သျှမ်းပြည်မြောက်ပိုင်း နမ္မတူမြို့ရှိ စားသောက်ဆိုင်များသို့ ဝင်ရောက်စားသောက်သည့် TNLA တပ်သားများ၏ ကုန်ကျစရိတ်များကို ကျေးရွာသူကြီးများက ကုန်ကျခံပြီး ရှင်းပေးရကြောင်း သတင်းသိရသည်။
“နမ္မတူမြို့နယ်ထဲ တချို့ရွာမှာ စခန်းချနေတဲ့ စစ်သားတချို့တွေက အဲ့ရွာထဲမှာရှိတဲ့ စားသောက်ဆိုင်ဝင်ထိုင်ရင် စားသောက်ကုန်ကျစရိတ်က သူတို့အစား ရွာလူကြီး ပေးပေးနေရတယ်” ဟု ဒေသခံတစ်ဦးက သျှမ်းသံတော်ဆင့်ကို ပြောသည်။
နမ္မတူမြို့နယ် မန်စံကျေးရွာအတွင်းတွင် စခန်းချနေသည့် TNLA စစ်သားများသည် ဆိုင်ထိုင်စားသောက်ပြီး ကုန်ကျသည့် ပိုက်ဆံများကို မပေးဘဲ စာရင်းဘောင်ချာကို မှတ်ထားခိုင်းကာ ကျေးရွာလူကြီးထံသို့ တောင်းခိုင်း ကြောင်း ဒေသခံများက ပြောသည်။
“ဆိုင်ရှင်တွေကလည်း သူတို့ကို (TNLA တပ်သား) အတင်းအကြပ်မပြောရဲတော့ ရွာလူကြီးဆီကိုပဲ ဘောင်ချာ စာရွက်နဲ့ သွားတောင်းရတယ်၊ ရွာလူကြီးကလည်း သူတို့စီက အမိန့်ရထားလို့လား ဘာကြောင့်လည်း မသိဘူး၊ ဆိုင်ရှင်တွေ လာတောင်းတော့ ပေးရတယ်” ဟု အထက်ပါ ပုဂ္ဂိုလ်က ပြောသည်။
TNLA တပ်သားများမှ ယင်းကဲ့သို့ မတရားလုပ်ဆောင်မှုကို တချို့သောရွာသားများမှ တိုင်ကြားလိုသော်လည်း အသက်အန္တရာယ်ကျရောက်မည် စိုးရိမ်သဖြင့် မပြောရဲကြောင်း ဒေသခံများက ပြောသည်။
“တချို့ရွာက ပြည်သူပိုင်တဲ့ ကားတွေ ဆိုင်ကယ်တွေကို TNLA တွေက အလကား ယူသုံးတယ်၊ သူတို့သုံးလို့ ပျက် စီးသွားရင်လည်း မပြင်ပေးတဲ့အပြင် လာလည်းမပို့ပေးဘူး၊ ပိုင်ရှင်ကိုယ်တိုင်က ပြန်သွားယူခဲ့ရတာ၊ ဒါပေမဲ့ ပြည် သူတွေက ကြောက်တယ်၊ ဘယ်သူ့ကိုမှ မပြောရဲ မတိုင်ရဲဘူး” ဟု နမ္မတူမြို့နယ် ဒေသခံ အမျိုးသားတစ်ဦးက ပြောသည်။
နမ္မတူမြို့နယ်အတွင်း ကျေးရွာများတချို့တွင် TNLA စစ်သားတို့၏ ဖမ်းဆီးရိုက်နှက်စစ်ဆေးခြင်းကို ခံရသည့် ပြည်သူများ မကြာခဏရှိနေသည့်အတွက် ပြည်သူများလည်း ကြောက်လန့်ကာ မတရားမှုကို ခံနေရသော်လည်း ထုတ်ဖော်ပြောဆို တိုင်တန်းမှုများ မပြုလုပ်ရဲကြောင်း သိရသည်။
ယခုရက်ပိုင်းအတွင်း TNLA တို့သည် ၎င်းတို့သွားလာလှုပ်ရှားစခန်းချသည့် သျှမ်းပြည်အတွင်းမှ ကျေးရွာများ တချို့ကို တအာင်း(ပလောင်)အမျိုးသားတပ်မတော် (TNLA) အလံလွှင့်ထူရန် စေခိုင်းညွှန်ကြားမှုများ ရှိနေသည့် သတင်းများလည်း ထွက်ပေါ်လာသည်။
အထက်ပါ ကိစ္စများနှင့် ပတ်သက်ပြီး တအာင်း(ပလောင်) အမျိုးသားတပ်မတော်၏ ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်ကို မေးမြန်းရန်အတွက် အကြိမ်ကြိမ် ကြိုးစားဆက်သွယ်ခဲ့သော်လည်း အဆက်အသွယ်မရရှိခဲ့ပေ။
Leave a Comments