သျှမ်းပြည်တောင်ပိုင်း ဖယ်ခုံမြို့အပါအဝင် အနီးတဝိုက်ရှိ စစ်ရှောင်များနှင့် တော်လှန်ရေးတပ်ဖွဲ့များကို ဆေးကုသပေးနေသည့် ကျန်းမာရေးအဖွဲ့သည် ဆေးဝါးဆိုင်ရာပစ္စည်းများလိုအပ်နေကြောင်း သတင်းသိရသည်။
စစ်ဘေးရှောင်များနှင့် ဒေသခံပြည်သူ့ကာကွယ်ရေးတပ်ဖွဲ့များကို ကျန်းမာရေးဆိုင်ရာ ဆေးဝါးကုသမှုများနှင့် စားနပ်ရိက္ခာထောက်ပံ့မှုများ ပြုလုပ်နေသော အဖွဲ့များ လက်ရှိတွင် အရေးပေါ်သုံး ဆေးဝါးများနှင့် ထောက်ပံ့မှုများ လိုအပ်နေကြောင်း အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
“ကျနော်တို့အဖွဲ့ဝင်တချို့က ကျန်းမာရေးဌာနက CDM လုပ်ထားတဲ့သူတွေပါ၊ တချို့ကလည်း ပြင်ပဌာနကဖြစ်တယ်၊ အခု ဖယ်ခုံမြို့နယ်အတွင်းက စစ်ရှောင်စခန်း တော်တော်များများမှာ ဖျားနေကြတယ်၊ ကလေးရော လူကြီးရော တစ်နေ့ကို ပျှမ်းမျှ ၇၅ ယောက်နှုန်းနဲ့ကုပေးနေရတယ်၊ ဆေးဝါးတွေက လုံလောက်မှု မရှိဘူး” ဟု ဆေးကုသပေးနေသည့် အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
ထို့အပြင် လက်ရှိမြေပြင်အခြေအနေအရ ဖယ်ခုံမြို့နယ်အတွင်းမှ ဒေသခံ ပြည်သူ့ကာကွယ်ရေး တပ်ဖွဲ့ဝင်များ ကလည်း ချမ်းအေးသည့်ဆောင်းရာသီတွင် အဝတ်အထည်လုံလောက်မှုမရှိခြင်း၊ ဖျားနာခြင်း၊ ချောင်းဆိုးခြင်းများ ရှိနေကြောင်း သိရသည်။
“လက်ရှိ ကျနော်တို့မှာ ချောင်းဆိုးပျောက်ဆေးနဲ့ အဖျားပျောက်ဆေး လက်ကျန် လုံးဝပြတ်သွားလို့ တချို့က အရဲစွန့်ပြီး မြို့ပေါ်တက်ပြီး အလှူခံထွက်ကြတယ်၊ အဓိက အခက်ခဲကတော့ ကျနော်တို့ အားလုံးက မြေပြင်မှာဆိုတော့ လိုင်းအမြဲမရဘူး” ဟု အထက်ပါ ပုဂ္ဂိုလ်က ပြောသည်။
စစ်တပ်မှ အာဏာသိမ်းပြီးနောက်ပိုင်းတွင် CDM ပြုလုပ်သည့် ကျန်းမာရေးဝန်ထမ်းများနှင့် ဆေးကျောင်းသားများ၊ ပြင်ပဌာနမှ ကျန်းမာရေးဆိုင်ရာဝန်ထမ်း စုပေါင်းပြုလုပ်ထားသည့်အဖွဲ့ဖြစ်ပြီး လက်ရှိ အခြေအနေများအရ ပြည်သူ့ကာကွယ်ရေးတပ်ဖွဲ့များနှင့် စစ်ဘေးရှောင်များ၏ ကျန်းမာရေးစောင့်ရှောင်မှုများအတွက် ဆေးဝါးထောက်ပံ့မှုများ လိုအပ်နေကြောင်း သိရသည်။
“ လက်ရှိမှာတော့ ချောင်းဆိုး ပျောက်ဆေး၊ ဖျားနှာပျောက်ဆေးတွေ အဓိကလိုနေတယ်၊ ပြည်သူများ ကူညီပေးဖို့ တောင်းဆိုချင်ပါတယ်” ဟု စစ်ရှောင်များကို ဆေးကုသနေသည့် အဖွဲ့ တာဝန်ရှိသူ တစ်ဦးက ပြောသည်။
ဖယ်ခုံမြို့နယ် တွင် စစ််ရှောင်စခန်း(၆)နေရာရှိပြီး စစ်ဘေးရှောင် (၃၀၀၀)ကျော်ရှိကြောင်း သိရသည်။
Leave a Comments