ရွှေမဟာ ကွာရန်တင်းစင်တာတွင် ကွာရန်တင်းဝင်နေသည့် ဟိုနားကျေးရွာမှ ရွာသား ၁၇ ဦးမှာ အသက် ၆၀ ကျော် အမျိုးသားတစ်ဦးနှင့် အမျိုးသမီးတစ်ဦးအပြင် အသက် ၁၀ နှစ် မပြည့်သေးသည့် ကလေးငယ် ၂ ဦးလည်း ပါဝင်ကြောင်း သိရသည်။

ကိုဗစ် ရှိကြောင်း စစ်ဆေးပြီး ဆရာဝန်တို့၏ ညွှန်ကြားချက်အရ ကွာရန်တင်းဝင်နေရသော်လည်း မည်သည့် ကုသစောင့်ရှောက်မှုမှ မရသည့်အပြင် စားရေးသောက်ရေးလည်း ခက်ခဲနေသည့်အတွက် ပြည်သူများအနေဖြင့် များစွာခက်ခဲနေကြောင်း သိရသည်။

ပြီးခဲ့သည့် ရက်သတ္တပတ်က မိုင်းဆတ်မြို့နယ်အတွင်းမှ ကိုဗစ် – ၁၉ ပိုးကူးစက်သူများသည် စစ်ကောင်စီ လက်အောက်ခံ ပြည်သူ့ဆေးရုံသို့ ဆေးသွားကုသရာ တစ်ဦးကို သိန်း (၂၀)ကျပ် ပေးဆောင်ရကြောင်းလည်း စုံစမ်းသိရှိရသည်။