သျှမ်းတောင် ညောင်ရွှေမြို့နယ် အင်းလေးဒေသရှိ ရေပေါ်စျေးအား ဒီဇင်ဘာလ ၂၁ ရက်နေ့တွင် ကိုဗစ်စည်းကမ်းနှင့်အညီ ပြန်လည်ဖွင့်လှစ်မည်ဖြစ်ကြောင်း သတင်းသိရသည်။
အင်းလေးဒေသ ဟဲယာရွာမရှိ ရေပေါ်စျေး ပြန်လည်ဖွင့်လှစ်ပါက ဒေသခံများတွက် အကျိုးရှိသော်လည်း ကိုဗစ်ကူးစက်မှု မြင့်တက်လာမှာကိုတော့ စိုးရိမ်ကြောင်း ဒေသခံတစ်ဦးက ဆိုသည်။
“ဒေသခံတွေအတွက်က အကျိုးရှိပါတယ်၊ ဒါပေမယ့် ရေပေါ်စျေးက ဒေသခံတွေပဲ မဟုတ်တော့ဘူး၊ နယ်စုံက ခရီးသွားတွေကို ဖိတ်ခေါ်တဲ့သဘောဆိုတော့ ကိုဗစ်ကတော့ စိုးရိမ်စရာပါပဲ၊ ကိုဗစ်စည်းကမ်းလိုက်နာတာက အားနည်းတယ်၊ ကိုဗစ်ကူးတာလည်း ရှိနေသေးတယ်” ဟု အင်းလေးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ရေပေါ်စျေးဖွင့်လှစ်လိုက်ပါက ခရီးသွားဧည့်သည်များကို ဝန်ဆောင်မှုပေးရသည့် စက်လှေသမားများ၊ ရိုးရာအစားအစာများကို ရောင်းချကြသူများနှင့် ဒေသခံများအတွက် အလုပ်အကိုင် အခွင့်အလမ်း ပိုများ လာနိုင်ကြောင်း ၄င်းက ပြောသည်။
“ရေပေါ်စျေးဖွင့်တာက ကိုဗစ် ဒုတိယလှိုင်းမှာ ရပ်လိုက်တာ၊ စစ်ကောင်စီအာဏာသိမ်းတော့လည်း လုံးဝ ပိတ်ထားတာပဲ၊ အဲ့ဒီမတိုင်ခင်က ဖွင့်သေးတယ်၊ ရေပေါ်မှာ မဖွင့်လည်း ကုန်းပေါ်မှာ ဖွင့်တယ်၊ ၅ ရက်တစ်စျေး ဖွင့်ခဲ့တာပါ” ဟု ဒေသခံ အမျိုးသားတစ်ဦး က ပြောသည်။
အင်းလေး ရေပေါ်စျေးသည် တောင်ကြီး စျေးနေ့နှင့်ထပ်တူ (၅)ရက်တစ်စျေးဖွင့်လှစ်သည့် စျေးဖြစ်ပြီး ဒေသခံများမှ အင်းလေးဒေသထွက် ပစ္စည်းများ၊ ရိုးရာအစားအသောက်များကို လှေပေါ်တွင် ရောင်းချကြကြောင်း သိရသည်။
Leave a Comments