သျှမ်းပြည်မြောက်ပိုင်း မိုင်းရယ်မြို့နယ်တွင် မီတာခ ကျသင့်ငွေထက် ပိုပြီး ပေးဆောင်နေရသည့်အတွက် ပြည်သူများ အခက်အခဲဖြစ်နေကြောင်း စုံစမ်းသိရသည်။
“အာဏာသိမ်းပြီးတဲ့နောက် ကျမတို့ မီတာခ သွားပြီးမဆောင်ဘူး၊ သူတို့လည်း မီတာ လာမဖတ်လို့လေ၊ အခု ဒီလ (ဒီဇင်ဘာလ)မှာကျတော့ မီတာလည်း မဖတ်ဘဲနဲ့ မီတာခ သွားဆောင်ဖို့ စာရွက်လာပေးတယ်၊ ဒဏ်ကြေးလည်း ပါတယ်၊ အားလုံးပေါင်းက သုံးသိန်းနီးနီးရှိတယ်” ဟု မိုင်းရယ်မြို့ အမှတ် ၃ ရပ်ကွက်နေ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
စစ်တပ်မှ နိုင်ငံတော်အာဏာသိမ်းပြီးနောက်ပိုင်းတွင် မိုင်းရယ်မြို့ လျှပ်စစ်နှင့်စွမ်းအင်ဝန်ကြီးဌာနမှ ဝန်ထမ်းများသည် မီတာခများကို ပုံမှန်ဖတ်ယူခြင်း မရှိသည့်အပြင် မီတာခတောင်းခံသည့် စာရွက် လာရောက်ပေးသည့် အခါလည်း ပုံမှန်ကျသင့်ငွေထက် များစွာပေးဆောင်ခိုင်းသည့်အတွက် ပြည်သူများ ဒုက္ခရောက်နေကြောင်း သိရသည်။
“ပုံမှန်ဆို ကျမတို့အိမ်က တစ်လကို မီတာခ ၅၀၀၀ ကျပ် ဝန်းကျင်ပဲပေးရတာ၊ သူတို့ဘက်ကရှိတဲ့တာဝန်အတိုင်း မီတာလာမဖတ်တာကို အခု မီတာစာရွက်လာပေးတော့ ဒဏ်ကြေးတစ်လ ၃၀၀၀ လည်း ဆောင်ခိုင်းတယ်၊ ပြီးတော့ မီတာခက ၂ သိန်း ၈ သောင်းကျော် ကျတယ်တဲ့၊ ဒါမဖြစ်နိုင်ဘူးလေ” ဟု အထက်ပါ အမျိုးသမီးက ပြောသည်။
ယင်းကဲ့သို့ တာဝန်ယူမှုအပိုင်း လစ်ဟင်းမှုရှိနေသည့် မိုင်းရယ်မြို့ လျှပ်စစ်နှင့် စွမ်းအင်ဝန်ကြီးဌာနမှ ဝန်ထမ်းများသည် မီတာခဆောင်ပြီးဖြစ်သည့် တချို့အိမ်များကိုလည်း မဆောင်ရသေးဟု ပြောကာ မီတာခ ထပ်မံတောင်းဆိုမှုများ ပြုလုပ်ကြောင်းလည်း သိရသည်။
“ကျနော်တို့အိမ်မှာ သူတို့ မီတာစာရွက်လာပေးတိုင်း ဆောင်တယ်၊ အဲ့တာကို ကျနော်တို့အိမ်က မီတာခမဆောင်ရ သေးဘူးဆိုပြီး မီတာစာရွက်ပြန်လာပေးတယ်၊ ကျနော်တို့ဆောင်ပြီးတဲ့ စာရွက်နဲ့ သူတို့ကိုပြပြီးပြောတာတောင် သူတို့ဝန်မခံဘူး၊ သူတို့ပြန်လာတောင်းတဲ့ တစ်လစာအတွက် ဒဏ်ကြေးနဲ့ဆို တစ်သိန်းနီးနီးရှိတယ်၊ ဒါက အိမ်သုံး ပဲနော်” ဟု မိုင်းရယ်မြို့မှ အသက် ၃၀ ဝန်းကျင် အမျိုးသားတစ်ဦးကလည်း သျှမ်းသံတော်ဆင့်ကို ပြောသည်။
စစ်တပ်မှ နိုင်ငံတော်အာဏာသိမ်းပြီးနောက်ပိုင်း ဖြစ်ပေါ်လာခြင်းဖြစ်ပြီး ဒေသခံ ပြည်သူများအနေဖြင့် နိုင်ငံရေးမငြိမ်မသက်မှုဒဏ်များအပြင် ကိုဗစ် – ၁၉ ရောဂါဒဏ်များကြောင့် ဝင်ငွေ ကျပ်တည်းနေချိန်တွင် မီတာခ များပြားစွာ ပေးဆောင်ရသည့်အတွက် ပိုမိုခက်ခဲကြောင်း သိရသည်။
“ရောဂါကပ်ဘေးတွေ ရင်ဆိုင်နေရတဲ့ပြည်သူတွေကို ကိုယ်ချင်းစာတရားလေးထားသင့်တာပေါ့၊ ကိုယ့်ရဲ့ အားနည်းချက်ဖြစ်ပြီး တာဝန်မကျေပွန်ဘဲနဲ့ ပြည်သူကို ဒဏ်ကြေးဆောင်ခိုင်းတာ မတရားဘူးလို့ ထင်မြင် သုံးသပ်ပါတယ်” ဟုလည်း မိုင်းရယ်မြို့မှ လျှပ်စစ်ဌာနဆိုင်ရာတွင် တာဝန်ထမ်းဆောင်ခဲ့ဖူးသည့် အငြိမ်းစား အမျိုးသားတစ်ဦးကလည်း သျှမ်းသံတော်ဆင့်ကို ပြောသည်။
စစ်အာဏာသိမ်းယူပြီးနောက်ပိုင်း ပြည်သူများသည် စစ်အာဏာရှင်စနစ်ကို ဆန့်ကျင်သည့်အနေဖြင့် အခွန် မဆောင်ခြင်းဖြင့် သပိတ်မှောက်ခဲ့ကြသော်လည်း စစ်ကောင်စီမှ မီတာပေါက်များကို ဖျက်စီးခြင်း၊ မီး ဖျက်ခြင်းကြောင့် ပြည်သူများ မီတာခ ပြန်လည်ဆောင်လာသူများလည်း ရှိခဲ့သည်။
စစ်တပ်မှ နိုင်ငံတော်အာဏာမသိမ်းယူခင် ပြီးခဲ့သည့် ၂၀၂၀ ခုနှစ် ကိုဗစ် ၁၉ ကာလတွင် အမျိုးသားဒီမိုကရေစီ အဖွဲ့ချုပ် NLD ပါတီမှ ပြည်သူများ စားဝတ်နေရေးအခက်အခဲကြောင့် မီတာခအပြင် အခြားသော အခွန်များကိုပါ ဖြေလျှော့ခွင့် ပေးထားခဲ့ကြောင်း သိရသည်။
Leave a Comments