သျှမ်းပြည်တောင်ပိုင်း ဖယ်ခုံမြို့နယ် ဆီးမီးလော့ ကျေးရွာအတွင်း ယနေ့ (ဒီဇင်ဘာ ၂၁ ရက်) မနက် ၈ နာရီဝန်းကျင်က စစ်ကောင်စီ ဝင်ရောက်စီးနင်းခဲ့ပြီး နွားကျောင်းသား (၆)ဦးကို ဖမ်းဆီးကာ နွား(၃)ကောင် တောင်းယူခဲ့ကြောင်း စုံစမ်းသိရသည်။
ထို ဖမ်းဆီးခံရသည့် နွားကျောင်းသား (၆)ဦးကို ရိုက်နှက် စစ်ဆေးမှုပြုလုပ်ပြီး ပြန်လွှတ်ပေးခဲ့ကြောင်း သိရသည်။
“သူတို့ သေနတ်ဖောက်ပြီးတော့ ရွာထဲဝင်လာတာ။ ဘာမှ မဆိုင်တဲ့ သူ (၆)ဦးကို ခေါ်သွားတာ။ သူတို့တွေက နွားကျောင်းသားတွေပါ။ အခုတော့ ပြန်လွှတ်လာပေးပြီ။ ဖမ်းခံရတဲ့သူတွေထဲ တစ်ယောက်က ရိုက်ခံရတယ်။ သေနတ်နဲ့ ရိုက်ခံရတာ” ဟု ဒေသခံ အမျိုးသားတစ်ဦးက ပြောသည်။
ထို နွားကျောင်းသား (၆)ဦးကို PDF လာရောက်မှု ရှိ မရှိကို မေးမြန်ခဲ့ပြီး နွား (၃)ကောင်တောင်းခဲ့ကြောင်း၊ မပေးနိုင်ပါက ပြန်ဖမ်းဆီးမည်ဟုလည်း ခြိမ်းခြောက်ပြောဆိုခဲ့ကြောင်း သိရသည်။
“သူတို့က PDF နဲ့ သက်ဆိုင်တဲ့သူတွေရှိလားလို့မေးတာ။ သူတို့ PDF ရဲ့ ခြေရာခံ လိုက်နေတာ။ ပြန်လွှတ်လာပေးတယ်။ ဒါပေမဲ့ သူတို့က နွား (၃)ကောင် တောင်းတယ်။ မပေးနိုင်ရင် သူတို့ ပြန်လာဖမ်းမယ်လို့ ခြိမ်းခြောက်သွားသေးတယ်” ဟု ဆီးမီးလော့ ဒေသခံ အမျိုးသားတစ်ဦးက ပြောသည်။
စစ်ကောင်စီ တပ်ဖွဲ့များသည် ဆီးမီးလော့ ကျေးရွာထဲတွင် စစ်အင်အား (၁၅၀)ကျော်ခန့်ဖြင့် ဝင်ရောက်ခဲ့ကြောင်း သိရသည်။
ဖယ်ခုံမြို့တွင် စစ်ကောင်စီမှ ဖမ်းဆီးထားသူ စုစုပေါင်း (၂၀)ကျော် ရှိနေပြီး ယနေ့ချိန်ထိ ပြန်မလွှတ်သေးကြောင်း သိရသည်။
Leave a Comments